کولُسیلِر 2 - مُقادِّس کیتاب1 مِن سیزینگ اوچین و لائودیکیه‌دَکی ایماندارلارینگ، شِیله-ده مِنی اُوال آصلا گُرمِدیکلِرینگ هِمّه‌سی اوچین نَهیلی قایراتلی زَحمِت چِکیَندیگیمی بیلمِگینگیزی ایسلِیَرین. 2 مِن اُلارینگ قالبینینگ قوواتلانیپ، سُیگوده بیرلِشمِکلِرینی دیلِیَرین. شِیدیپ، اُلار کَمیل ایناما هِم بایلیق دوشونجَه اِیه بُلوپ، خودایینگ سیرینی، یَعنی مسیحی تانیسینلار. 3 چونکی حِکمِتینگ هِم عیلیمینگ هِمّه خازیناسی مسیحده گوزگِنِندیر. 4 مونی هیچ کیم سیزی سویجی سُزلِر بیلِن آلداماسین دییّپ آیدیارین. 5 سِبَبی مِن آرانگیزدا بُلماسام-دا، یورِگیم سیزینگ بیلِندیرین. سیزینگ تِرتیب-دوزگونلیدیگینگیزی و مسیحه بُلان قاییم ایمانینگیزی گُروپ شاتلانیارین. مسیحده یاشاماق 6 شِیلِلیکده، عیسی مسیحی تانگرینگیز حُکمونده قابول اِدیشینگیز یالی، اُنونگ گُرکِزِن یُلی بیلِن یُرینگ. 7 شوکورلِر بیلِن دُلوپ-آقیپ، مسیحده کُک اورونگ و اُسونگ، اُزونگیزه اُورِدیلیشی یالی، ایماندا قاییم دورونگ. 8 خاباردار بُلونگ! هیچ کیم سیزی بُش هِم یالان فِلسِفه‌لِر بیلِن اِسیر اِدَیمِسین، سِبَبی بِیله کِپلِر مسیحه دَل-ده، اینسان سونِّتلِرینه و فانی دونیَه‌نینگ قالان دِستورلارینا اِساسلانیاندیر. 9 چونکی خودایینگ کَمیلّیگی بیر بِدِن کیمین مسیحده یاشایار. 10 سیز هِم هِر بیر گویجونگ و ایختییارلیغینگ باشی بُلان مسیحده کِمالّیغا قاووشدینگیز. 11 سیز اُنونگ و بیرلِشمِگینگ اوستو بیلِن سونِّت هِم اِدیلدینگیز. بو بِدِن سونِّتی دَل-ده، مسیحینگ اوستو بیلِن اِدیلِن سونِّت بُلوپ، اُوالقی طِبیغاتینگیزینگ چیقاریپ اُقلانماغیدیر. 12 سیز تَعمیدده مسیح بیلِن بیله گُمیلدینگیز و اُنی اُلومدِن دیرِلدِن خودایینگ قودراتینا ایمان گِتیریپ، مسیح بیلِن بیرلیکده دیرِلدینگیز. 13 اُوال سیز سونِّتسیز بُلان اُوالقی طِبیغاتینگیزدا گونَه‌لِرینگیزده اُلودینگیز. ایندی بُلسا خودای هِمّه گونَه‌لِرینگیزی باغیشلاپ، سیزی مسیح بیلِن بیله دیرِلتدی. 14 اُل بیزه قارشی یازیلان بِرگیلیک یازغیسینی باطیل اِتدی و اُنی صلیبه چویلَپ، آرادان آییردی. 15 حُکومدارلارینگ و ایختییارلیلارینگ اِلیندِن یاراغینی آلدی و اُلاری صلیبینگ اوستو بیلِن یِنگیپ، هِمّه‌لِرینگ یانیندا بی‌آبرای اِتدی. 16 شُنونگ اوچین قُیمانگ هیچ کیم سیزی اییمیت و ایچگی یا دینی بایرام، تَزه آی یا-دا سَبَّت گونی حاقدا مَحکوم اِتسین. 17 بولار گِلجِکّی زاتلارینگ کُلِگه‌سیدی، اِمّا حاقیقات مسیحینگ اُزونده تاپیلیار. 18 قُیمانگ اُزونی یالاندان فُروتَن بیلیَن و پِریشده‌لِره سِجده اِدیَن آدام سیزی خودایینگ سیلاغیندان ماحروم اِتسین. شِیله آدام گُرِن گُرنوشلِرینه قابارلانیاندیر، اِمّا بو بُش یِره پانگقاریان اینسان اُز فیکرینی آیتماقدیر. 19 شِیدیپ، اُل آدام بِدِنینگ باشی بُلان مسیح بیلِن باغلانیشیغینی ییتیرِندیر. بو بِدِن هِر بیر بُغونونگ و بِندینگ کُمِگی بیلِن بیریگیپ، باشدان اییمیتلِنیَر و خودایینگ بِرِن اُسوشی بیلِن اُسیَندیر. 20-21 سیز مسیح بیلِن اُلوپ، بو فانی دونیَه‌نینگ قالان دِستورلاریندان آزاد بُلدونگیز. اُندا نَمه اوچین هِنیزِم بو دونیَه باغلی یالی، «مونی داتما»، «مونی اییمه»، «مونگا اِل دِگیرمه» دییِن اینسان عاداتلارینینگ ایزینا دوشیَرسینگیز؟ 22 بو تِرتیب هِمّه‌سی قولّاندیغچا یُق بُلوپ گیدِر، سِبَبی اُلار اینسان دِستورلارینا و تَعلیماتلارینا اِساسلانیاندیر. 23 اِلبِتّه، بو عاداتلار یالان دیندارلیقدا، فُروتَن بُلماقدا، بِدِنه اِذیِت چِکدیرمِکده حِکمِت یالی گُرونیَندیر، اِمّا بولار اینسانینگ تِلِکه نییِتینینگ اُوونَه گِچمِکده هیچ بیر پِیداسی یُقدور. |
© Turkmen Truth