عِبرانیلار 3 - مُقادِّس کیتابعیسی موسادان بِییکدیر 1 شُنونگ اوچین هِم، اِی مِنینگ بیلِن بیله خودای طارافیندان چاغیریلان مُقادِّس عزیزلِر، هِمّه فیکرینگیز عیسادا بُلسون! اُل بیزینگ ایقرار اِدیَن رِسول و باش کاهینیمیزدیر. 2 موسانینگ خودایینگ اُیونده اِمین خیدماتکَر بُلشی یالی، عیسی هِم اُزونی کاهینلیغا بِلَّن خودایا وِفادار بُلدی. 3 اُی سالان آدامینگ اُیدِن خاص اولی حُرماتلی بُلشی یالی، عیسی-دا موسادان خاص اولی حُرماتا میناسیپ بُلدی. 4 هِر بیر اُی کیمدیر بیری طارافیندان بینا اِدیلیَندیر، اِمّا هِمّه زادینگ بینا اِدیَنی خودایدیر. 5 موسی گِلجِکده آیان اِدیلجِک سُزلِره شاهاتلیق اِتمِک اوچین، خیدماتکَر کیمین خودایینگ اُیونه اِمین بُلدی. 6 اِمّا عیسی مسیح خودایینگ اُیونه اُغول حُکمونده اِمیندیر. اِگِر قایراتیمیزی و قووانیان اومیدیمیزی ساقلاماغی باشارساق، بیز خودایینگ اُیودیریس. ایماندان دَنمَنگ 7 شُنونگ اوچین مُقادِّس روحونگ آیدیشی یالی: «بو گون اِگِر سیز مِنینگ سِسیمی اِشیتسِنگیز، 8 مانگا باش قالدیران آتالارینگیز یالی قاتی یورِکلی بُلمانگ. اُلارینگ مِنی بیاباندا ایمتِحان اِدیشی یالی یورِگینگیزی قاتیتمانگ. 9 قیرق ییلّاپ اِدِن ایشلِریمی گُرسِلِر-ده، اُل یِرده آتالارینگیز مِنی ایمتِحانلاپ گُردولِر. 10 شُنونگ اوچین مِن بو نِسله غاضابلانیپ دییدیم: ”اُلارینگ یورِگی هِمیشه مِندِن داشدیر، و مِنینگ یُل‍لاریمدان یُرییَن دَلدیرلِر“. 11 شُنگا گُرَه، اُلار دینچلیق مِکانیما گیرمِزلِر دییّپ، اُز غاضابیمدا مِن قاسام ایچدیم.» 12 اِی عزیزلِر، خاباردار بُلونگ! سیزینگ هیچ بیرینگیزده یامان نییِتلی و ایمانسیز یورِک بُلماسین، بولار سیزی دیری خودایدان داشلاشدیرماسین. 13 تِرسینه، هِر گونی «بو گون» دییّپ حاساپلاپ، بیری-بیرینگیزی گُوونلیک بِرینگ. شِیدیپ، سیزینگ هیچ بیرینگیز گونَه‌نینگ تُرونا دوشوپ، قاتی یورِکلی بُلمانگ. 14 بیز اُزال-باشداقی اینامیمیزی آخیرنا چِنلی قاییم ساقلاساق، مسیحده شِریک بُلدوغیمیزدیر. 15 اُزال آیدیلیشی یالی: «بو گون اِگِر سیز مِنینگ سِسیمی اِشیتسِنگیز، مانگا باش قالدیران آتالارینگیز یالی قاتی یورِکلی بُلمانگ.» 16 اُنونگ سِسینی اِشیدیپ هِم باش قالدیرانلار کیملِردی؟ اُندا بولار موسانینگ مصردِن چیقارانلاری دَلمیدی؟ 17 خودای قیرق ییلّاپ کیمه غاضابلاندی؟ گونَه اِدِنلِره و اُلارینگ جِسِدلِری بیاباندا قُیلانلارا دَلمی نَمه؟ 18 خودای: «اُلار دینچلیق مِکانیما گیرمِزلِر» دییّپ، کیملِر حاقدا قاسام ایچدی؟ اُزونه موطیع بُلمایان آداملار حاقدا دَلمی نَمه؟ 19 شِیلِلیکده، بیز اُلارینگ ایمان گِتیرمِدیکلِری سِبَپلی واعدا بِرلِن یِره گیریپ بیلمَندیکلِرینی گُریَریس. |
© Turkmen Truth