عِبرانیلار 10 - مُقادِّس کیتاباینگ سُنگقی قربانلیق 1 موسانینگ شِریغاتی گِلجِکّی قاوی زاتلارینگ اُزی دَل-ده، شُل زاتلارینگ کُلِگه‌سیدیر. شو سِبَپلی شِریغات هِر ییل بُلشی یالی هُدورلِنِن شُل بیر قربانلیقلار بیلِن خودایا یاقینلاشیانلاری هیچ هاچان کَمیل اِدیپ بیلمِیَر. 2 اِگِر کَمیل اِدیپ بیلیَن بُلسادی، اُندا قربانلیق هُدورلِمِگی بِس اِدیلمِزمیدی؟ چونکی عیبادات اِدیَنلِر گونَه‌دِن بیر گِزِک پَکلِنِنلِریندِن سُنگ، اُلارینگ وِجدانی گونَه‌لِرینینگ پَکلِنمِگینه قایدیپ مَحتَج بُلمازدی. 3 اِمّا اُل قربانلیقلار هِر ییل اینسانلارا گونَه‌لِرینی یادلاندیراردی. 4 سِبَبی سیغیرلارینگ و گِچیلِرینگ قانی بیلِن گونَه‌لِری یووماق مومکین دَلدیر. 5 شُنونگ اوچین مسیح دونیَه گِلِنده، خودایا شِیله دییدی: «قربانلیق بیلِن صاداقانی سِن ایسلِمِدینگ، اِمّا مانگا بیر بِدِن تاییارلادینگ. 6 یاقیلیان قربانلیغی و گونَه قربانلیغی سِن حالامادینگ. 7 شُندا دییدیم: ”اینه، مِن! کیتاپدا مِن بارادا یازیلان، اِی خوداییم، ایسلِگینگی بِرجای اِتمَگه، اینه، مِن گِلدیم.“» 8 مسیح باشدا شِریغاتینگ طالاب اِدیَن قربانلیقلاری بارادا سُز آیدیپ، خودایا: «سِن قربانلیق بیلِن صاداقانی ایسلِمِدینگ، یاقیلیان هِم گونَه قربانلیغی-دا حالامادینگ» دییدی. 9 سُنگرا-دا: «اینه، مِن، سِنینگ ایسلِگینگی بِرجای اِتمَگه گِلدیم» دییدی. شِیدیپ، مسیح اُز قربانلیغینی بِرقارار اِتمِک اوچین، اُوالقی قربانلیقلاری باطیل اِدیَر. 10 بیز بو ایسلِگَه گُرَه، عیسی مسیحینگ بِدِنینینگ هِمّه زات اوچین بیر گِزِک و هِمیشه‌لیک قربانی اِدیلمِگینینگ اوستو بیلِن مُقادِّس اِدیلدیک. 11 هِر بیر کاهین هِر گون خیدماتا مِشغول بُلوپ، دینی ایشلِری یِرینه یِتیریَردی و شُل بیر قربانلیقلاری بیرنَچه گِزِک هُدورلِیَردی. اِمّا بو قربانلیقلار هیچ واقت گونَه‌لِری یووماغی باشارمایار. 12 اِمّا مسیح گونَه‌لِری هِمیشه‌لیک یوویان یِکِجه قربانلیغی هُدورلَندِن سُنگ، خودایینگ ساغیندا اُتوردی. 13 شُندان بَری هِم اُل دوشمانلارینینگ آیاق آشاغینا سالینماغینا قاراشیار. 14 سِبَبی اُل مُقادِّس اِدیَنلِرینی یِکِجه قربانلیق بیلِن هِمیشه‌لیک کَمیل اِتدی. 15 مُقادِّس روح هِم بیزه بو حاقدا شاهاتلیق اِدیَر. باشدا خودای شِیله دییَّر: 16 «اُل گونلِردِن سُنگ، مِنینگ اُلار بیلِن باغلاشجاق عَهدیم شودور: مِن حُکوملِریمی اُلارینگ یورِکلِرینه سالارین و فیکرلِرینه یازارین.» 17 سُنگرا اُل: «موندان بِیلَک اُلارینگ گونَه‌لِرینی و خاطالارینی هیچ هاچان یادلامارین» دییَّر. 18 دییمِک، خودای گونَه‌لِری باغیشلان بُلسا، موندان شُنگرا گونَه اوچین قربانلیق هُدورلِمِگینگ گِرِگی یُق. قاییم اینام بیلِن خودایا یاقینلاشایلینگ 19 شُنونگ اوچین هِم، اِی عزیزلِر، عیسانینگ قانینینگ اوستو بیلِن ایندی بیز اینگ مُقادِّس جایا خاطیرجِملیک بیلِن گیریپ بیلیَریس. 20 عیسی اُز اُلومینینگ اوستو بیلِن بیزه چادیرداقی ایچکی پِرده‌دِن گِچیَن و خودایا باریان تَزه یاشاییش یُلونی آچیپ بِردی. 21 ایندی خودایینگ خالقینا جُغاپکَر بِییک کاهینمیز باردیر. 