عِبرانیلار 11 - مُقادِّس کیتابایمانینگ قهرامان آداملاری 1 ایمان اومید اِدیَن زاتلاریمیزا بیل باغلاماق و گُرمِیَن زاتلاریمیزا اینانماقدیر. 2 آتا-بابالاریمیز ایمانینگ اوستو بیلِن خودایی خُشنود اِتدیلِر. 3 بیز عالِم-جاهانینگ خودایینگ حُکومی بیلِن یارادیلاندیغینا، شِیله هِم، گُرونیَن زاتلارینگ گُرونمِیَن زاتلاردان دُرَندیگینه ایمانینگ اوستو بیلِن دوشونیَریس. 4 هابیل ایمانینگ اوستو بیلِن خودایا قابیلدان خاص قاوی قربانلیق هُدورلِدی. خودای هابیل‌ینگ قربانلیغیندان راضی بُلوپ، اُنی ایمانینگ اوستو بیلِن تاقوالی آدام حاساپلادی. هابیل اُلِن هِم بُلسا، ایمانینگ اوستو بیلِن حَضیر هِم کِپلِیَر. 5 ایمانینگ اوستو بیلِن خَنوخ یُقاری آلیندی، اُل اُلوم قاراسینی گُرمِدی. هیچ کیم اُنی تاپیپ بیلمِدی، سِبَبی خودای اُنی یُقاری آلدی. خَنوخ یُقاری آلینمازیندان اُنگ هِم خودایی خُشنود اِدیپدی. 6 ایمان گِتیرمِیَن آدام هیچ واقت خودایی خُشنود اِدیپ بیلمِز، چونکی خودایا یاقینلاشان آدام اُنونگ بارلیغینا و اُزونی آغتاریانلاری بایراق بِرجِکدیگینه حُکمَن ایمانی بُلمالیدیر. 7 نوح ماشغالاسینینگ نِجات تاپماغی اوچین ایمانینگ اوستو بیلِن بیر کِشتی بِجِردی. اُل هِنیز بُلمادیق واقالار حاقدا خودایدان ایلهام آلاندا، اُندان قُرقوپ، اُنگا قولاق آسدی. شِیلِلیکده، تامام دونیَه مَحکوم بُلدی، نوح بُلسا ایمانینگ اوستو بیلِن تاقوالیغی میراث آلدی. 8 میراث اِدیپ بِرِن یوردونا ایبِرمِک اوچین خودای ابراهیمی چاغیراندا، اُل ایمانینگ اوستو بیلِن اُنگا موطیع بُلدی، نیرَه باریاندیغینی بیلمِزدِن یُلا دوشدی. 9 اُل ایمانینگ اوستو بیلِن خودایینگ واعدا بِرِن یوردونا گُچوپ و یِرلِشدی. شُنونگ یالی اسحاق بیلِن یعقوب هِم بو بیگانه یورتدا و چادیردا یاشادیلار، سِبَبی اُلار هِم خودایینگ بِرِن شو واعداسینینگ میراثدارلاریدی. 10 چونکی ابراهیم خودای طارافیندان بینا اِدیلیَن و بِجِرِلیَن قاییم بُنیادلی شَهره قاراشیاردی. 11 اُزونینگ قارّاندیغینا و آیالی سارانینگ گُورِلی بُلمایاندیغینا باقمازدان، ابراهیم ایمانینگ اوستو بیلِن فِرزِنت گُردی. سِبَبی اُل واعدا بِرِن خودایینگ وِفاداردیغینا ایناندی. 12 شِیلِلیکده، یاشی بیر اِندازا باران بو اُلی یالی آدامدان آسمانداقی ییلدیزلار یالی و دِریا کِنارینداقی چَگِلِر یالی سانسیز نِسل دُرِدی. 13 بو آداملارینگ هِمّه‌سی اینگ سُنگقی دِمینه چِنلی خودایا ایمان گِتیریپ یاشادیلار. اُلار واعدا اِدیلِن یوردا قاووشماسالار-دا، اُل یِری اوزاقدان گُروپ شاتلاندیلار. اُزلِرینینگ یِر یوزونده گُچوپ هِم بیگانه‌دیکلِرینی بُیون آلدیلار. 14 گُچوپ گِلِندیکلِرینی بُیون آلیان آداملار اُزلِرینینگ بیر واطان آغتاریاندیقلارینی اَشکَر گُرکِزیَرلِر. 15 اِگِر اُلار تِرک اِدیپ قایدان یورتلارینی کویسِیَن بُلسادیلار، اُندا ایزلارینا دُلانماغینگ چاره‌سینی تاپاردیلار. 16 اِمّا اُلار خاص قاووسینی، یَعنی آسمانداقی واطانی آرزو اِدیَردیلِر. شُنونگ اوچین خودای اُزونی اُلارینگ خودایی دییّپ آدلاندیرماقدان اوتانمایار. چونکی خودای اُلار اوچین بیر شَهر تاییارلادی. 17-18 خودای ابراهیمی ایمتِحانلاندا، اُل ایمانینگ اوستو بیلِن اسحاقی قربانلیق حُکمونده هُدورلِدی. خودای اُنگا: «سِنینگ نِسلینگ اسحاقینگ اوستو بیلِن دُوام اِدِر» دییّپ واعدا بِرِن هِم بُلسا، ابراهیم شُل یِکِجه اُغلونی قربانلیق اِتمَگه تاییاردی. 19 ابراهیم خودایینگ اُلولِری دیرِلتمِگی باشاریاندیغینا اینانیاردی. شُنگا گُرَه-ده، اُل اسحاقی اُلومدِن آلیپ قالدی. 