۲ تیموتاوس 4 - مُقادِّس کیتابخیدماتینگی دُوام اِت! 1 خودایینگ حوضوریندا، شِیله هِم دیریلِره و اُلولِره قاضیلیق اِتجِک عیسی مسیحینگ حوضوریندا، اُنونگ گِلمِگینینگ و پادیشاهلیق اِتمِگینینگ خاطیرینا سانگا شولاری قاتی تابشیریارین: 2 فُرصَتینگ پِیدالی بُلوپ-بُلمازلیغینا باقما-دا، خوش خاباری بیرسیخلی واغیظ اِت. و اُلاری کَن صابیرلیق بیلِن و قاوی تَعلیمات بیلِن یُلا گِتیر، کَیی و هِم گُوونلیک بِر. 3 چونکی آداملارینگ دُغری تَعلیماتی دینگلَسی گِلمِجِک زاماناسی گِلِر. شُندا اُلار اُز هُوِسلِرینه میناسیپ، قولاقلارینا-دا گِرِکلی سُزلِری آیتجاق مُعلِّملِری گُزَرلِر. 4 اُلار حاقیقاتا قولاق آسمان، بُش رِوایاتلارینگ ایزینا دوشورلِر. 5 سِن بُلسا هِر یاغدایدا خاباردار بُل، زَحمِتلِره جیداملی بُل، خوش خاباری یایراتماق اوغروندا زَحمِت چِک، اُزونگه تابشیریلان خیدماتی کِمالا یِتیر. 6 چونکی مِنینگ قانیم خودایا هُدورلِنِن ایچگی قربانلیق کیمین دُکولجِک بُلوپ دور. بو دونیَه‌دِن گیتمِلی واقتیم گِلدی. 7 مِن قاوی اوروشچی کیمین اوروشدیم، یاریشی بیتیردیم و ایمانی قُریدیم. 8 ایندی دُغرولیق قاضیسی بُلان خودای عیسی مسیح اُز گِلجِک گونونده مانگا تاقوالیق تاجینی بایراق بِرِر. اُل بو بایراغی دینگه مانگا دَل، شِیله بُلسا اُزونه اینتیظارلیق بیلِن قاراشیانلارینگ هِر بیرینه بِرِر. سُنگقی تابشیریقلار 9 مِنینگ یانیما باسیمراق گِلجِک بُل، 10 سِبَبی دیماس بو دونیَه‌نینگ عشقی اوچین، مِنی تِرک اِدیپ، تِسالونیکیَه گیتدی. کریسکیس غَلاطیه و تیتوس هِم دِلماتیَه گیتدی. 11 یانیمدا دینگه لوقا قالدی. قایدانینگدا مَرقُسی هِم آلیپ قایت، سِبَبی خیدماتیمی بیتیرمِکده مانگا کُمِگی یِتِر. 12 تیخیکوسی بُلسا اِفِسُسا یُلّادیم. 13 قایدانینگدا، یُل اوغرونا تروآسدا کارپوسینگ یانیندا قُیوپ قایدان دُنومی، یازانلاریمی، خاص-دا دِرینگ یوزونده یازانلاریمی آلیپ قایت. 14 میس اوسّاسی اسکندر مانگا یامانلیق بارینی اِتدی. خودای اُنگا اِدِنلِرینه گُرَه جِزاسینی بِرِر. 15 سِن هِم اُندان خاباردار بُل، سِبَبی اُل بیزینگ آیدیانلاریمیزینگ بارینا قاتی قارشی چیقیپدی. 16 مَحکِمه‌ده اُزومی اَوَّلکی گِزِک آقلاماقچی بُلانیمدا، طارافیمی توتان بُلمادی. قایتام، هِمّه‌لِر مِنی تِرک اِتدیلِر. قُی، خودای اُلارینگ بو گونَه‌سینی باغیشلاسین. 17 یُنه خودای مِنی یِکه قُیمادی. خوش خابارینگ مِنینگ اوستوم بیلِن کَمیل واغیظ اِدیلیپ، هِمّه میلِّتلِرینگ هِم اُنی اِشیتمِگی اوچین، اُل مانگا گویچ-قووات بِردی. شِیلِلیکده خودای مِنی اُلومینگ پِنجِسیندِن آزاد اِتدی. 18 اُل مِنی هِر هیلی یامانلیقلاردان آزاد اِدیپ، مِنی آسمانداقی پادیشاهلیغینا ساغامان یِتیرِر. خودایا باقی و اِبِدی بِییکلیک بُلسون! اَمین. 19 پریسکیلا، آکیلا و اُنیسیفوروسینگ اُیوندَکیلِره سالام آیت. 20 اِراستوس قُرِنتُس‌دا قالدی. تروفیموسی بُلسا مِریضلیگی اوچین میلیتوسدا قالدیرمالی بُلدوم. 21 قیش دوشمَنکَه گِلجِک بُلوپ قایرات اِت. یوبولوس، پودِنس، لینوس، کلودیا و ایماندار دُغانلارینگ باری سانگا سالام آیدیار. 22 خودای سِنینگ بیلِن بُلسون! خودایینگ مِرحِمِتی سیزینگ بیلِن بُلسون! |
© Turkmen Truth