غَلاطیه‌لِر 3 - مُقادِّس کیتابشِریغاتا دُلانمانگ! 1 اِی عاقیلسیز غَلاطیه‌لِر! سیزینگ گُزونگیزی کیم باغلادی؟ مِن سیزه خوش خاباری واغیظ اِدِنیمده، صلیبه چویلِنِن عیسی مسیحی اِدیل اُز گُزونگیز بیلِن گُریَن یالیدینگیز آخیرین! 2 مِن سیزدِن یِکه بیر زادی سُراماقچی: سیز مُقادِّس روحی شِریغاتی بِرجای اِدیپ آلدینگیزمی، یا-دا سیز مُقادِّس روحی اِشیدِن خوش خابارینگیزا ایمان گِتیرِنینگیز اوچین آلدینگیزمی؟ 3 سیز مُقادِّس روح بیلِن باشلاپ، ایندی-ده اُز اینسان گویجونگیز بیلِن کَمیل بُلجاق بُلیانگیزمی؟ اُندا سیز شِیله عاقیلسیزمی؟ 4 اُندا باشدان گِچیرِنلِرینگیزینگ باری بیدِرِک بُلایدیمیقا؟ واخ، اِلبِتّه بیدِرِک دَل! 5 خودای سیزه اُز روحونی بِریپ، آرانگیزدا کَن مُعجِزه‌لِری گُرکِزدی. اُل بولاری شِریغاتی بِرجای اِدِنینگیز اوچین دَل-ده، خوش خاباری اِشیدیپ، اُنگا ایناناندیغینگیز اوچین اِتدی. 6 گِلینگ، ابراهیمی یادا سالایلینگ: «ابراهیم خودایا ایمان گِتیردی و خودای اُنی تاقوالی حاساپلادی». 7 شُنگا گُرَه-ده، شونی بیلیپ قُیونگ: ایمان گِتیرِنلِر ابراهیمینگ حاقیقی نِسلیدیر. 8 خودای ابراهیما: «هِمّه خالقلار سِنینگ اوستونگ بیلِن بِرِکِتلِنِر» دییّپ، اُنگا اُزال-باشدا بوشلاپدی. مُقادِّس یازغیلارینگ شو سُزلِری خودایینگ خالقلاری ایمانلارینا گُرَه آقلاجاقدیغینی اَوَّلدِن خابار بِریپدی. 9 شونلوقدا، ایمان گِتیریَن هِر کِس ایمانا دایانسا ابراهیم بیلِن بیله بِرِکِتلِنیَندیر. 10 اِمّا هِمّه شِریغاتی بِرجای اِتمِلیدیپ فیکرلینیپ، اُنگا دایانیانلار لَعنِت آشاغیندادیر. چونکی: «بو شِریغات کیتابینی تامام یِرینه یِتیرمِدیک آداما، قُی، لَعنِت بُلسون!» دییّپ یازیلاندیر. 11 خودایینگ حوضوریندا هیچ کیم شِریغاتینگ اوستو بیلِن آقلانیپ بیلیَن دَلدیر. بو اَشکَر زات، سِبَبی «تاقوالی ایمان اوستو بیلِن یاشار» دییّپ یازیلاندیر. 12 شِریغاتی بِرجای اِتمِک بُلسا ایمانا باغلی دَلدیر. اِمّا «اُنی بِرجای اِدیَن، شُنونگ اوستو بیلِن-ده یاشار». 13 مسیح شِریغاتینگ اِعلان اِدِن لَعنِتینی اُز اوستونه آلیپ، بیزی شُل شِریغاتینگ لَعنِتدِن آزاد اِتدی. چونکی تُورات‌دا: «آغاچدان آسیلان هِر کِس لَعنِتلِنِندیر» دییّپ یازیلاندیر. 