رِسول‍لار 27 - مُقادِّس کیتابپولس کِشتیلی روما اَکیدیلیَر 1 بیزی دِریانینگ اوستو بیلِن ایتالیا ایبِرمِگی قارار اِتدیلِر. شُندا پولس بیلِن یِنه-ده بیرنَچه زیندانینی ایمپِراطُر قُشونینداقی یولیوس دییِن اَفسَره تابشیردیلار. 2 بیزینگ هِمَّه‌میز آدرامیتینوس شَهریندِن گِلِن کِشتیَه مینیپ، آسیا وِلایاتینینگ کِنارینا طاراف یُلا دوشدوک. یانیمیزدا تِسالونیکیدِن گِلِن مَقدونیه‌لی آریستارخوس هِم باردی. 3 اِرتیسی گون صیدون شَهرینه گِلیپ یِتدیک. یولیوس پولس بیلِن میلاییم بُلدی، شُنونگ اوچین اُنگا دُستلارینینگ یانینا بارماغا و گِرِکلی زاتلارینی آلماغا اِجازا بِردی. 4 اُل یِردِن یِنه دِریانینگ اوستو بیلِن گیتدیک. یِل قارشیمیزدان اُسیَن اوچین قِپرِس جِزیره‌سینینگ طارافیندان پِناه توتوپ، گِچدیک. 5 کیلیکیه و پامفیلیه‌نینگ قارشیسینداقی دِریادان گِچیپ، لیکیه‌نینگ میرا شَهرینه گِلدیک. 6 اَفسَر شُل یِرده ایتالیا گیتجِک بُلوپ دوران اسکندریه‌لی کِشتینی تاپدی و بیزی اُنگا میندیردی. 7 بیز اِنچِمه گونلَپ یوواش گیدیپ، قینچیلیق بارینی گُروپ، کنیدوس شَهرینه یِتدیک. یِل بیزه قارشی اُسیَندیگی اوچین، سالمونینگ شَهرینگ یانیندان گِچیپ، کریت جِزیره‌سینی پِناه گِتیریپ گیتدیک. 8 کِنارا قُلای گیدیپ، اولی قینچیلیق بیلِن «گُزِل بِندِرلِر» دییِن یِره گِلدیک. بو یِر لاسایه شَهرینه قُلای یِرلِشیَردی. 9 بیز کَن واقتیمیزی قاچیردیق. ایندی دِریادا گیتمِک اوچین هُوا خاص خاطارلی، سِبَبی گویز آخیرلاپ باریاردی. پولس اُلارا ماصلاحات بِریپ: 10 «اِی آداملار! گُریَن کیمین، ایندی دِریادان گیتسِک، دینگه بیر یوکومیز، کِشتیمیز دَل، اُندا جانیمیز هِم خاطار آشاغیندا قالار، آغیر بِدباختچیلیغا دوشِریس» دییدی. 11 اِمّا اَفسَر پولسینگ ماصلاحاتینا قولاق آسمان، کاپیتان بیلِن کِشتی اِیه‌سینینگ کِپینه ایناندی. 12 یُنه بِندِرده قیشلاماغا هیچ هیلی قاوی بُلمانسُنگ، آداملارینگ کَنسی، باشارتسا، بو یِردِن فینیکسه یِتیپ، قیشی اُل یِرده گِچیرمِگی قارار اِتدیلِر. فینیکس کریت جِزیره‌ده یِرلِشیپ، ایلِری-آشاق و قایرا-آشاق طارافدان اُسیَن یِل‍لِردِن پِناه‌دادی. دِریاداقی طوفان 13 شِیلِلیکده، ایلِری یِلی یوواشچا اُسمَگه باشلاندا، اُلار اُز ماقصاتلارینا یِتِندیریس دییّپ گومَن اِتدیلِر. شُنونگ اوچین لِنگِری چِکدیلِر-ده، کریت جِزیره‌نینگ قُلایی بیلِن یُلا دوشدولِر. 14 اِمّا کَن واقت گِچمَنکَه، جِزیره طارافدان «قایرا-یُقاری» دییّلیَن گویچلی طوفان توردی. 15 طوفان کِشتیَه اورلوپ، نِتیجه‌ده، کِشتی یِلینگ قارشیسینا گیدیپ بیلمِدی. شوندان سُنگ اُزومیزی مُوجلِره تابشیریپ، یِلینگ اوغرونا گیتدیک. 16 بیز کُودا دییِن بیر کیچیجیک جِزیره‌نی پِناه توتوپ گِچدیک. کِشتینینگ کیچی قاییقینی زُردان ساقلاپ قالدیق. 17 دِریاچیلار قاییقی یُقاری چِکیپ آلدیلار و کِشتی پیتراپ گیتمِسین دییّپ، داشیندان طاناپ بیلِن قاییم باغلادیلار. اُلار سیرتیسینگ چَگِلی سِبَبینه گُرَه باتماقدان قُرقوپ، کِشتینینگ حِرِکِتینی کِمِلتمِک اوچین یِلکِنی آشاق دوشوردیلِر. شِیدیپ، کِشتینی یِلینگ اوغرونا گُیبِردیلِر. 18 بیز طوفاندان یانگا ایکییانا چایقانیاردیق. اِرتیسی گون کِشتینینگ یوکونی زینگماغا باشلادیلار. 19 اوچولِنجی گون کِشتینینگ کَن ایش آبزارلارینی-دا اُز اِل‍لِری بیلِن دِریا زینگدیلار. 