عِبرانیلار 12 - مُقادِّس کیتابخودای سُییَنینی تِربیِتلِیَندیر 1 اینه، بیزینگ اِطرافیمیزی قاپلاپ آلان شِیله اولی بولوت شاهاتلارینگ بارلیغینا گُرَه، قینچیلیق دُرِدیَن هِر هیلی یوکی و بُینومیزدان یاپیشان گونَه‌لِری زینگایلینگ-دا، اُوومیزده دوران یاریشدا صابیرلیق بیلِن یُرتِیلینگ. 2 گِلینگ، گُزومیزی ایمانیمیزینگ چِشمه‌سی و کَمیلِّشدیرییَنچیسی، یَعنی عیسی تیکِیلینگ. اُل گِلجِکدَکی شاتلیغا قاووشماق اوچین، ماسغاراچیلیغی هیچ حاساپلاپ، صلیبدَکی اُلومه جیدادی و خودایینگ تاختینینگ ساغیندا اُتوردی. 3 سیز یادامان و یورِگینگیز سُویماز یالی، عیسی حاقدا فیکر اِدینگ. اُل گونَه‌کَرلِر طارافیندان کَن اِذیِت چِکیپ، هِمّه‌سینه جیدادی. 4 گونَهَه قارشی اوروشینگیزدا، سیز هِنیز قانینگیز دُکولیَنچَه جیداملیق گُرکِزمِدینگیز. 5 اوستونه-ده، خودایینگ سیزه اُز فِرزِنتلِری حُکمونده آیدان بو ناصیحاتینی-دا یاتدان چیقاردینگیز: «اِی اُغلوم، خودایینگ تِربیِتینی کِم توتما. اُنونگ کَییمِسینَه یورِگینگ سُویماسین. 6 چونکی خودای سُییَنینی تِربیِتلِیَندیر، و قابول اِدِن هِر بیر فِرزِندینه کَییَندیر.» 7 تِربیِت بُلماقدا جیداملی بُلونگ. چونکی خودای سیزی اُز فِرزِنتلِری کیمین تِربیِتلِیَر. یُغسام، هایسی اُغلا آتاسی تِربیِت بِرمِیَر؟ 8 اِگِر خودای سیزی هِمّه‌لِری تِربیِتلِیشی یالی تِربیِتلِمِسه، اُندا سیز خودایینگ حاقیقی فِرزِندی دَل-ده، حارامزاداسینگیز. 9 موندان باشغا-دا، بیزه تِربیِت بِرِن دونیِوی آتالاریمیز باردی، بیز اُلارا حُرمات قُییاریس. اِگِر شِیدیَن بُلساق، روحی آتامیزا خاص-دا کَنرَک موطیع بُلوپ یاشامالی دَلمی؟ 10 آتالاریمیز بیزه اُز بیلیَنلِرینه گُرَه، قیسغا واقتلیق تِربیِت بِریپدیلِر. خودای بُلسا بیزینگ هِم اُنونگ یالی مُقادِّس بُلوپ بیلمِگیمیز اوچین بیزه تِربیِت بِریَر. 11 آدام تِربیِت آلاندا شاتلانمایار، قایتام، دِرت چِکیَر. اِمّا شِیله تِربیِت آلاندان سُنگرا، اُل تاقوالیقدا و پاراحاتلیقدا یاشایاندیر. 12 شُنونگ اوچین قاوشاق اِل‍لِرینگیزه گویچ بِرینگ و تیترِیَن دیزلارینگیزا قووات بِرینگ! 13 «آیاقلارینگیز اوچین دُغری یُلی سایلاپ آلینگ». شِیدیپ، قُی، آرانگیزداقی اِجیز و آغساق آداملار ییقیلماسینلار، تِرسینه، شِفا تاپسینلار. خودایی رِد اِتمَنگ 14 هِمّه‌لِر بیلِن پاراحاتلیقدا بُلونگ و مُقادِّس یاشاماغا چالیشینگ. یُغسا مُقادِّس بُلان خودایی گُروپ بیلمِرسینگیز. 