غَلاطیه‌لِر 2 - مُقادِّس کیتاب

پولس رِسول‍لار طارافیندان قابول اِدیلدی

¹ مِن اُن دُرت ییلدان سُنگ بارنابا بیلِن یِنه-ده اورشلیمه گیتدیم.‏ بو گِزِک تیتوسی-دا یانیما آلیپ گیتدیم.‏

² مِنی اُل یِره خودایینگ ایلهامی آلیپ باردی.‏ اورشلیمدَکی کِلیسانینگ یُلباشچیلاری بیلِن آیراتین دوشوشیپ، اُلارا یَهودی دَل‍لِره واغیظ اِدیَن خوش خاباریمی بِیان اِتدیم.‏ مِن مونی هِمّه اِدِنلِریمینگ باری پوچ بُلماسین دییّپ اِتدیم.‏

³ اُلار بُلسا یانیمداقی تیتوسی، حتّیٰ اُنونگ یونانیدیغینا-دا باقمازدان، اُنی سونِّتلِنمَگه مِجبور اِتمِدیلِر.‏

⁴ سونِّتلِنمه مِسِله‌سی کَبیر دُغان یالیلار اوچین یوزه چیقیپدی.‏ اُلار بیزی بِنده اِتمِک اوچین، آرامیزا اُغرینچا سوملوپ، عیسی مسیحینگ اوستو بیلِن آلان آزادلیغیمیزی اُغرینلیقدا گُزلِدیلِر.‏

⁵ اِمّا خوش خابارینگ حاقیقاتی سیزینگ بیلِن قالسین دییّپ، بیز بو دُغان یالیلارا بیر فُرصَت-دا هِم راضیلاشیق اِتمِدیک.‏

⁶ کِلیسانینگ یُلباشچیلاری مِنینگ واغیظ اِدیَن خوش خاباریما هیچ زات قُشمادیلار.‏ اُلار کیم بُلسالار-دا، مانگا فارقی یُق، سِبَبی خودای آدامینگ داشینی باقمایار!‏

⁷ اُندان باشغا کِلیسانینگ یُلباشچیلاری خوش خاباری یَهودیلِره واغیظ اِتمِکلیگینگ پِطرُسا بِرلیشی یالی، مانگا-دا یَهودی دَل‍لِره واغیظ اِتمِکلیگینگ بِرلِندیگینی گُردولِر.‏

⁸ اُلار یَهودیلِره رِسول‍لیق اِتمَگه پِطرُسی بِلَّن خودایینگ مِنی-ده یَهودی دَل‍لِره رِسول‍لیق اِتمَگه بِلَّندیگینه،

⁹ مانگا مِرحِمِت بِرلِندیگینه گُروپ بیلدیلِر.‏ اُنسُنگ کِلیسانینگ سوتونلِری حاساپلانیان یعقوب، پِطرُس و یوحنا مانگا و بارنابا دُغانلیغینگ نیشانی حُکمونده اِل‍لِرینی اوزاتدیلار.‏ مِن بارنابا بیلِن یَهودی دَل‍لِرینگ آراسینا، اُلار هِم یَهودیلِرینگ آراسینا گیتمِلی دییّپ، اُزآرا راضیلاشدیق.‏

¹⁰ یُنه اُلار مَحتَجلیک چِکیَن دُغانلاری یاددان چیقارمان، اُلارا کُمِک اِتمِگیمیزی خاییش اِتدیلِر.‏ مِن هِم مونی بِرجای اِتمِک اوچین اِلیمده بارینی قایغیرمادیم.‏

پولس انطاکیه‌ده پِطرُسینگ یالنگیشینی بِجِریَر

¹¹ پِطرُس انطاکیَه گِلِنده، اُنونگ اِدِن یالنگیشینی آچیقچا یوزونه آیدیپ، اُنگا تِرس چیقدیم.‏

