رِسول‍لار 26 - مُقادِّس کیتاب

¹ آغریپاس پولسه:‏ ‏«‏اُزونگی قُریماق اوچین، سُزه باشلاپ بیلِرسینگ»‏ دییدی.‏ اینه، شُندا پولس اِل‍لِرینی حِرِکِتلِندیریپ، اُزونی قُریماغا دوردی:‏

² ‏«‏اِی آغریپاس پادیشاه!‏ یَهودیلِرینگ مانگا تُهمِتلِیَن هِمّه عاییپلامالاریندان قُرینیپ، بو گون سِنینگ اُوونگده دوریاندیغیم اوچین، مِن اُزومی خوشواقت حاساپلایارین.‏

³ سِنِم یَهودیلِرینگ هِمّه عاداتلاریندان، جِدِلّی فیکرلِریندِن قاوی باش چیقاریارسینگ آخیری.‏ شُنونگ اوچین هِم مِنی صابیرلیق بیلِن دینگلِمِگینگی خاییش اِدیَرین.‏

⁴ ‏«‏یاشلیغیمدان باشلاپ، اَوَّل اُز خالقیمینگ آراسیندا، شِیله هِم اورشلیمده گِچیرِن دورموشیمی هِمّه یَهودیلِر بیلیَندیرلِر.‏

⁵ اُلار مِنی کَن واقتدان بَری تانییارلار، اِگِر ایسلِسِلِر، مانگا دینیمیزینگ اینگ گویچلی مِذهِبینَه گُرَه فَریسی بُلوپ یاشاندیغیما شاهاتلیق اِدیپ بیلِرلِر.‏

⁶ اِدیل شو واقت هِم خودایینگ آتا-بابالاریمیزا بِرِن واعداسینا اومید باغلایاندیغیم اوچین مَحکِمه‌ده دورون.‏

⁷ حاقیقاتدا، خالقیمیزینگ اُن ایکی طایفاسی گیجه-گوندیز خودایا تویس یورِکدِن عیبادات اِدیپ، بو واعدانینگ بِرجای بُلماغینا اومید باغلاپدیر.‏ اِی پادیشاهیم، یَهودیلِر بُلسا شو اومید اوچین مِنی عاییپلایارلار.‏

⁸ نَمه اوچین خودایینگ اُلولِری دیرِلتمِگینی اینانیپ بُلماجاق زات حاساپلایارسینگیز؟

⁹ ‏«‏دُغروسی، مِنِم ناصِره‌لی عیسانینگ آدینا قارشی کَن یامانلیق اِتمِگی اُز یانیمدان واجیپ بیلیَردیم.‏

¹⁰ مِن بو یامانلیغی اورشلیمده اِتدیم هِم.‏ یُلباشچی کاهینلاردان ایختییار آلیپ، ایماندارلارینگ کَنسینی زیندانا سالدیم.‏ اُلار اُلومه مَحکوم اِدیلِنده، مونی ایخلاص بیلِن قُلدادیم.‏

¹¹ مِن بیر کِنیسه‌دِن بِیلِکیسینه آیلانیپ، اُلاری نَچه گِزِک جِزالاندیردیم، ایماندان دَنمَگه مِجبور اِتدیم.‏ اُلارا قارشی قاهار-غاضابا مینیپ، حتّیٰ بیگانه شَهرلِره چِنلی اُلاری آزارلادیم.‏

¹² ‏«‏گونلِرینگ بیر گونی شو ماقصات بیلِن یُلباشچی کاهینلاردان ایختییارناما و تابشیریق آلیپ، دمشقه طاراف یُلا دوشدوم.‏

¹³ اِی پادیشاهیم، گونُرتان واقتی یُلدا باریارقام، بیردِنکَه آسماندا گوندِن هِم یاغتی نور گُردوم.‏ نور مِنینگ و یُلداشلاریمینگ داش-تُوِرِگینه یالقیم یایراتدی.‏

¹⁴ هِمَّه‌میز یِره ییقیلدیق.‏ بیر سِسینگ مانگا عِبرانی دیلینده:‏ ‏”‏سولُس، سولُس!‏ نَمه اوچین مانگا آزار بِریَرسینگ؟ چویه دِپمِک سانگا قیندیر“‏ دییِنینی اِشیتدیم.‏

¹⁵ مِن:‏ ‏”‏آقام، سِن کیم؟“‏ دییّپ سُرادیم.‏ اُل:‏ ‏”‏مِن سِنینگ آزار بِریَن عیسانگ.‏

¹⁶ هانی، تور، آیاق اوستونه قال.‏ مِن سِنی خیدماتکَریم هِم شاهادیم اِدیپ سایلاماق اوچین سانگا گُروندیم.‏ سِن اُز گُرِن و مِنینگ گُرکِزجِک زاتلاریما شاهاتلیق اِدِرسینگ.‏

