رِسول‍لار 23 - مُقادِّس کیتاب1 پولس مِجلِسه دیقّات بیلِن گُزلَپ: «اِی دُغانلار! مِن شو گونه چِنلی خودایینگ اُوونده آراسّا وِجدان بیلِن یاشادیم» دییدی. 2 باش کاهین حَنانیا پولسینگ یانیندا دورانلارا اُنونگ آغزینا اورماغی اِمر اِتدی. 3 پولس اُنگا: «سِنی خودای اورار، اِی یوزی آقلانان دیوار! اُزونگ-اَ مِنینگ اوستومدِن شِریغاتا گُرَه حُکوم چیقارماق اوچین اُتیرسینگ، سُنگرا هِم بُلسا شِریغاتی پُزوپ، مِنی اورماغی تابشیریارسینگ» دییدی. 4 پولسینگ یانیندا دورانلار اُندان: «سِن نَمه اوچین خودایینگ باش کاهینسینا دیل یِتیریَرسینگ؟» دییّپ سُرادیلار. 5 پولس: «دُغانلار، اُنونگ باش کاهیندیغینی بیلمَندیرین. یُغسام مُقادِّس یازغیلاردا هِم: ”اُز خالقینگ باشلیغینی لَعنِتلِمه“ دییّپ یازیلان» دییدی. 6 پولس اُلارینگ بیر بُلِگینینگ صادّوقی‌لار، بِیلِکی بُلِگینینگ-ده فَریسی‌لِردیگینی بیلیپ: «اِی دُغانلار، مِن فَریسی، فَریسی‌نینگ اُغلودیرین. مِن اُلولِرینگ دیرِلیَندیگینه اومید باغلایاندیغیم اوچین حُکوم اِدیلیَرین!» دییّپ، مِجلِسده قاتی قیغیردی. 7 پولسینگ بو سُزوندِن سُنگرا فَریسی‌لِر بیلِن صادّوقی‌لارینگ آراسینا بُلونچیلیک دوشوپ، ییغنانان جِماغات ایکَه بُلوندی. 8 صادّوقی‌لار دیرِلیش-ده، پِریشده-ده، روح-دا یُق دییَّردیلِر، فَریسی‌لِر بُلسا بولارینگ هِمّه‌سینه اینانیاردیلار. 9 شِیلِلیکده، اولی قالماغال توردی. فَریسی‌لِرینگ طارافینی توتیان کَبیر دین عُلَمالار یِریندِن توروپ، اولی داعوا توروزدیلار. اُلار: «بیز بو آدامدا هیچ بیر عاییپ تاپمادیق. نیرِدِن بِلّی اُنونگ بیلِن بیر روح یا پِریشده کِپلِشِن دَل بُلسا؟» دییدیلِر. 10 داعوا-جِنجِل شِیله بیر قیزدی سِردار اُلارینگ پولسی پارچالاماقلاریندان قُرقوپ، سِربازلارا گِلیپ، اُنی اُلارینگ آراسیندان سویرَپ چیقاریپ، قلعه اَکیتمِگی تابشیردی. 11 شُل گیجه عیسی پولسه گُرنوپ، اُنگا: «خاطیرجِم بُل! سِن مِن حاقدا اورشلیمده نَهیلی شاهاتلیق اِدِن بُلسانگ، رومدا-دا شِیله شاهاتلیق اِتمِلیسینگ» دییدی. پولسی اُلدورمه بارادا دیلبیرلِشیک 12 اِرتیسی گون یَهودیلِر بیری-بیرلِری بیلِن دیل بیریکدیریپ، پولسی اُلدوریَنچَلِر، اییّپ-ایچمِزلیگه قاسام ایچدیلِر. 13 بو دیلدووشوگه قاتناشانلارینگ سانی قیرقدان هِم کَندی. 14 اُلار یُلباشچی کاهینلارینگ و یاشولیلارینگ یانینا گِلیپ: «بیز پولسی اُلدوریَنچَک، هیچ زات اییّپ-ایچمِزلیگی قاتی قاسام ایچدیک. 15 شِیلِلیکده، سیز مِجلِس بیلِن بیلِلیکده رومی سِرداردان پولسی ایزینا گِتیرمِگی خاییش اِدینگ. اُل حاقدَکی ماغلوماتلاری داقیق اُورِنمِک ایسلِیَریس دییِن بُلونگ. پولس بو یِره گِلیپ یِتمَنکَه، بیز اُنی یُلدا اُلدورمَگه تاییار» دییدیلِر. 16 اِمّا پولسینگ یِگِنی اُلارینگ دیلبیرلِشیک قورانینی اِشیدیپ، قلعه باردی-دا، مونی پولسه خابار بِردی. 17 پولس هِم اَفسَرلِرینگ بیرینی یانینا چاغیریپ: «بو ییگیدی سِردارینگ یانینا اِلت، اُنگا بیر زات بارادا خابار بِرمِکچی» دییدی. 