عِبرانیلار 4 - مُقادِّس کیتاب

خودایینگ دینچلیق مِکانی

¹ خودایینگ دینچلیق مِکانینا گیرمِک حاقینداقی واعداسی هِنیز هِم گویجونی ساقلایاندیر.‏ شُنونگ اوچین-ده، خاباردار بُلونگ، آرانگیزدان هیچ کیم دینچلیق مِکانینا گیرمِکدِن ماحروم بُلماسین.‏

² اِدیل اسرائیل خالقینا واغیظ اِدیلیشی یالی، خوش خابار بیزه-ده واغیظ اِدیلدی.‏ اُلارینگ اِشیدِن خاباری اُلارا هیچ بیر پِیداسی بُلمادی، سِبَبی اُلار مونی ایمان بیلِن قابول اِتمِدیلِر.‏

³ بیز بُلسا ایمان گِتیرِندیگیمیز اوچین، دینچلیق مِکانینا گیرِریس.‏ ایمان گِتیرمِدیکلِر حاقدا بُلسا خودای شِیله دییدی:‏ ‏«‏شُنگا گُرَه، اُلار دینچلیق مِکانیما آصلا گیرمِزلِر دییّپ، اُز غاضابیمدا مِن قاسام ایچدیم.‏»‏ اُل بو یِرینگ حتّیٰ دونیَه‌نی یارادانی بَری تاییار اِدیلِندیگینی آیتدی.‏

⁴ بیز اُنونگ تاییاردیغینی بیلیَریس، سِبَبی یِدینجی گونی حاقدا مُقادِّس یازغیلارینگ بیر یِرینده:‏ ‏«‏خودای یِدینجی گون هِمّه ایشینی تاماملاپ دینچ آلدی»‏ دییّپ یازیلاندیر.‏

⁵ اِمّا یِنه یُقاردا آیدیلانلار قایتالانیار:‏ ‏«‏اُلار دینچلیق مِکانیما آصلا گیرمِزلِر»‏.‏

⁶ شُندا-دا کَبیر آداملار اوچین اُل یِره گیرمَگه هِنیز هِم مومکینچیلیک باردیر، بو مِکان حاقداقی خابار اَوَّلکی اِشیدِنلِر خودایا موطیع بُلمادیقلاری سِبَپلی، اُنگا گیرمِکدِن ماحروم بُلدولار.‏

⁷ کَن ییل‍لاردان سُنگرا خودای ‏«‏بو گون»‏ دییِن یِنه بیر گونی بِلَّپ، بو حاقدا داوودونگ اوستو بیلِن اُزال آیدیلیشی یالی کِپلِدی:‏ ‏«‏بو گون اِگِر سیز مِنینگ سِسیمی اِشیتسِنگیز، یورِگینگیزی قاتاتمانگ»‏.‏

⁸ اِگِر یوشَع پیغامبار اُلاری دینچلیق مِکانینا یِتیرِن بُلسادی، اُندا خودای موندان سُنگ باشغا گون بارادا سُز آچمازدی.‏

⁹ شونلوقدا، خودایینگ خالقینا سَبَّت گونی یالی آیراتین بیر دینچلیق قاراشیار.‏

¹⁰ خودای اُز ایشلِریندِن دینیپ، نَهیلی دینچ آلان بُلسا، اُنونگ دینچلیق مِکانینا گیرِن آدام هِم اُز ایشلِریندِن دینیپ، شِیله دینچ آلیاندیر.‏

¹¹ شُنونگ اوچین، گِلینگ، شُل دینچلیق مِکانینا گیرمِک اوچین چالیشایلینگ.‏ هیچ کیم اسرائیل خالقی یالی، خودایا موطیع‌سیزلیق اِدیپ، دینچلیقدان ماحروم بُلماسین.‏

¹² خودایینگ سُزی دیری هِم تاثیرلیدیر، هِر بیر ایکی یوزلی قیلیچدان هِم کِسگیردیر.‏ اُل جان بیلِن روحی، بُغونلار بیلِن ییلیگی ایکَه بُلیَندیر.‏ قالبینگداقی هِمّه فیکرلِری و نییِتلِری آیان اِدیَندیر.‏

¹³ خودایدان گوزگین یارادیلان هیچ زات یُقدور، اُنونگ ناظاریندا هِمّه زات آچیق و مِسه-معلیمدیر.‏ بیز اُنگا حاساپ بِرمِلیدیریس.‏

عیسی، باش کاهینمیز

¹⁴ شِیلِلیکده، ایقرار اِدِن ایمانیمیزی قاییم ساقلایلینگ!‏ چونکی بیزینگ آسمانا چیقیپ، خودایینگ حوضورینا باران بِییک باش کاهینمیز بار.‏ اُل خودایینگ اُغلی عیسادیر.‏

¹⁵ باش کاهینمیز آصلا گونَه اِتمِدیک هِم بُلسا، اِدیل بیز یالی هِمّه طارافدان وِسوِسه‌لِره سالنیپدی.‏ شُنونگ اوچین هِم اُل بیزینگ اِجیزلیکلِریمیزه دوشونیَر.‏

¹⁶ گِلینگ، مِرحِمِتلی خودایینگ تاختینا باتیرلیق بیلِن قُلایلاشایلینگ.‏ شُندا اُل مِرحِمِت اِدیپ، گِرِک واقتدا بیزه یاردیم بِرِر.‏