15 خاباردار بُلونگ، هیچ کیم خودایینگ مِرحِمِتیندِن ماحروم بُلماسین. بیر آجی کُک گُگِریپ، سیزه اِذیِت بِرمِسین، کَن آداملار مونونگ بیلِن زَهِرلِنمِسین. 16 هیچ کیم آخلاقسیزلیق ایش اِتمِسین، ایلکینجی حاقینی بیر اُقارا آشا ساتان عیسو یالی خودایا حُرماتسیزلیق اِتمِسین. 17 بیلشینگیز یالی، بیرآز واقتدان سُنگرا عیسو آتاسینینگ بِرِکِتینی آلماق ایسلِدی، اِمّا رِد اِدیلدی. مونونگ اوچین گُزیاش دُکوپ یالبارسا-دا، اِدیلِن قاراری اویتگِدیپ بیلمِدی. 18 سیزینگ یاقینلاشان داغینگیز اِلَّپ گُروپ بُلیان سینا داغی یالی دَلدیر. سینا داغیندا توتاشیپ اُد یانیاردی، داغینگ اوستونی قارانگقیلیق و قارا بولوت اُرتوپ، قای-تُزان توریاردی، 19 سورنای سِسی چیقیپ، خودایینگ آوازی اِشیدیلیَردی. مونی اِشیدِن آداملار خودایینگ اُزلِرینه ایکینجی گِزِک کِپلِمِزلیگی اوچین یالباریپدیلار. 20 سِبَبی: «داغا حتّیٰ حایوان هِم یوواشچا دِگیرسه، حُکمَن داشلانسین» دییِن خودایینگ دِستورینا اُلار جیداپ بیلمَندیلِر. 21 گُرنوش شِیله بیر قُرقونچدی، موسانینگ اُزی: «قُرقودان یانگا تیترِیَرین» دییّپدی. 22 سیز بُلسا صَهیون داغینا، دیری خودایینگ شَهری بُلان آسمانا دِگیشلی اورشلیمه، شاتلیغا اویشمِلِنگه ییغنانان مونگلِرچه پِریشده‌لِرینگ حوضورینا قُلایلاشدینگیز. 23 خودایینگ ایلکینجی فِرزِنتلِرینینگ جِماغاتینا قُلایلاشدینگیز، اُلارینگ آدلاری آسماندا یازیلاندیر. هِمّه‌سینینگ قاضیسی بُلان و تاقوالی آداملارینگ روحلارینی کَمیلّیگه یِتیرِن خودایینگ حوضورینا گِلدینگیز. 24 سیز تَزه عَهدینگ بُنیاتچیسی عیسانینگ حوضورینا گِلدینگیز. هابیل‌ینگ اِنتِقام آلماغا قیغیریان قانینا دَل-ده، شِیله بُلسا گونَه‌لِریمیزی یووماق اوچین سِپیلِن عیسانینگ قانینا یاقینلاشدینگیز. 25 اونس بِرینگ، اُزونگیز بیلِن کِپلِیَن خودایدان یوز اُوورمَنگ! اِگِر اسرائیل خالقینا یِر یوزونده کِپلَنی رِد اِدِنلِرینده، قاچیپ نِجات تاپمادیق بُلسالار، اُندا بیز آسماندان کِپلَندِن یوز اُوورسِک، جِزادان آصلا نِجات تاپماجاقدیقیمیز مِسه-معلیم گُرنوپ دور آخیری. 26 شُل واقت خودایینگ سِسی یِری تیترِدیپدی، اِمّا ایندی اُل: «مِن یِنه بیر گِزِک دینگه یِری دَل، آسمانی-دا تیترِدِرین» دییّپ واعدا بِردی. 27 «یِنه بیر گِزِک» دییِن واعدا تیترِجِک زاتلارینگ، یَعنی یارادیلان زاتلارینگ آرادان آیریلجاقدیغینی و چایقانماز زاتلارینگ اِبِدی تیترِمِجِکدیگینی بیلدیردیَر. 28 شُنونگ اوچین هِم تیترِمِیَن پادیشاهلیغا قاوشاندیغیمیز اوچین شوکور اِدِیلینگ. خودایی خُشنود اِتمِک اوچین اُنگا حُرمات و هِم قُرقی بیلِن عیبادات اِدِیلینگ، 29 سِبَبی خوداییمیز یاقیپ-یاندیریجی اُددور. |
© Turkmen Truth