رِسول‍لار 20 - مُقادِّس کیتابپولس مَقدونیه‌ده و یوناندا 1 پولس قالماغال یاتیشاندان سُنگ، شَگیرتلِری یانینا چاغیریپ، اُلاری قوواتلاندیردی و سُنگرا اُلار بیلِن خوشلاشیپ، مَقدونیَه اوغرادی. 2 اُل اِطرافلاری آیلانیپ، ایماندارلارا گورّونگ بِریپ، اُلاری گُوونلیک بِردی. سُنگرا اُل یونانا گِلدی. 3 اُل یِرده اوچ آیلاپ قالدی. سُنگرا سوریه کِشتیلی گیتمِکچی بُلاندا، یَهودیلِرینگ اُزونه قارشی دوزاق قوراندیغینی بیلیپ، مَقدونیه‌نینگ اوستو بیلِن ایزینا دُلانماق قارارینا گِلدی. 4 بیریه‌دِن پیرّوسینگ اُغلی سوپاتِروس، تِسالونیکیدِن آریستارخوس بیلِن سِکوندوس، دِربه‌دِن قایوس هِم تیموتاوس، شِیله هِم آسیا وِلایاتیندان تیخیکوس بیلِن تروفیموس داغی اُنونگ بیلِن بیله گیتدیلِر. 5 بولار اُنگدِن گیدیپ، تروآسدا بیزه قاراشدیلار. 6 بیز هِم پِتیر بایرامیندان سُنگرا فیلیپیدِن کِشتی بیلِن یُلا دوشدوک. بَش گوندِن سُنگ اُلارینگ یانینا تروآسا گِلیپ یِتدیک. اُل یِرده یِدی گون بُلدوق. تروآسداقی مُعجِزه 7 یِکشَنبه گونی بیله چُرِک بُلمَگه ییغنانیشدیق. پولس اِرتیسی گون یُلا دوشمِکچیدی، شُنونگ اوچین یاری گیجَه چِنلی واغیظ اِتدی. 8 بیزینگ ییغنانیشان یُقارقی مِرتِبه‌دَکی اُتاقیمیزدا کَن چیراغ یانیپ دوردی. 9 اِفتیخوس آدلی بیر یاش ییگیت پِنجِره‌نینگ قیراسیندا اُتیردی. پولس گورّونگینی دُوام اِدیَرکَه، اِفتیخُسی اوقی باسیپ، اوچونجی مِرتِبه‌دِن ییقیلدی. اُنی باریپ گُرِنلِرینده، اُل اِییَم جان بِرِن میشدیق. 10 پولس آشاق دوشوپ، ییگیدینگ اوستونه اِنگیلدی و اُنی قوجاقلاپ: «قایغی اِتمَنگ، اُل دیری!» دییدی. 11 اُنسُنگ یِنه یُقاری چیقدی، بیله چُرِک بُلوپ اییدی و اُلار بیلِن دانگ آتیانچا گورّونگ اِتدی. سُنگرا بُلسا یُلا دوشدی. 12 اُلار یانگقی اُغلانینگ دیریدیگینه شاتلانیپ، اُنی اُیونه ساغ-سالامات گِتیردیلِر. پولس اِفِسُسداقی کِلیسانینگ یاشولیلاری بیلِن خوشلاشیار 13 پولس آسوس شَهرینه پییادا گیتمِک قارارینا گِلدی. بِیلِکیلِریمیز بُلسا کِشتیَه مینیپ گیتدیک. بیز اُل یِرده پولسی قارشی آلمالیدیق. مونی بیزه اُنونگ اُزی شِیله تابشیریپدی. 14 پولس آسوسدا بیزه قُشولدی، اُنسُنگ بیز اُنی آلیپ، میتیلینی شَهرینه طاراف یُلا دوشدوک. 15 اُل یِردِن کِشتی بیلِن گیدیپ، اِرتیسی خیوس جِزیره‌سینینگ قُلایینا یِتدیک. بیر گوندِن سُنگ بُلسا ساموسا گِچیپ، اُنونگ اِرتیسی هِم میلیتوسا باریپ یِتدیک. 16 پولس آسیا وِلایاتیندا واقتینی ییتیرمِزلیک اوچین، اِفِسُسینگ قاپدالیندان گِچیپ گیتمِگی یورِگینه دوودی. اُل اورشلیمه یِتمَگه هاولوقیاردی، سِبَبی پِنتیکاست گونی اُل یِرده بُلماق ایسلِیَردی. 17 پولس میلیتوسدان اِفِسُسا آدام ایبِریپ، کِلیسانینگ یاشولیلارینی یانینا چاغیرتدی. 18 اُلار پولسینگ یانینا گِلِنلِرینده، پولس شِیله دییدی: «مِنینگ آسیا وِلایاتینا گِلِن اَوَّلکی گونومدِن بَری سیزینگ یانینگیزدا نَهیلی یاشاندیغیمی اُزونگیز بیلیَنسینگیز. 