¹² پِطرُس یعقوبینگ ایبِرِن آداملاری گِلمِزدِن اُزال، یَهودی دَل‍لِر بیلِن بیر ساچاق باشیندا اییّپ-ایچیَردی.‏ اِمّا شُل آداملار گِلِنده، پِطرُس سونِّتلِنمِگینینگ طارافدارلاریندان قُرقوپ، یَهودی دَل‍لِردِن آیریلشیپ، اُلار بیلِن قاتناشیغی کِسدی.‏

¹³ اُنونگ بیلِن بیرلیکده بِیلِکی یَهودیلِر هِم ایکی‌یوزلیک اِتدیلِر، حتّیٰ بارنابا هِم اُلارینگ ایکی‌یوزلیلیگیندِن یانگا دُغری یُلدان آزاشدی.‏

¹⁴ مِن اُلارینگ اِدیَن حِرِکِتلِرینینگ خوش خابارینگ حاقیقاتینا لاییق دَلدیگینی گُردوم.‏ شُندا مِن هِمّه‌لِرینگ اُوونده پِطرُسینگ یوزونه گِلیپ، شِیله دییدیم:‏ ‏«‏سِن یَهودی بُلسانگ-دا، یَهودیلِر یالی یاشامایارسینگ.‏ سِن یَهودی دَل‍لِر یالی یاشایارسینگ.‏ اُنسُنگ سِن نَمه اوچین یَهودی دَل‍لِری یَهودیلِر یالی یاشاماغا مِجبور اِدیَرسینگ؟»‏

¹⁵ بیز آصلیمیزا گُرَه یَهودیدیریس، گونَه‌لی حاساپلانیان یَهودی دَل‍لِردِن دَلدیریس.‏

¹⁶ آدام شِریغاتی بِرجای اِتمِگینگ اوستو بیلِن دَل-ده، دینگه عیسی مسیحه بُلان ایمانینینگ اوستو بیلِن آقلانیاندیر.‏ مونی حتّیٰ بیز هِم بیلیَریس.‏ شُنگا گُرَه-ده، بیز شِریغاتی بِرجای اِتمِگینگ اوستو بیلِن دَل-ده، عیسی مسیحه بُلان ایمانیمیزینگ اوستو بیلِن آقلانماق اوچین، اُنگا ایمان گِتیردیک.‏ چونکی شِریغاتی بِرجای اِتمِگینگ اوستو بیلِن هیچ کیم آقلانیان دَلدیر.‏

¹⁷ شِریغات بیزی، یَعنی مسیحینگ اوستو بیلِن آقلانماقچی بُلیانلاری هِم گونَه‌لی چیقاریار.‏ اُندا مسیح گونَه‌نی قُلّایارمی؟ یُق، بو دویبوندِن بِیله دَل!‏

¹⁸ مِن شِریغاتچیلیق بیناسینی ییقدیم.‏ ایندی اُنی قایتادان دیکِلتسِم، اُندا شِریغاتی پُزیاندیغیمی اُزوم تاصدیقلایارین.‏

¹⁹ شِریغاتینگ اُزی مِنی اُلومه مَحکوم اِتدی.‏ شُنگا گُرَه-ده، مِن شِریغات اوچین اُلی بُلوپ، ایندی خودای اوچین یاشایاندیرین.‏

²⁰ مِن مسیح بیلِن صلیبه چویلِندیم، ایندی مِن دَل-ده، مِندَکی مسیح یاشایاندیر.‏ بِدِندَکی یاشایشیم بُلسا خودایینگ اُغلونا بُلان ایمانیمینگ اوستو بیلِندیر.‏ اُل مِنی سُیوپ، اُزونی مِنینگ اوچین قربانی اِتدی.‏

²¹ مِن خودایینگ مِرحِمِتینی اینکَر اِتمِیَرین.‏ چونکی شِریغاتی بِرجای اِتمِگینگ اوستو بیلِن آقلانیپ بُلیان بُلسادی، اُندا مسیحینگ اُلومی بیدِرِک بُلاردی.‏