عِبرانیلار 2 - مُقادِّس کیتابنِجاتدا قاییم دورونگ 1 شُنونگ اوچین ایماندان دَنمِز یالی، اِشیدِنلِریمیزه خاص کَن اونس بِرمِلیدیریس. 2 اِگِر خودایینگ پِریشده‌لِرینینگ اوستو بیلِن آیدیلان خاباری قاییم توتوپ، گونَه اِدِنلِر یا-دا قولاق آسمایان بُلانلار اُز عادالاتلی جُغابینی آلسادیلار، 3 بیز شوندان سُنگ نِجات تاپماغینگ بو عجاییپ یُلونی اینکَر اِتسِک، جِزادان قاچیپ بیلِریسمی؟ نِجات تاپماغینگ بو یُلونی اُزال-باشدا تانگری عیسی اِعلان اِتدی و اُنونگ آغزیندان اِشیدِنلِر تاصدیقلادیلار. 4 خودایینگ اُزی هِم عالاماتلار، مُعجِزه‌لِر و هِر هیلی قودراتلاری گُرکِزمِک بیلِن بو خاباری تاصدیقلادی و اُز ایسلِگینه گُرَه مُقادِّس روحونگ ناغماتلارینی پایلادی. عیسی اینسان صوراتیندا بُلوپ گِلدی 5 بیزینگ گورّونگینی اِدیَن گِلجِکّی دونیَه‌میزی خودای پِریشده‌لِره موطیع اِتمِدی. 6 تِرسینه، مُقادِّس یازغیلارینگ بیر یِرینده شِیله شاهاتلیق اِدیلیَر: «آدام نَمه سِن اُنی یادلار یالی؟ اینسان اُغلی نَمه فیکرینی اِدِر یالی؟ 7 اُنی پِریشده‌لِردِن بیرآز واقتلیق آشاق توتدونگ. اُنگا حُرمات و بِییکلیک تاجینی گِیدیردینگ، 8 هِمّه زادی آیاغینینگ آشاغیندا قُیدونگ.» خودای هِمّه زادی اُنونگ آیاغینینگ آشاغیندا قُیدی، اُنگا موطیع دَل زات قُیمادی. یُنه هِمّه زادینگ اُنگا موطیع بُلاندیغی حَضیرکی واقتدا بیزه اَشکَر گُرونمِیَر. 9 اِمّا بیز حُرمات و بِییکلیک تاجینینگ عیسی گِیدیریلِندیگینی گُریَریس، سِبَبی اُل بیزینگ اوچین اُلومه جیدادی. هاووا، اُل پِریشده‌لِردِن بیرآز واقتلیق آشاق توتولیپ، خودایینگ مِرحِمِتی بیلِن هِمّه اینسانلار اوچین عاذاپ چِکیپ اُلدی. 10 باش نِجات بِریَنچی عیسانی عاذاپلی اُلومینگ اوستو بیلِن کَمیل اِتمِکلیک هِمّه زادی اُزی اوچین و اُزونینگ اوستو بیلِن یارادان خودایا گِلشیکلیدی. سِبَبی خودای اُنونگ اُلومینینگ اوستو بیلِن کَن اُغول‍لاری بِییکلیگَه شایلادی. 11 اینسانلاری مُقادِّس اِدیَن عیسی و اُنونگ اوستو بیلِن مُقادِّس اِدیلِنلِر ایندی بیر ماشغالا باغلیدیر. شُنونگ اوچین هِم عیسی اُلارا دُغان و آیال دُغان دییمِکدِن اوتانمایار. 12 اُل خودایا شِیله دییَّر: «سِنینگ آدینگی دُغانلاریما و آیال دُغانلاریما آیدارین، و جِماغاتینگ اُرتاسیندا سانگا اُوگی دییِرین.» 13 اُل یِنه-ده شِیله دییَّر: «مِن اُنگا تَوَکُّل اِدِرین». سُنگرا یِنه شِیله دییَّر: «اینه، مِن و خودایینگ مانگا بِرِن فِرزِنتلِری». 14 بو فِرزِنتلِر تِن و هِم قانداندیقلاری اوچین، عیسی هِم اُلار یالی اینسان بُلدی. اُلومه دوچار اِدیَن شِیطانی اُل اُز اُلومینینگ اوستو بیلِن یُق اِتدی، 15 و هِمیشه‌لیک اُلوم قُرقوسینینگ بِنده‌لیگیندَکی اینسانلارینگ هِمّه‌سینی آزاد اِتدی. 16 عیسی پِریشده‌لِره دَل-ده، شِیله بُلسا ابراهیمینگ نِسیل‍لِرینه یاردیم اِدیَر. 17 شُنونگ اوچین اُل هِر طارافدان بیزلِره مِنگزِمِلی بُلدی. شِیدیپ، اُل خالقینگ گونَه‌لِرینی پَکلِیَندیر و خودایینگ خیدماتیندا رِحمدار هِم اِمین باش کاهیندیر. 18 عیسانینگ اُزی وِسوِسه دوشوپ، عاذاپ بارینی گُرِندیگی اوچین، وِسوِسه دوشِنلِره کُمِک اِتمِگی باشاریاندیر. |
© Turkmen Truth