20 ایمانینگ اوستو بیلِن اسحاق هِم بُلجاق زاتلار حاقدا یعقوب بیلِن عیسووا بِرِکِت بِردی. 21 یعقوب اُلوپ باریان واقتیندا، عصاسینا سُیِنیپ، یوسفینگ ایکی اُغلونا ایمانینگ اوستو بیلِن بِرِکِت بِردی و خودایا سِجده اِتدی. 22 یوسف هِم اُلوپ باریارقا، اسرائیل خالقینینگ مصردِن چیقجاقدیغینی آیدیپ، اُز جِسِدی بارادا ایمانینگ اوستو بیلِن تابشیریق بِردی. 23 موسی دُغاندا، اِنه-آتاسی اُنی ایمانینگ اوستو بیلِن اوچ آی گوزگَپ ساقلادی. اُلار اُغلانینگ اویتگِشیکدیگینی گُروپ، پادیشاهینگ دِستوریندان قُرقمادیلار. 24 اولالیپ، یِتیشِنده، موسی ایمانینگ اوستو بیلِن فِرعونینگ قیزینینگ اُغلی دییلیپ تانیلماغی ایسلِمِدی. 25 اُل گونَه قازانیپ، آز واقتلایین لِذِّتلی دورموشدا یاشاندان، خودایینگ خالقی بیلِن بیله حُرلوق چِکمِگی اُزونه لاییق بیلدی. 26 موسی مسیحینگ اوغروندا رُسوا اِدیلمِلِرینی مصرینگ خازینالاریندان خاص اولی بایلیق حاساپلادی، سِبَبی اُل اُزونینگ آلجاق بِییک بایراغینا اومید باغلایاردی. 27 اُل پادیشاهینگ غاضابیندان قُرقمان، ایمانینگ اوستو بیلِن مصری تِرک اِتدی. گُزه گُرونمِیَن خودایی گُرِن یالی سایلان یُلوندا قاییم دوردی. 28 موسی ایمانینگ اوستو بیلِن پِسَح قربانیسینی اُلدورمِگی و اُلارینگ قانینی قاپینینگ سُیِگلِرینه چالماغی تابشیردی. اُل مونی اسرائیل خالقینینگ اَوَّلکی اُغول‍لارینا اُلوم پِریشده‌سینینگ اِل دِگیرمِزلیگی اوچین اِتدی. 29 ایمانینگ اوستو بیلِن اسرائیل‌لار قیزیل دِریادان قوری یِردِن گِچیَن یالی گِچدیلِر. اِمّا مصریلِر هِم گِچجِک بُلوپ حِرِکِت اِدینلِرینده غارق بُلدولار. 30 اسرائیل خالقی یِدی گونلَپ اَریحانینگ داشیندان آیلاناندان سُنگ، ایمانینگ اوستو بیلِن دیوارلار ییقیلدی. 31 ایمانینگ اوستو بیلِن فاحیشه راحاب هِلَک بُلمادی. اُل اسرائیل جاسوسلارینی قیزقینلیق بیلِن قارشیلاندیغی اوچین، خودایا موطیع بُلمادیقلار بیلِن بیله اُلدوریلمِدی. 32 باشغا یِنه نَمه آیدایین؟ جِدعون، باراق، شَمشون، یِفتاح، داوود، سموئیل و پیغامبارلار حاقدا گورّونگ بِرمَگه واقتیم یُق. 33 ایمانینگ اوستو بیلِن اُلار اِنچِمه پادیشاهلیغی یِنگدیلِر، عادالاتی یِرینه یِتیردیلِر، واعدالارا یِتدیلِر، آرسلانلارینگ آغزینی باغلادیلار، 34 توتاشیان اُدی سُندوردیلِر، قیلیجینگ تیغیندان قاچیپ سیپدیلار، اِجیز بُلسالار هِم گویچدِن دُلدولار، جِنگده قوواتلانیپ و بیگانه قُشونلاری پیتراتدیلار. 35 آیال‍لار اُلِن یاقینلارینی دیرِلِن حالدا ایزینا آلدیلار. کَبیرلِری بُلسا دیرِلیشدِن سُنگ قاوی یاشایشا قاووشماق اوچین، آزاد بُلماغی قابول اِتمَن، عاذاپ و زِجیره جیدادیلار. 36 باشغا بیرِلِری ماسغارا اِدیلمِلِره سِزاوار اِدیلیپ شالّاقلاندیلار، زینجیرلار بیلِن باغلانیپ، زیندانا زینگیلدیلار. 37 اُلارینگ کَبیرینی داشلادیلار، بِدِنلِرینی بیچغی بیلِن کِسیپ ایکی بُلدولِر، قیلیچدان گِچیریپ اُلدوردیلِر. کَبیریلِر قُیون و گِچی دِریسینی گِییپ، آواراچیلیق چِکدیلِر، مَحتَجلیکده یاشادیلار، ظولوم آشاغیندا عاذاپلانیپ، حُرلوق چِکدیلِر. 38 دونیَه اُلارا لاییق دَلدی. اُلار بیابانلاردا و داغلاردا اِنتیدیلِر، چوقورلاردا و داغینگ دِشیکلِرینده گوزگِندیلِر. 39 اُلارینگ هِمّه‌سی ایمانینگ اوستو بیلِن خودایی خُشنود اِدِن بُلسالار هِم، اُلارینگ هیچ بیری خودایینگ واعداسینا قاووشمادیلار. 40 سِبَبی خودای بیزینگ اوچین خاص قاوی بیر زادی تاییارلاپدی. اُل اُزونه وِفادار بُلان بو آداملارینگ بیزینگ بیلِن بیرلیکده کَمیل بُلماغینی ایسلِدی. |
© Turkmen Truth