18 اُنسُنگ اَفسَر اُنی آلیپ، سِردارینگ یانینا گِتیردی. اُنگا: «زیندانی پولس مِنی چاغیریپ، شو ییگیدی سِنینگ یانینگا گِتیرمِگیمی خاییش اِتدی. اُنونگ سانگا آیتجاق زادی بار میشدیق» دییدی. 19 سِردار ییگیدینگ اِلیندِن توتوپ، بیر قیرا چِکدی-ده، اُندان: «سِن مانگا نَمه حاقدا خابار بِرمِکچی؟» دییّپ سُرادی. 20 اُل شِیله جُغاپ بِردی: «یَهودیلِر و مِجلِس بیلِلیکده پولس حاقدَکی ماغلوماتلاری داقیق اُورِنمِک باهاناسی بیلِن، اُنی اِرتیر مِجلِسه گِتیرمِگی سِندِن خاییش اِتمِک اوچین دیلِّشدیلِر. 21 اِمّا سِن اُلارینگ سُزونه قولاق آسما، سِبَبی قیرقدان قاوراق آدام گوزگِنیپ، پولسه بوقونوپ قاراشیار. اُلار پولسی اُلدوریَنچَک، اییّپ-ایچمِریس دییّپ قاسام ایچدیلِر. شو واقت اُلار تاییار بُلوپ، سِنینگ راضیچیلیغینگا قاراشیارلار.» 22 سِردار اُل ییگیدی اوغرادیپ: «مونی مانگا خابار بِرِنینگی هیچ کیمه آیتماغین» دییّپ تابشیردی. پولس قیصریه ایبِریلیَر 23 اُنسُنگ سِردار اَفسَرلِریندِن ایکیسینی یانینا چاغیریپ: «آغشام ساغات دُقوزدا قیصریه گیتمِک اوچین، ایکی یوز سانی پییادا، یِتمیش سانی آتلی سِربازی و ایکی یوز نایزاچی تاییارلانگ. 24 پولسی هِم آتا میندیریپ اَکیدیپ، ساغامان حاکیم فِلیکسینگ یانینا آلیپ بارینگ» دییّپ تابشیریق بِردی. 25 سُنگرا سِردار شِیله ماضمونلی نامه یازدی: 26 «خاص حُرماتلانیان حاکیم فِلیکسه کلودیوس لیسیاسدان دُغایی سالام! 27 «یَهودیلِر بو آدامی توتوپ اُلدورجِک بُلوپ دورقالار، مِن اُنونگ روم میلّیِتلیدیگینی بیلیپ، سِربازلاریم بیلِن یِتیشیپ، اُنی آزاد اِتدیم. 28 اُنونگ نَمه عاییبینینگ باردیغینی بیلمِک اوچین، اُنی یَهودیلِرینگ مِجلِسینه آلیپ گِلدیم. 29 اُنی اُزلِرینینگ شِریغاتی بیلِن باغلی مِسِله‌لِرده عاییپلایاندیقلارینی بیلدیم، اِمّا اُندا اُلومه یا-دا زیندان اِتمَگه لاییق هیچ هیلی اِساس یُقدور. 30 بو آداما بِد نییِت اِدیلجِک بُلیاندیغی باراداقی خاباری آلانیمدا بُلسا، اُنی شو واقتدا سِنینگ یانینگا ایبِرمِگی قارار اِتدیم. اُنی عاییپلایانلارا-دا اُز شیکایاتلارینی سانگا معلیم اِتمِکلِرینی تابشیردیم.» 31 سِربازلار اُزلِرینه تابشیریلشی یالی، پولسی آلیپ، گیجه آنتیپاتریسه گِتیردیلِر. 32 اِرتیسی گون آتلی سِربازلار پولس بیلِن بیله یُل‍لارینی دُوام اِتدیردیلِر، بِیلِکیلِر بُلسا قلعه دُلاندیلار. 33 آتلیلار قیصریه گِلِنلِرینده، نامه‌نی حاکیمه قاوشوریپ، پولسی-ده اُنونگ اِلینه تابشیردیلار. 34 حاکیم نامه‌نی اُقیپ، پولسینگ هایسی وِلایاتداندیغینی سُرادی. پولسینگ کیلیکیه‌دِندیگینی بیلِنده: 35 «سِنی عاییپلایانچیلار گِلِنسُنگ دینگلَرین» دییدی. سُنگرا پولسی هیرودیسینگ کاخیندا قاراوول‍لارینگ اِلینده ساقلانمالیدیغی بارادا تابشیریق بِردی. |
© Turkmen Truth