کولُسیلِر 3 - مُقادِّس کیتابمسیحده مُقادِّس یاشاییش 1 شِیلِلیکده، مسیح بیلِن دیرِلِندیگینگیزه گُرَه، آسمانداقی زاتلاری آغتارینگ. مسیح آسماندا خودایینگ ساغیندا اُتوراندیر. 2 فیکرینگیزی دونیِوی زاتلارا دَل-ده، آسمانداقی زاتلارا اوغراتدیرینگ. 3 چونکی سیز اُلِنسینگیز، یاشاییشینگیز بُلسا مسیح بیلِن بیله خودایدا گوزگِنِندیر. 4 مسیح سیزینگ یاشاییشینگیزدیر. اُل آیان بُلاندا، سیز هِم اُنونگ بیلِن بیله بِییکلیکدَه آیان بُلارسینگیز. 5 شُنونگ اوچین هِم دونیِوی طِبیغاتینگیزا دِگیشلی بُلان آزماغی، زیناکَرلیگی، پَکسیزلیگی، حارام کِیپی، تِلِکه هُوِسلِری و بُت‌پَرَستلیک بیلِن دِنگ حاساپلانیان حِریصچیلیگی اُلدورینگ. 6 اینه، اِدیل شو زاتلار اوچین خودایینگ قاهار-غاضابی موطیع‌سیزلارینگ اوستونه اینیَندیر. 7 سیز هِم بیرواقتلار بولارینگ آراسیندا یاشانینگیزدا شِیله اِدیپدینگیز. 8 ایندی بُلسا قاهار-غاضابی، یامانلیقلارینگ هِمّه‌سینی اُزونگیزدِن آیریپ تِرک اِدینگ. آغزینگیزدان هیچ بیر تُهمِت و تِلِکه سُزلِر چیقماسین. 9 بیری-بیرینگیزه یالان آیتمانگ، سِبَبی سیز اُوالقی کُهنه یارادیلیشینگیزی کُهنه عاداتلاری بیلِن بیرلیکده چیقاریپ زینگدینگیز. 10 ایندی یارادانینگ صوراتینا مِنگزِمِکده و اُنی کَمیل تانیماقدا تَزه یارادیلیشا گِیینینگ. 11 بو یارادیلیشدا یَهودی بیلِن یونانی، سونِّت بُلان و سونِّت بُلمادیق، نادان بیلِن ظالیمینگ، قول بیلِن آزادینگ آراسیندا هیچ بیر فارق یُقدور، اِمّا مسیح هِمّه زاتدیر و هِمّه زاتدادیر. 12 شُنونگ اوچین هِم، اِی خودایینگ سایلان مُقادِّس هِم عزیز خالقی! رِحم-شِپاقات، مِهرِبانلیق، فُروتَنلیک، میلاییملیق و صابیر-طاقاتلیق بیلِن گِیینینگ. 13 بیری-بیرینگیزه صابیرلیق بیلِن جیدانگ. آرانگیزدا اُیکه-کینه بار بُلسا، بیری-بیرینگیزی باغیشلانگ. مسیحینگ سیزی باغیشلایشی یالی، سیز هِم باغیشلانگ. 14 بولارینگ هِمّه‌سینینگ اوستونه-ده هِمّه زادی کَمیل بیرلیگی باغلانیشدیریان سُیگَه گِیینینگ. 15 قالبینگیزدا مسیحینگ پاراحاتلیغی حُکوم سورسون. چونکی سیز بیر بِدِنینگ اعضالاری بُلوپ، بو پاراحاتچیلیغا چاغیریلانسینگیز و شوکورلی بُلونگ. 16 قُی، مسیحینگ سُزی قالبینگیزینگ دویبونده یِرلِشسین. بار حِکمِت بیلِن بیری-بیرینگیزه تَعلیم و ناصیحات بِرینگ. مِزمورلار، اُوگی آیدیملار، روحانی ناغمالار آیدیپ، خودایا یورِکدِن مینِّتدارلیق بیلدیرینگ. 17 نَمه اِتسِنگیز هِم، آیتسانگیز هِم، هِمّه‌سینی تانگریمیز عیسانینگ آدی بیلِن یِرینه یِتیرینگ، اُنونگ اوستو بیلِن آتا خودایا شوکور اِدینگ. مسیحی ماشغالا و قاتناشیقلاری 18 اِی آیال‍لار، اَرینگیزه موطیع بُلونگ، چونکی شِیله اِتمِک مسیحه باغلی آداملارا یاراشیاندیر. 19 اِی اَرلِر، آیالینگیزی سُیونگ، اُلارا غاضاب اِتمَنگ. 20 اِی فِرزِنتلِر، هِر ایشده اِنه-آتانگیزینگ سُزونه قولاق آسینگ، سِبَبی بو مسیحی خُشنود اِدیَر. 21 اِی آتالار، فِرزِنتلِرینگیزی اینجاتمانگ، بیردِن اُلارینگ یورِکلِری ساوییاماسین. 22 اِی قول‍لار، هِمّه زاتدا یِردَکی آقانگیزا موطیع بُلونگ. مونی اینسانلارا قاوی گُرونمِک اوچین و حالاماق ایشلِر بیلِن دَل-ده، قایتام مسیحدِن قُرقماق بیلِن تویس یورِکدِن یِرینه یِتیرینگ. 23 نَمه اِتسِنگیز، اینسانلار اوچین دَل-ده، مسیح اوچین اِدیَن یالی، تویس یورِکدِن یِرینه یِتیرینگ. 24 مونونگ اوچین مسیحدِن میراث بایراغینی آلجاغینگیزی بیلیَنسینگیز. سیز تانگری مسیحه خیدمات اِدیَنسینگیز. 25 کیم یامانلیق اِتسه، اُز اِدِن یامانلیغینینگ جُغابینی آلار، خودای هیچ کیمه طارافدارلیق اِدیَن دَلدیر. |
© Turkmen Truth