14 هاووا، عیسی مسیح اُزونینگ اوستو بیلِن بولارینگ بارینی ابراهیما بِرلِن بِرِکِتی یَهودی دَل‍لِره هِم یایراماغی اوچین، ایمانینگ اوستو بیلِن واعدا بِرلِن مُقادِّس روحی آلیپ بیلمِگیمیز اوچین اِتدی. شِریغات و خودایینگ واعداسی 15 اِی عزیزلِر! مِن هِر گوندَکی یاشاییشدان بیر میثال گِتیرِیین: اینسانلارینگ اُزآرا راضیلاشیپ باغلاشان عَهدینی هیچ کیم پُزوپ-دا، اُنگا زات قُشوپ-دا بیلمِیَر. 16 خودای ابراهیم بیلِن عَهد باغلاشدی. اُل بو عَهدی بِرجای اِتجِکدیگی بارادا ابراهیما و اُنونگ نِسلینه واعدا بِردی. مُقادِّس یازغیلاردا «سِنینگ نِسیل‍لِرینگه» دییّپ کَنلیک بارادا دَل-ده، «سِنینگ اِدیل اُز نِسلینگه» دییّپ، یِکِجه بیری بارادا واعدا بِرلِندیر، یَعنی عیسی مسیحدیر. 17 شِیلِلیکده، مِن سیزه شونی آیتماقچی: دُرت یوز اُتوز ییل گِچِندِن سُنگ بِرلِن شِریغات بو عَهدی پُزوپ-دا، خودایینگ واعداسینی یاتیریپ-دا بیلیَن دَلدیر. 18 میراث شِریغاتینَه گُرَه دَل-ده، واعداسینا گُرَه بِریلیَندیر. خودای بو میراثی ابراهیما هُدورلِدی. چونکی خودای اُنگا واعدا بِریپدی. 19 اُندا شِریغات نَمه گِرِک بُلدی؟ اُل گونَه‌نینگ نَمِدیگینی گُرکِزمِک اوچین اوستونه قُشوپ بِرلیپدی. شِریغات خودایینگ واعداسی و ابراهیمینگ نِسلی بُلان مسیح گِلیَنچَه حِرِکِت اِتدی. بو شِریغات پِریشده‌لِرینگ اوستو بیلِن تُوِلّاچی موسانینگ قاتناشماغیندا بِرلیپدی. 20 یِکِجه بیرینینگ بُلان یِرینده بُلسا تُوِلّاچی گِرِک بُلمایار. خودای هِم بُلسا یِکِجه‌دیر. 21 دییمِک، شِریغات خودایینگ واعداسینا تِرس چیقیار-دا؟ اِلبِتّه، یُق! یُنه شِریغات بیزه یاشاییش بِریپ بیلمِیَر آخیرین. مونگا گُرَه، اُنونگ اوستو بیلِن تاقوالیغی-دا قازانیپ بیلمِیَریس. 22 اِمّا مُقادِّس یازغیلارینگ اِعلان اِتمِگینه گُرَه، بیزینگ هِمَّه‌میز گونَه دانگیلاندیریس. خودای بُلسا بیزه واعدا بِرِنینی عیسی مسیحه ایمان گِتیریَنیمیز اوچین هُدورلِیَر. 23 بیز عیسی مسیحه ایمان گِتیرمِزدِن اُوال شِریغاتینگ بِنده‌سیدیک، گِلِجِکّی ایمان اَشکَر بُلیانچا، بو شِریغاتا دانگیلیدیق. 24 شونلوقدا، بیز ایمانینگ اوستو بیلِن تاقوالی بُلار یالی، مسیح گِلیَنچَه، شِریغات بیزینگ تِربیِتچیمیز بُلدی. 25 بیز ایندی عیسی مسیحه ایمان گِتیریَریس. شُنونگ اوچین-ده، بیز موندان بِیلَک شِریغات تِربیِتینینگ اِلینینگ آشاغیندا دَلدیریس. سیز خودایینگ میراثداریسینگیز 26 سیزینگ بارینگیز عیسی مسیحه باغلی بُلوپ، اُنگا بُلان ایمانینگیزینگ اوستو بیلِن خودایینگ فِرزِنتلِریسینگیز. 27 چونکی عیسی مسیحینگ آدی بیلِن تَعمید بِرلِن سیزینگ بارینگیز ایندی اُنگا شایلانانسینگیز. 28 ایندی نه یَهودی، نه-ده یونانی، نه قول، نه-ده آزاد آدام، نه اِرکِک، نه-ده آیال بار، چونکی سیزینگ بارینگیز عیسی مسیحده بیرسینگیز. 29 اِگِر سیز مسیحه باغلی بُلسانگیز، اُندا ابراهیمینگ نِسلیسینگیز و بِرلِن واعدا گُرَه میراثدارسینگیز. |
© Turkmen Truth