¹⁷ سِنی اُز خالقینگ و باشغا میلِّتلِرینگ اِلیندِن آزاد اِدِرین.‏ باشغا میلِّتلِرینگ گُزلِرینی آچار یالی، مِن سِنی اُلارینگ آراسینا ایبِرِرین.‏

¹⁸ شُندا اُلار قارانگقیلیقدان نورا، شِیطانینگ حُکومدارلیغیندان خودایا طاراف اُورولِرلِر.‏ مانگا ایمان گِتیرمِگینگ اوستو بیلِن اُلارینگ گونَه‌لِری باغیشلانیپ، اُلار خودایینگ مُقادِّس خالقی بیلِن بیله میراث آلارلار“‏ دییدی.‏

¹⁹ ‏«‏شُنونگ اوچین هِم، اِی آغریپاس پادیشاه، مِن آسماندان گِلِن رویایا قولاق آسمازلیق اِتمِدیم.‏

²⁰ دِسلاپ دمشق‌ده، اورشلیمده، سُنگرا تامام یهودیه‌ده، شِیله هِم، باشغا میلِّتلِرینگ آراسیندا:‏ ‏”‏گونَه‌لِرینگیز اوچین توبا اِدینگ، خودایا دُلانینگ، توبا اِدِندیگینگیزی قاوی ایشلِرینگیز بیلِن تاصدیق اِدینگ“‏ دییّپ واغیظ اِتدیم.‏

²¹ شو سِبَپدِن یَهودیلِر مِنی عیباداتخانادا توتوپ، اُلدورجِک بُلدولار.‏

²² اِمّا شو گونه چِنلی خودای مانگا کُمِک اِتدی.‏ شُنونگ سایه‌سیندا اولودان-کیچَه، هِمّه‌لِره شاهاتلیق اِدیپ گِلیَرین.‏ بُلجاق زاتلاری اُنگدِن خابار بِرِن پیغامبارلارینگ و موسانینگ آیدانلاریندان باشغا هیچ زات اُورِدِن دَلدیرین.‏

²³ اُلار هِم مسیحینگ قینچیلیق گُرمِلیدیگینی، اَوَّلکی بُلوپ اُلومدِن دیرِلیپ، اُز خالقینا و باشغا میلِّتلِره خودایینگ نورینی اِعلان اِتمِلیدیگینی آیان اِدیپدیلِر.‏»‏

²⁴ پولس شِیدیپ، اُزونی قُریپ دورقا، فِستوس قاتی سِس بیلِن:‏ ‏«‏پولس، سِن دیوانا بُلوپسینگ!‏ کَن عیلیمینگ سِنی عاقیلینگدان آزاشدیریپدیر»‏ دییدی.‏

²⁵ پولس اُنگا:‏ ‏«‏اِی حُرماتلی فِستوس، مِن عاقیلیمدان آزاشامُق.‏ مِنینگ آیدان سُزلِریم حاقیقات و عاقیلا یِرلِشیَندیر.‏

²⁶ بو زاتلاردان پادیشاهمینگ خابارلیدیغی اوچین، مِن اُنگا آرقایین کِپلِیَرین.‏ بولارینگ هیچ بیرینینگ اُندان گوزگین دَلدیگینه مِن اینانیارین، سِبَبی بولار اُغرینچا اِدیلِن دَلدیر.‏

²⁷ اِی آغریپاس پادیشاه!‏ سِن پیغامبارلارا اینانیارسینگمی؟ اینانیاندیغینگی بیلیَرین-اَ»‏ دییدی.‏

²⁸ آغریپاس پولسه:‏ ‏«‏مِنی قیسغا واقتینگ ایچینده راضی اِدیپ، مسیحی اِتجِک بُلیارسینگمی؟»‏ دییدی.‏

²⁹ پولس اُنگا:‏ ‏«‏قیسغا بُلسون، اوزین بُلسون، دینگه سِن دَل، اُندا، شو گون مِنی دینگلِیَنلِرینگ باری مِنینگ یالی بُلسون دییّپ خودایا یالباریارین.‏ اِلبِتّه، بو زینجیرلار سیزده بُلماسین»‏ دییّپ جُغاپ بِردی.‏

³⁰ شوندان سُنگ آغریپاس پادیشاه، فِستوس حاکیم، بِرنیکی و اُلار بیلِن اُتورانلار یِرلِریندِن توردولار.‏

³¹ اُلار چیقیپ باریارقالار، اُزآرا گورلِشیپ:‏ ‏«‏بو آدام اُلومه یا-دا زیندانلیغا لاییق هیچ ایش اِتمَندیر»‏ دییّشدیلِر.‏

³² آغریپاس فِستوسا:‏ ‏«‏بو آدام داعواسینی ایمپِراطُرا عارض اِتمِدیک بُلسادی، اُنی آزاد اِدیپ بُلاردی»‏ دییدی.‏