19 مِن کَن گُزیاش دُکوپ و فُروتَنلیک بیلِن خودایا خیدمات اِتدیم. یَهودیلِرینگ قارشیما قوران مِکرلِرینه و ایمتِحانلارینا دوچار بُلدوم. 20 پِیدالی بُلان زاتلارینگ هیچ بیرینی سیزدِن قایغیرمادیم. اُی به اُی آیلانیپ، هِمّه‌سینی سیزه آچیقدان واغیظ اِتدیم. 21 مِن یَهودیلِری-ده، یونانیلاری-دا توبا اِدیپ، خودایا دُلانماغا و تانگریمیز عیسی مسیحه ایمان گِتیرمَگه چاغیردیم. 22 «ایندی بُلسا مُقادِّس روحا قولاق آسیپ، اورشلیمه گیدیَرین. اُل یِرده باشیما نَمِلِرینگ گِلجِگینی بیلِمُق. 23 اِمّا مُقادِّس روح مانگا هِر شَهرده زیندانا و قینچیلیقلارا دوچار بُلجاقدیغیمی بیلدیریَر. 24 اِمّا جانیمی اُزوم اوچین باهالی حاساپلامایارین. مِن دینگه یاریشینگ سُنگونا یِتمِک و تانگریمیز عیسانینگ تابشیران ایشینی کِمالا یِرینه یِتیرمِک ایسلِیَرین. بو ایش خودایینگ مِرحِمِتی باراداقی خوش خابارا شاهاتلیق اِتمِکدیر. 25 «مِن آرانگیزدا بُلوپ، خودایینگ پادیشاهلیغینی واغیظ اِتدیم. ایندی سیزینگ هیچ بیرینگیزینگ موندان بِیلَک مِنی گُرمِجِکدیگینگیزی بیلیَرین. 26 شُنونگ اوچین بو گون سیزه شونی اِعلان اِدیَرین: مِن هیچ کیمینگ قانینا جُغاپکَر دَلدیرین. 27 سِبَبی مِن خودایینگ هِمّه ایسلِگینی سیزه واغیظ اِتمِکدِن قایغیرمادیم. 28 اُزونگیزه و مُقادِّس روحونگ سیزینگ باقماغینگیزا بِرِن هِمّه سوروسینه گُز-قولاق بُلونگ. خودایینگ کِلیساسینا چُپانچیلیق اِدینگ. اُل بو کِلیسانی اُز اُغلونینگ قانی بیلِن ساتین آلدی. 29 مِن گیدِنیمدِن سُنگرا، آرانگیزا ییرتیجی قورتلارینگ گِلجِگینی بیلیَرین، اُلار سورینی قُریمازلار. 30 حتّیٰ اُز آرانگیزدان کَبیر آداملار چیقیپ، شَگیرتلِری ایزینا دوشورتدیرجِک بُلوپ، حاقیقاتی پُزارلار. 31 شُنونگ اوچین هوشیار بُلونگ. اوچ ییلّاپ گیجه-گوندیز گُزیاشلاریم بیلِن هِر بیرینگیزه هِمیشه ناصیحات اِدِنیمی یادینگیزدا ساقلانگ. 32 «ایندی بُلسا مِن سیزی خودایا و اُنونگ مِرحِمِتلی سُزونَه تابشیریارین. بو سُز سیزه گویچ-قودرات بِرِر و مُقادِّس بُلانلارینگ آراسیندا میراث بِرِر. 33 مِن هیچ کیمینگ پولونا یا-دا لِباسینه گُز تیکمِدیم. 34 سیز مِنینگ اُزومینگ و یُلداشلاریمینگ مَحتَجلِری اوچین اِل‍لِریم بیلِن زَحمِت چِکِندیگیمی بیلیَنسینگیز. 35 اُز اِل‍لِریم بیلِن قاتی ایشلَپ، مَحتَجلیک چِکیَنلِره کُمِک اِتمِکده مِن سیزه نِمونه گُرکِزدیم. تانگریمیز عیسانینگ اِدیل اُزونینگ: ”بِرمِک آلماقدان خاص کَن خوشواقتلیق گِتیریَر“ دییِن سُزلِرینی یاددا ساقلانگ.» 36 پولس سُزونی تاماملاندان سُنگ، دیزا چُکوپ، اُلارینگ هِمّه‌سی بیلِن بیرلیکده دُغا اِتدی. 37 شُندا اُلارینگ هِمّه‌سی دوومه-دوومه گُزیاش دُکوپ، پولسی باغرینا باسدیلار، اُنی اُغشادیلار. 38 پولسینگ: «ایندی مِنی هیچ هاچان گُرمِرسینگیز» دییِن سُزلِری اُلاری خاص غاملاندیردی. سُنگرا اُلار اُنی کِشتیَه چِنلی یُلّادیلار. |
© Turkmen Truth