غَلاطیه‌لِر 4 - مُقادِّس کیتاب1 مِن سیزه شونی هِم آیدایین: میراثدار هِمّه مولکَه اِیه بُلسا-دا، چاغالیق واقتیندا قولدان هیچ فارقی یُقدور. 2 اُل آتاسینینگ بِلَّن واقتینا چِنلی دُلاندیریانجینینگ و اِمین آداملارینگ ساقچیلیغیندا بُلیاندیر. 3 بیز هِم چاغا یالی بُلانیمیزدا، بو دونیَه‌نینگ اِساسی دِستورلارینینگ قولیسیدیق. 4 اِمّا بِلِّنیلِن واقت یِتیپ گِلِنده، خودای اُز اُغلونی ایبِردی. اُل آیالدان دُغلوپ، شِریغاتلیغیندا یاشادی. 5 بولارینگ باری شِریغاتینگ قولوسی بُلوپ یاشایانلارینگ آزاد بُلماغی اوچین، بیزینگ-ده اُغولّیغینگ هِمّه حاقلارینی آلیپ بیلمِگیمیز اوچین اِدیلدی. 6 سیز اُغولّیغا قابول اِدیلِنینگیز اوچین، خودای اُزونی «آبّا! آتام!» دییّپ چاغیریان اُغلونینگ روحونی بیزینگ یورِکلِریمیزه ایبِردی. 7 شونلوقدا مسیحینگ اوستو بیلِن سیز ایندی قول دَل-ده، خودایینگ اُغول‍لاریسینگیز. اُغول بُلانینگیز اوچین، خودای سیزی اُزونینگ میراثداری اِدیَندیر. پولس غَلاطیه‌لِری قایغی اِدیَر 8 سیز اُوال خودایی تانیمییاردینگیز. شُل زامان سیز یالان خودایلارینگ بِنده‌سیدینگیز. 9 ایندی بُلسا سیز خودایی تانییارسینگیز، دُغروسی خودایدا سیزی تانییاندیر. شوندان سُنگ سیز نَدیپ شُل اِجیز و بیدِرِک دِستورلارا دُلانیارسینگیز؟ یا-دا قایتادان اُلارینگ بِنده‌سی بُلماق ایسلِیَرسینگیزمی؟ 10 سیز دینی بایراملارا، یَعنی گونلِره، آیلارا، فَصل‍لارا و ییل‍لارا دیقّات بِریَرسینگیز آخیرین! 11 مِن سیز باباتدا اولی قایغی-دا قالیارین. اُندا مِنینگ زَحمِتیم بیدِرِک بُلیارمیقا؟ 12 اِی عزیزلِریم، یالباریارین: مِن یالی بُلونگ! سِبَبی مِن هِم سیز یالی بُلاندیرین. سیز مانگا هیچ ظولوم اِتمِدینگیز. 13 مِن سیزه اُزال-باشدا خوش خاباری ساغدَلکَم واغیظ اِدِندیگیم یادینگیزدادیر. 14 شُندا ساغسیزلیغیم سیزی قین یاغدایا سالسا-دا، سیز مِنی کیچِلتمِدینگیز و مِنی رِد هِم اِتمَندینگیز. تِرسینه، مِنی خودایینگ پِریشده‌سی یالی، عیسی مسیحینگ اِدیل اُزی یالی قابول اِدیپدینگیز. 15 ایندی اُل شاتلیغینگیزا نَمه بُلدی؟ مِنینگ اُزوم دیری شاهات آخیرین: سیز اِلینگیزدِن گِلسه، اُز گُزونگیزی هِم چیقاریپ، مانگا بِرجِکدینگیز-اَ ! 16 اُندا، مِن سیزه حاقیقاتی آیدیانلیغیم اوچین، ایندی دوشمانینگیزا دُلانایدیمّی؟ 17 کَبیر دُغان یالیلار بِد نییِتلِرینینگ ایزینا دوشوپ، سیزی بیزدِن آیریپ، اُز طارافلارینا چِکمَگه چالیشیارلار. اُلار یِکه اُزلِری باباتدا ایخلاصلی بُلماغینگیزی ایسلِیَرلِر. 18 یاخشیلیق اوچین یِکه مِن یانینگیزداقام دَل، اُندا هِمیشه ایخلاصلی بُلماق یاخشیدیر. 19 اِی عزیز بالالاریم! سیز تا عیسی مسیحینگ شِکلینه اِیه بُلیانچانگیز، مِن یِنه-ده سیزینگ اوچین دُغورما دِردلِرینی چِکیَن یالی بُلیارین. 20 واخ، اِدیل شو واقت سیزینگ یانینگیزدا بُلوپ، کِپلِشیگیمینگ سِسینی اویتگِتسِدیم! سِبَبی مِن سیز بارادا حایران قالیارین! هاجار و سارا 21 اِی شِریغاتا گُرَه یاشاماقچی بُلیانلار! مِن شونی سُراماقچی: اُندا سیز تُورات‌دا یازیلانی بیلمِیَنگیزمی؟ 22 تُورات‌دا ابراهیمینگ ایکی اُغلونینگ بُلاندیغی بارادا یازغیلیدیر. اُلارینگ بیری قیرناقدان، بِیلِکیسی بُلسا آزاد آیالینداندی. 23 قیرناقدان اُغلونینگ بُلماغی هِمیشه‌کی بیر زاتدی. اِمّا آزاد آیالیندان بُلان اُغلی بِرلِن واعدا گُرَه دُغلوپدی. 24 بو یِرده مِنگزِتمه باردیر. ایکی آیال ایکی عَهدینگ نیشانیدیر. بیر عَهد سینا داغیندا اِدیلیپ، هاجارا مِنگزِیَر. سِبَبی اُل بِنده چاغالاری دونیَه ایندیریَر. 25 هاجار عربستانداقی سینا داغینی بیلدیریپ، حَضیرکی اورشلیمه هِم مِنگزِیَر. سِبَبی اُل فِرزِنتلِری بیلِن بِنده‌چیلیکدِدیر. 26 اِمّا آسمانداقی اورشلیم آزاددیر. اُل بیزینگ اِنه‌میزدیر. 27 مُقادِّس یازغیلاردا: «شاتلان، اِی چاغا دُغورمادیق گُورِلی بُلمایان، دُغورما دِردی چِکمِدیک، بِگِنچدِن آیدیم آیت! چونکی تِرک اِدیلِن آیالینگ اُغول‍لاری اَرلی آیالینگ اُغول‍لاریندان کَن بُلار» دییّپ یازغیلیدیر. 28 اِی عزیزلِریم، ایندی سیز اسحاق یالی واعدا گُرَه دُغان اُغول‍لارسینگیز. 29 بِدِنه گُرَه دُغان اُغول خودایینگ روحونینگ گویجی بیلِن دُغلان اُغلا آزار بِریَردی. حَضیر هِم شِیلِدیر. 30 اِمّا مُقادِّس یازغیلار نَمه دییَّر؟ «قیرناقی اُغلی بیلِن بیله چیقاریپ کُو. قیرناقینگ اُغلی آزاد آیالدان دُغان اُغول بیلِن میراثی پایلاشماز.» 31 شونلوقدا، اِی عزیزلِریم، بیز قیرناقینگ فِرزِنتلِری دَل-ده، آزاد آیالینگ فِرزِنتلِریدیریس. |
© Turkmen Truth