۲ تیموتاوس 2 - مُقادِّس کیتابعیسی مسیحه وِفادارلیق بیلِن ایزینا دوشونگ 1 اِی اُغلوم، عیسی مسیحدَکی مِرحِمِتینده قوواتلان. 2 کَن شاهاتلارینگ یانیندا مِندِن اِشیدِن سُزلِرینگی بِیلِکیلِره-ده تَعلیم بِریپ بیلجِک وِفادارلی آداملارا تابشیر. 3 عیسی مسیحینگ حاقیقی سِربازی یالی بُلوپ، بیزینگ ایمان اوغروندا گُریَن زَحمِتلِریمیزه شِریک بُل. 4 سِربازلیق اِدیَن آدام گونلیک یاشایشا دِگیشلی ایشلِره قاریشیان دَلدیر. اُل اُز سِردارنینگ گُونینی آلماقی ایسلِیَندیر. 5 شونونگ یالی، یاریشا گیرِیَن پَهلِوان هِم یاریشینگ شِرطلِرینی بِرجای اِتمِسه، بایراق آلماز. 6 زَحمِتکِش تایخان هِم اُز حاصیلیندان اَوَّلکی پایی اُزی آلمالیدیر. 7 شو آیدیانلاریم بارادا فیکرلِن. بولارینگ بارینا دوشونِر یالی، خودایینگ اُزی سانگا دوشونجه بِرِر. 8 داوودینگ نِسلیندِن بُلان و اُلومدِن دیرِلِن عیسی مسیحی یادا سال. بو مِنینگ واغیظ اِدیَن خوش خاباریمدیر. 9 مِن خوش خابارینگ اوغروندا زَحمِت بارینی گُروپ، جِنایاتچی کیمین دانگیلیپ قُییلدیم. اِمّا خودایینگ سُزونی دانگیپ قُیوپ بُلیان دَلدیر! 10 اینه، اِدیل شو سِبَپدِن، سایلانانلار هِم باقی بِییکلیک بیلِن بیرلیکده عیسی مسیحینگ اوستو بیلِن نِجات تاپار یالی، اُلارینگ خاطیراسینا هِمّه زادا جیدایارین. 11 اینه، شو سُزلِر خاص دُغری آیدیلان سُزلِردیر: اُنونگ بیلِن بیله بیز اُلِن بُلساق، اُنونگ بیلِن بیله هِم یاشاجاقدیریس. 12 زَحمِتلِره جیدایان بُلساق، اُنونگ بیلِن بیله هِم شاهلیق اِدِریس. اِگِر اُنی اینکَر اِتسِک، اُل هِم بیزی اینکَر اِدِر. 13 اِمّا بیز اُنگا وِفالی قالماساق-دا، اُل بیزه وِفالی قالار، سِبَبی اُل اُزونی اینکَر اِدیپ بیلمِیَر. خودایینگ حالایان ایشچیسی 14 بو زاتلاری هِمّه‌لِره یادلادیپ دور. سُزلِرینگ مَعنیسی بارادا داعوالاشمازلیغی اُلارا خودایینگ حوضوریندا قاتی تابشیر. سِبَبی شِیله داعوالار پِیدا گِتیرمَن، دینگلِیَنلِری هِلَکچیلیگه دوشیریاندیر. 15 خودایینگ حوضوریندا اُز اِدیَنیندِن اوتانماجاق، حاقیقی تَعلیماتی دُغری اُورِدیَن ایشچی حُکمونده دوروپ بیلِرینگ یالی، جان-تِندِن ایخلاص اِت. 16 خودایا یارامایان بُش کِپلِردِن داش دور. سِبَبی شِیله کِپلِره بیرلِشیان آداملار گیتدیگیچه خودایدان داشلاشیاندیرلار. 17 اُلارینگ اُورِدیَن تَعلیماتی بُلسا یایرایان دِرد کیمین یایرار. هیمیناوس بیلِن فیلِتوس هِم شُلاردان بُلوپ، 18 حاقیقات یُلوندان آزاشاندیرلار. اُلار قیامات گونی یِرینه یِتدی دییّپ، کَبیر آداملارینگ ایمانینی وِیران اِدیَرلِر. 19 اِمّا هِر نَهیلی بُلسا-دا، خودایینگ توتان بُنیادی قاییم دوراندیر. بو بُنیاد «خودای اُزونینگکیلِری تانییاندیر» و «خودایینگ آدینی ایقرار اِدیَن هِر کِس یامانلیقدان اوزاق دورسون» دییِن سُزلِر بیلِن مُهورلِنِندیر. 20 اولی اُیدَکی قاپلارینگ هِمّه‌سی قیزیلدان و کوموشدِن دَلدیر. اُلارینگ آراسیندا آغاچدان و پالچیقدان بِجِرِنلِری هِم باردیر. اُلارینگ کَبیری مُهِم ایشلِر، کَبیری بُلسا بَرکی ایشلِر اوچین قولّانیاندیر. 21 ایماندارلار باباتدا هِم شِیله: اُزونی هِر تویسلی یامانلیقدان ساقلایان ایماندار آیراتین سایلانیلیپ، آقاسی اوچین یارایان مُقادِّس قاپ کیمین بُلار. اُل ایسلِندیک یاخشی ایشلِر اوچین تاییاردیر. 22 جُوانلیق هُوِسلِریندِن قاچ. پَک یورِکدِن خودایا عیبادات اِدیَنلِر بیلِن بیرلیکده تاقوالیق، ایمان، سُیگی و پاراحاتلیق یُل‍لارینینگ ایزینا دوش. 23 بُش و دوشومسیز جِدِل‍لِردِن داش دور. سِبَبی داعوالارینگ شُلاردان دُرِیَندیگینی اُزونگ بیلیَنسینگ. 24 خودایینگ خیدماتچیسی داعوالاشمالی دَلدیر، تِرسینه، هِمّه‌لِره میلاییم، تَعلیم بِرمِگی باشاریان و صابیر-طاقاتلی بُلمالیدیر. 25 اُل اُزونه قارشی چیقیان آداملارا هِم یومشاقلیق بیلِن ناصیحات بِرمِلیدیر. بِلکی، خودای بو آداملارینگ هِم توبا گِلمِگینه بیر یُل آچار. اُلار-دا حاقیقاتی بیلیپ 26 و اُزلِرینه گِلیپ، شِیطانینگ دوزاغیندان خالاص بُلارلار. سِبَبی شِیطان اُلاری اِسیرلیگه آلیپ، اُز نییِتینی یِرینه یِتیرمَگَه مِجبور اِدیَندیر. |
© Turkmen Truth