عِبرانیلار 1 - مُقادِّس کیتاب

اُغول پِریشده‌لِردِن یُقاریدیر

¹ خودای قادیم زاماندا آتا-بابالاریمیزا پیغامبارلارینگ اوستو بیلِن کَن گِزِک و هِر هیلی یُل‍لار بیلِن کِپلِدی.‏

² اِمّا بو آخیرقی گونلِرده بُلسا اُل بیزه اُز اُغلونینگ اوستو بیلِن کِپلِدی.‏ اُغلونینگ اوستو بیلِن خودای عالِم-جاهانی یارادیپ، اُنی هِمّه زادینگ میراثچیسی اِدیپ بِلِّدی.‏

³ اُغول خودایینگ بِییکلیگینینگ یالقیمیدیر، اُنونگ کَمیل‌لیگینینگ صوراتیدیر.‏ اُل هِمّه عالِم-جاهانی قودراتلی سُزی بیلِن ساقلاپ، بیزی گونَه‌لِردِن پَکلَندِن سُنگ، عارشدا بِییک خودایینگ ساغیندا اُتوردی.‏

⁴ شِیلِلیکده، اُغلونینگ پِریشده‌لِردِن یُقاری بُلشی یالی، اُنگا بِرلِن آد پِریشده‌لِرینگکیدِن هِم یُقاری بُلدی.‏

⁵ اُندا خودای پِریشده‌لِرینگ هایسی بیرینه:‏ ‏«‏سِن مِنینگ اُغلومسینگ، بو گون مِن سانگا آتا بُلدوم»‏ یا-دا ‏«‏مِن اُنگا آتا، اُل بُلسا مانگا اُغول بُلار»‏ دییّپدیر؟

⁶ خودای یِکِجه اُغلونی دونیَه ایبِرِنده:‏ ‏«‏قُی، خودایینگ هِمّه پِریشده‌لِری اُنگا سِجده اِتسینلِر!‏»‏ دییدی.‏

⁷ خودای پِریشده‌لِر حاقدا:‏ ‏«‏مِن پِریشده‌لِریمی یِل‍لِر یالی اِدیَرین و خیدماتکَرلِریمی اُد-آلاولار یالی اِدیَرین»‏ دییَّر.‏

⁸ اِمّا اُغول حاقدا شِیله دییَّر:‏ ‏«‏اِی خودای، سِنینگ تاختینگ اِبِدیدیر.‏ پادیشاهلیق ‌عصانگ عادالاتلیق ‌عصاسیدیر.‏

⁹ سِن عادالاتی سُیوپ، تِلِکه‌لیگی ییگرِنیَرسینگ.‏ شُنونگ اوچین خودای، سِنینگ خودایینگ، سِنی دُستلارینگ ایچیندِن سِچیپ سایلادی، باشینگا شاتلیق یاغینی سویکِدی.‏»‏

¹⁰ اُغول حاقدا یِنه-ده شِیله دییَّر:‏ ‏«‏اِی تانگری، سِن باشلانان دُورونده یِرینگ بُنیادینی توتدونگ، آسمانلار هِم سِنینگ اِل‍لِرینگ ایشیدیر.‏

¹¹ اُلار یُق بُلار، اِمّا سِن بُلسا قالارسینگ، اُلار کُهنه کُینِک کیمین دارغاپ گیدِرلِر.‏

¹² سِن اُلاری دُن کیمین دویرلَرسینگ، تُزیپ گیدیَن لِباس کیمین اویتگَرلِر.‏ اِمّا سِن هیچ هاچان اویتگِمِرسینگ، آخیری یُقدور سِنینگ ییل‍لارینگ.‏»‏

¹³ خودای هایسی بیر پِریشدَه:‏ ‏«‏دوشمانلارینگی آیاق آشاغینا سالیانچام، مِنینگ ساغیمدا اُتور»‏ دییّپدیر؟

¹⁴ شِیلِلیکده، هِمّه پِریشده‌لِر دینگه نِجاتی میراث آلجاقلارا خیدمات اِتمِک اوچین ایبِریلِن خیدماتکَر روحلار دَلمی نَمه؟