22 شُنگا گُرَه-ده، تویس یورِکدِن و کَمیل اینامداقی ایمان بیلِن خودایا یاقینلاشایلینگ. مسیح قالبیمیزی اُز قانی بیلِن پَکلَپ و وِجدانیمیزی گونَه‌دِن آزاد اِتدی و بِدِنیمیزی آراسّا سو بیلِن یوودی. 23 ایندی ایقرار اِدِن اومیدیمیزی شِکلِنمَن قاییم ساقلایلینگ، چونکی واعدا بِرِن خودای اِمیندیر. 24 بیری-بیریمیزی سُیمَگه و یاخشی ایشلِر اِتمَگه هُوِسلِندیرمِک بارادا فیکرلِنِیلینگ. 25 کَبیر آداملارینگ عادات اِدیشی یالی، ییغنانیشماغیمیزی قُیمایلینگ. قایتام، عیسانینگ گِلجِک گونونینگ قُلایلاندیغینی بیلیپ، بیری-بیریمیزی خاص-دا گُوونلیک بِرِیلینگ. 26 اِگِر بیز حاقیقات بیلیمینی قابول اِدِنیمیزدِن سُنگرا بیلگِشیلجه گونَه اِتسِک، گونَه‌لِری باغیشلاماق اوچین ایندی قربانلیق یُقدور. 27 دینگه قاراشیلیان قُرقولی قیامات گونی و خودایینگ دوشمانلارینی یاقیپ-یاندیریجی اُد باردیر. 28 موسانینگ شِریغاتینی رِد اِدِن آدام ایکی یا-دا اوچ آدامینگ شاهاداتی بیلِن رِحمسیز اُلدوریلیَردی. 29 شِیله بُلسا، خودایینگ اُغلونی آیاق آشاغینا سالانا اُندان-دا آغیر جِزانینگ قاراشیاندیغینی گُز اُوونه گِتیریپ گُرونگ! مسیحینگ عَهد قانی بیلِن پَکلِنیپ، سُنگرا مونی نِجیس حاساپلایانینگ و مِرحِمِت روحونی بیحُرمات اِدیَنینگ حالی نَهیلی بُلار؟ 30 شِیله هِم بیز بو سُزلِری آیدان خودایی تانییاریس: «اِنتِقام مِنینگکیدیر، جِزالاندیرجاق مِندیرین»، شِیله هِم: «خودای اُز خالقینینگ اوستوندِن حُکوم چیقارار». 31 هاووا، دیری خودایینگ اِلینه دوشمِک قُرقولیدیر! 32 اُوالقی گونلِرینگیزی یادینگیزا سالینگ. شُندا سیز خودایدان نورلانیپ، عاذاپ و زَحمِتلِره جیداپدینگیز. 33 سیز بیر طارافدان، هِمّه‌لِرینگ اُوونده کیچِلتمِلِره و اِذیِتلِره سِزاوار اِدیلدینگیز، بِیلِکی بیر طارافدان، شِیله یاغدایا ساتاشانلارینگ دِردینی دِنگ چِکیشدینگیز. 34 زیندانداقیلارینگ-دا دِردلِرینی دِنگ چِکیشدینگیز، اُزونگیزده خاص قاوی هِم باقی بایلیغینگ باردیغینی بیلیپ، مال-مولکینگیزینگ آلینماغینی شاتلیق بیلِن قابول اِتدینگیز. 35 شُنونگ اوچین هِم، اینامینگیزی ییتیرمَنگ، مونونگ بایراغی اولودیر. 36 صابیر-طاقاتلی بُلوپ، خودایینگ اِراداسینی بِرجای اِدینگ، شُندا خودایینگ واعداسینا قاوشارسینگیز. 37 مُقادِّس یازغیلاردا شِیله یازیلاندیر: «یِنه آز سالیمدان شُل گِلجِک حُکمان گِلِر و اِگلِنمِز. 38 مِنینگ تاقوالی خالقیم ایمان بیلِن یاشار، اِگِر ایماندان دَنسه، اُندان راضی بُلمارین.» 39 بیز ایماندان دَنیپ، هِلَک بُلیان دَل-ده، ایمانیمیزا وِفالی بُلوپ، نِجات تاپیان آداملارداندیریس. |
© Turkmen Truth