20 اِنچِمه گونلَپ نه گون، نه ییلدیز گُروندی. گویچلی طوفان سُوولمانسُنگ، نِجات تاپماق اومیدیمیزی دویبوندِن ییتیردیک. 21 هیچ کیم اوزاق واقتلاپ هیچ زات داتمادی. شُندا پولس کِشتیدَکیلِرینگ اُرتاسیندا دوروپ، شِیله دییدی: «اِی آداملار! مِنینگ آیدانلاریما قولاق آسیپ، کریت جِزیره‌دِن قایتمادیق بُلسادینگیز، اُندا بو خاطارلی زاتلارا ساتاشمازدیق. 22 ایندی سیزه ماصلاحاتیم شو: خاطیرجِم بُلونگ! هیچ بیرینگیز هِلَک بُلمارسینگیز، دینگه کِشتی دارغار. 23 سِبَبی اُزونه باغلی بُلوپ، خیدمات اِدیَن خوداییم اُتِن آغشام اُز پِریشده‌سینی یانیما ایبِردی. 24 اُل: ”قُرقما، پولس! سِن ایمپِراطُرینگ حوضوریندا دورمالیسینگ. سِن سِبَپلی کِشتیده باریانلارینگ هِمّه‌سینی خودای آمان ساقلار“ دییدی. 25 شُنونگ اوچین، آداملار، قایراتلی بُلونگ، سِبَبی مِن خودایا اینانیارین، هِمّه زات اُزومه آیدیلیشی یالی بُلار. 26 اِلبِتّه، یِل بیزی بیر جِزیره اِلتیپ قُیار.» کِشتی باتیار 27 اُن دُردونجی گونی گیجه بیز آدریاتیک دِریاسیندا هِر یانا کُولوپ یُرکَک، یاریگیجه تُوِرِکلِری دِریاچیلار قوری یِرینگ یاقینلاشیاندیغینی گومَنلِدیلِر. 28 چونگّورلیغی اُلچَنلِرینده، قیرق مِتر چیقدی. بیرآز سُنگراق اُلچَنلِرینده، اُتوز مِتر چیقدی. 29 قایالارا باریپ اورلاریس دییّپ گومَنلَپ قُرقوپ، آرقا طارافدان دُرت لِنگِر آتدیلار-دا، باسیم دانگ آتسین دییّپ دُغا اِتدیلِر. 30 دِریاچیلار کِشتیدِن قاچجاق بُلوپ، اُو طارافدان لِنگِر آتماق باهاناسی بیلِن، قاییقی دِریا ایندِردیلِر. 31 اِمّا پولس اَفسَر بیلِن سِربازلارا: «بولار کِشتیده قالماسالار، سیز نِجات تاپمارسینگیز» دییدی. 32 شِیلِلیکده، سِربازلار قاییقینگ طاناپلارینی کِسیپ، اُنی آشاق قاچیردیلار. 33 دانگ آتیپ باریارقا، پولس هِمّه‌سینی ناهار اییمَگه چاغیردی. اُل: «سیزینگ قایغا باتیپ، هیچ زات اییمَنینگیزه بو گون اُن دُرت گون بُلدی. 34 شُنونگ اوچین سیزدِن خاییش اِدیَرین، ناهارلانینگ. بو سیزینگ دیری قالماغینگیز اوچین گِرِکدیر. هیچ بیرینگیزینگ باشینگیزینگ یِکه قیلی-دا کِمِلمِز» دییدی. 35 پولس بو سُزلِری آیدیپ، اِلینه چُرِک آلدی، هِمّه‌سینینگ اُوونده خودایا شوکور اِتدی-ده، بُلوپ اییمَگه باشلادی. 36 شِیلِلیکده، هِمّه‌لِر جانلانیپ ناهارلاندیلار. 37 کِشتیده بیزینگ جِمیمیز ایکی یوز یِتمیش آلتی آدامدی. 38 ناهاردان دُیانلاریندان سُنگ، بوغدایی دِریایا زینگیپ، کِشتینی یِنگلِتدیلِر. 39 گون دُغاندا، اُل یِری تانیمادیلار. اِمّا کِناردا چَگِلیک بیر خالیج گُروپ، باشارتسا، کِشتینی شُل یِره سورمِلی دییِن قارارا گِلدیلِر. 40 سُنگرا لِنگِرلِری کِسیپ، دِریا گُیبِرِن واقتلارینا، فِرمانا دانگلان طاناپلاری چُزدولِر-ده، اُودَکی یِلکِنی یِله قالدیریپ، دُغری کِنارا طاراف گیتدیلِر. 41 اِمّا کِشتی بیر سیقا یِره دوشوپ، چَگَه باتدی. کِشتینینگ بورنی چَگَه باتیپ، هیچ طارافا قیمیلداپ بیلمِدی، آرقا طارافی بُلسا مُوجلِرینگ زُرونا دارغاپ باشلادی. 42 زیندانیلارینگ هیچ بیری یوزوپ قاچماز یالی، سِربازلار اُلاری اُلدورجِک بُلدولار. 43 اِمّا اَفسَر پولسی نِجات بِرجِک بُلوپ، اُلاری بو نییِتلِریندِن دَندیردی. اُلارا یوزوپ بیلیَنلِر کِشتیدِن اُزلِرینی اَوَّل زینگسینلار و یوزوپ چیقسینلار، 44 قالانلاری هِم تاختالار یا-دا کِشتینینگ دُووکلِری بیلِن چیقسینلار دییّپ دِستور بِردی. شِیلِلیکده، هِمّه‌سی ساغامان قوری یِره چیقدیلار. |
© Turkmen Truth