اِفِسُسلار 5 - مُقادِّس کیتاب1 شِیله هِم سیز سُیگولی فِرزِنتلِر کیمین خودایدان نِمونه آلینگ. 2 مسیح یالی سُیوپ یاشانگ. اُل بیزی سُیوپ، خودایا ایسلی عاطیر و هِم قربانلیق حُکمونده بیزینگ اوچین جانینی قربان اِتدی. 3 اِمّا سیزینگ آرانگیزدا زیناکَرلیک، آخلاقسیزلیق، حِریصچیلیک اِدیَن بُلماسین. بِیله زاتلار مُقادِّسلِره گِلیشمِیَر. 4 شِیله هِم آرانگیزدا بی‌اِدِبلیک، بُش سُزلیک، بیدِرِک دِگیشمه-ده بُلماسین. بولار سیزه یاراشمایار. مونونگ دِرِگینه خودایا شوکور اِدینگ. 5 شونی بیلیپ قُیونگ: هیچ بیر زیناکَرینگ، آخلاقسیزینگ یا-دا حِریصچینینگ مسیحینگ و خودایینگ پادیشاهلیغیندا میراثی یُقدور. چونکی شِیله آداملار بُت‌پَرَستلِر بیلِن دِس-دِنگدیر 6 هیچ کیم سیزی بُش سُزلِر بیلِن آلداماسین. شو زاتلار سِبَپلی خودایینگ غاضابی اُزونه موطیع‌سیزلارینگ اوستوندِن اینیَندیر. 7 شُنونگ اوچین اُلار یالیلار بیلِن شِریک بُلمانگ. 8 یادینگیزدامی، بیر واقتلار سیز قارانگقیدینگیز، یُنه ایندی مسیحینگ اوستو بیلِن نورسینگیز. شُنونگ اوچین نورینگ فِرزِنتلِری یالی بُلوپ یاشانگ. 9 دُغرودان هِم، نورینگ میوه‌سی هِر هیلی یاخشیلیقدان، تاقوالیقدان و حاقیقاتدان عیباراتدیر. 10 مسیحی خُشنود اِتجِک زادی بیلمَگه چالیشینگ. 11 قارانگقیلیغینگ پِیداسیز ایشلِرینه شِریک بُلمانگ، تِرسینه، اُلاری فاش اِدینگ. 12 اُلارینگ اِدیَن اُغرین ایشلِری حاقدا حتّیٰ دیله گِتیرمِک-ده عاییپدیر. 13 اِمّا نور پارلاندا، هِمّه زات فاش اِدیلیپ، اَشکَر گُرنِر. 14 چونکی نور هِمّه زادی اَشکَر اِدیَندیر. شُنونگ اوچین شِیله دییّلیَر: «اُیان، اِی اوقا گیدِن! اُلومدِن آیاغا قال! مسیح سانگا نور سِچِر.» 15 شِیلِلیکده، نَهیلی یاشایاندیغینگیزا هِیوِره خاباردار بُلونگ. نادانلار یالی دَل-ده، دانالار یالی یاشانگ. 16 هِر بیر فُرصَتدان گِرِکلی نِتیجه چیقارینگ، سِبَبی بو تِلِکه زاماندیر. 17 شُنونگ اوچین-ده نادان بُلمان، قایتام، مسیحینگ اِراداسینینگ نَمِدیگینه دوشونینگ. 18 شِرابدان سِرخُش بُلمانگ، بو سیزی هِرزِلیگه چِکِر. تِرسینه، مُقادِّس روحدان دُلوپ-آقینگ. 19 بیلِلیکده مِزمورلار، ناغمالار و روحانی آیدیملار آیدینگ. مسیحه تویس یورِکدِن سازلار چالیپ، قُشغیلار آیدینگ. 20 هِمّه زات اوچین تانگریمیز عیسی مسیحینگ آدیندان آتا خودایا هِمیشه شوکور اِدینگ. اَر-آیال قاتناشیغی 21 عیسی مسیحه حُرمات قُیماق بیلِن بیری-بیرینگیزه موطیع بُلونگ. 22 اِی آیال‍لار، مسیحه موطیع بُلشونگیز یالی، اَرینگیزه هِم موطیع بُلونگ. 23 چونکی مسیح بِدِنینگ نِجات بِریَنچیسی بُلوپ و کِلیسانینگ باشی بُلشی یالی، اَر هِم آیالینگ باشیدیر. 24 شُنونگ اوچین کِلیسانینگ مسیحه موطیع بُلشی یالی، آیال‍لار-دا هِر زاتدا اُز اَرینه موطیع بُلسونلار. 25-26 اِی اَرلِر، مسیحینگ کِلیسانی سُیشی یالی، سیز هِم اُز آیالینگیزی سُیونگ. چونکی مسیح کِلیسانی سو بیلِن یوووپ، خودایینگ سُزی بیلِن پَکلَپ، اُنی مُقادِّس اِتمِک اوچین، جانینی قربان اِتدی. 27 اُل مونی اُز حوضورینا کیرلی، ییغریق یا-دا کِم دَل-ده، بِییکلیکدَه مُقادِّس هِم عایپسیز بیر یاغتی کِلیسانی گِتیرمِک اوچین اِتدی. 28 اِدیل شو یُلدا اَرلِر-ده آیالینی اُز بِدِنلِرینی سُیوشلِری یالی سُیمِلیدیرلِر. آیالینی سُییَن اُزونی سُییَندیر. 29 اِلبِتّه، هیچ کیم هیچ هاچان اُز بِدِنیندِن ییگرِنیَن دَلدیر. قایتام، اِدیل مسیحینگ کِلیسا دیقّات اِدیشی یالی، اُنی اییمیتلِندیریپ، قایغیسینی اِدیَندیر. 30 سِبَبی بیز مسیحینگ بِدِنینینگ بُلوملِریدیریس. 31 مُقادِّس یازغیلاردا شِیله: «شُل سِبَپدِن هِم اِرکِک اِنه-آتاسینی تِرک اِدیپ، آیالی بیلِن بیریگیَر و اُلارینگ ایکیسی بیر تِن بُلیار». 32 بو سیر قاتی اولودیر، یُنه مِن موندا مسیح و کِلیسا بارادا گورّونگ اِدیَرین. 33 شونلوقدا، هِر بیرینگیز آیالینگیزی اُزونگیزی سُیشونگیز یالی سُیونگ و آیال هِم اَرینه حُرمات قُیسون. |
© Turkmen Truth