غَلاطیه‌لِر 1 - مُقادِّس کیتاب1-2 مِن، رِسول پولس و یانیمداقی دُغانلاریمینگ هِمّه‌سی غَلاطیه‌دَکی کِلیسالارینا شو نامه بیلِن دُغایی سالام ایبِریَریس. مِنی رِسولّیغا اینسانلار دَل-ده، عیسی مسیح و اُنی اُلومدِن دیرِلدِن آتا خودای بِلِّدی. 3 آتامیز خودای و تانگریمیز عیسی مسیحینگ مِرحِمِتی و پاراحاتلیغی، قُی، سیزه بُلسون. 4 آتامیز خودای اِراداسینا گُرَه، عیسی مسیح بیزی شو بِتِرلییَن اِییَمدِن آزاد اِتمِکچی بُلوپ، گونَه‌لِریمیز اوچین اُز جانینی بِردی. 5 خودایا اِبِدیلیک جِلال بُلسون! اَمین! باشغا بیر خوش خابار یُقدیر 6 مِن عیسی مسیحینگ مِرحِمِتی بیلِن سیزی چاغیران خودایدان بِیله تیز دَنیپ، باشغا بیر خوش خاباری قابول اِدیشینگیزه خاص حایران قالیارین. 7 باشغا بیر خوش خابار یُقدور. یُنه کَبیر آداملار سیزی بولاشدیریپ، مسیحینگ خوش خابارینی چالیشدیرجاق بُلیارلار. 8 اِمّا حتّیٰ بیز یا-دا آسماندان دوشِن بیر پِریشده سیزه اُنگ واغیظ اِدِن خوش خابارمیزدان باشغا بیر خوش خاباری واغیظ اِتسه، قُی، لَعنِتلی بُلسون! 9 بیزینگ سیزه اُزال آیدانلاریمیزی مِن یِنه-ده قایتالایارین: کیمدیر بیری سیزه اُزال قابول اِدِن خوش خابارنگیزدان باشغاسینی واغیظ اِتسه، قُی، لَعنِتلی بُلسون! پولسینگ رِسولّیغا چاغیریلماغی 10 شونلوقدا، مِن کیمینگ ایسلِگینه گُرَه بُلیارین: آداملارینگمی یا-دا خودایینگ؟ اُندا مِن آداملارا قاوی گُرونجِک بُلیارینمی؟ اِگِر مِن آداملارا قاوی گُرونجِک بُلسادیم، اُندا مسیحینگ خیدماتچیسی بُلمازدیم. 11 اِی عزیزلِر، سیزینگ شونی بیلمِگینگیزی ایسلِیَرین: مِنینگ واغیظ اِدِن خوش خاباریم اینساندان دَلدیر. 12 مِن اُنی اینساندان قابول اِتمِدیم یا-دا اُورِنمِدیم. مانگا اُنی عیسی مسیحینگ اِدیل اُزی آیان اِتدی. 13 سیز مِنینگ یَهودیلِرینگ دینیندِکَم یاشان زامانیم بارادا اِشیدِنسینگیز: مِن خودایینگ کِلیسالارینی گویچلی آزار بِریپ، اُلاری یُق اِتمِکچیدیم. 14 مِن یَهودی دِنگ-دوشلاریمینگ کَنسیندِن و یَهودیلِرینگ دینینده خاص اُسوپدوم. آتا-بابالاریمیزینگ سونِّتلِرینی ساقلاماقدا خاص ایخلاصلیدیم. 15-16 اِمّا خودای مِرحِمِت اِدیپ، مِنی اِنه‌دِن دُغماقام سایلاپ چاغیردی. اُل خوش خاباری بیگانه میلِّتلِره واغیظ اِتمِگیم اوچین، مانگا اُز اُغلونی اَشکَر اِتمِگی دُغری بیلدی. شُندا مِن هیچ کیمه ماصلاحاتلاشمادیم 17 یا-دا مِندِن اُوال رِسول بُلانلاری گُرمِک اوچین حتّیٰ اورشلیمه-ده گیتمِدیم. مِن قایتام عربستانا گیتدیم، سُنگرا یِنه دمشقه دُلاندیم. 18 شُندان اوچ ییل سُنگ پِطرُس بیلِن تانیشماق اوچین اورشلیمه گیدیپ، اُنونگ بیلِن اُن-بَش گون بُلدوم. 19 شُندا مِن اُل یِرده تانگریمیز عیسانینگ اینیسی یعقوبدان باشغا رِسول‍لارینگ هیچ بیرینی گُرمِدیم. 20 سیزه یازیانلاریمینگ باری حاقیقاتدیغی بارادا مِن خودایینگ حوضوریندا شاهات بُلیارین. 21 سُنگرا مِن سوریه و کیلیکیه اِطرافلارینا گیتدیم. 22 عیسی مسیحینگ یهودیه یوردونداقی کِلیسالاری مِنینگ اُزوم بیلِن هِنیز تانیش دَلدیلِر. 23 اُلار مِن بارادا: «بیر واقتلار بیزی آزار بِریپ، یُق اِتمِکچی بُلان ایمانینی ایندی اُزی واغیظ اِدیَر» دییِن خاباری اِشیدیپدیلِر. 24 و اُلار خودایی مِنده گُروپ، خودایا اُوگی آیتدیلار. |
© Turkmen Truth