۲ تِسالونیکیلِر 2 - مُقادِّس کیتاب

شِراراتلی آدام

¹ ایندی بُلسا، اِی عزیزلِر، تانگریمیز عیسی مسیحینگ گِلمِگی و اُنونگ یانینا اویشمِگیمیز باباتدا شولاری آچیقلاشدیرماقچی:‏

² ‏«‏تانگری عیسانینگ گِلجِک گونی شو واقت گِلیپ یِتدی»‏ دییّپ آیدیان خابار هایسیدیر، نبوّتلیق یا-دا نامه بیزدِن یالی بُلوپ گُرونسه-ده، شُلار سِبَپلی باسیم آلدیرامانگ یا-دا تیترِمِگه دوشمَنگ.‏

³ اُزونگیزی هیچ کیمه هیچ یُل بیلِن آلداتمانگ.‏ چونکی کَن آداملار خودایا قارشی باش قالدیرار و یُق اِدیلمِلی شِراراتلی آدام اَوَّل گُرونِر.‏ یُنه بو زاتلار یِرینه یِتیَنچَه، مسیحینگ گونی گِلمِز.‏

⁴ بو آدام خودای دییّپ آدلاندیریلیان یا سِجده اِدیلیَن زاتلارینگ بارینا قارشی چیقیپ، اُزونی اُلاردان یُقاری توتار.‏ اُل حتّیٰ خودایینگ عیباداتخاناسیندا اُتوریپ، اُزونی خودای دییّپ اِعلان اِدِر.‏

⁵ مِن هِنیز یانینگیزداقام بولاری سیزه آیدانیم یادینگیزا دوشمِیَرمی؟

⁶ اُل اُز میناسیپ واقتیندا اَشکَر بُلار یالی، شِیله هِم شونی نَمه زاد ساقلایانینی اُزونگیز هِم شو واقت بیلیَنسینگیز.‏

⁷ چونکی شِراراتلیق سیری شو واقت هِم حِرِکِتده، یُنه اُنی ساقلایان آرادان آیریلیانچا اُز ایشینی دُوام اِتدیرِر.‏

⁸ شُندا شُل شِراراتلی آدام گُرونِر.‏ تانگری عیسی اُنی آغزینینگ دِمی بیلِن، اُز گِلشینینگ قودراتی و هایباتی بیلِن اُنی هِلَک و یُق اِدِر.‏

⁹ شِراراتلی آدام گِلِنده شِیطانینگ گویجی بیلِن هِر هیلی یالان مُعجِزه‌لِری، عالاماتلاری و قودراتلاری گُرکِزِر.‏

¹⁰ اُل هِر هیلی یامانلیقلار بیلِن هِلَکچیلیک یُلونا دوشِنلِری آلداوا سالار.‏ چونکی اُلار حاقیقاتی سُیمِگی و شُنونگ اوستو بیلِن نِجات تاپماغی رِد اِتدیلِر.‏

¹¹ شُنونگ اوچین-ده خودای اُلاری گویچلی آلداوا تابشیریار.‏ اُلار-دا بو آلداوا اینانیارلار.‏

¹² اُل مونی حاقیقاتا اینانمان و یامانلیقدان کِیپ آلانلارینگ بارینی مَحکوم اِتمِک اوچین اِدیَر.‏

ایماندا قاییم دورونگ!‏

¹³ اِی تانگری عیسی طارافیندان سُیولیَن عزیزلِر!‏ سیز نِجات تاپیپ بیلِرینگیز یالی، خودای سیزی اُزالدان سایلادی.‏ سیز مُقادِّس روحونگ اوستو بیلِن پَکلِنیپ، حاقیقاتا بُلان ایمانینگیز سِبَبی نِجات تاپدینگیز.‏ شُنگا گُرَه-ده، بیز هِمیشه سیزینگ اوچین خودایا شوکور اِتمِلیدیریس.‏

¹⁴ اُل تانگریمیز عیسی مسیحینگ بِییکلیگینَه اُرتاق بُلوپ بیلِرینگیز یالی، واغیظ اِدیَن خوش خاباریمیزینگ اوستو بیلِن سیزی بولارا چاغیردی.‏

¹⁵ شُنگا گُرَه-ده، اِی عزیزلِر، ایندی ایماندا قاییم دورونگ!‏ بیزدِن سُز یا نامه‌نینگ اوستو بیلِن اُورِنِن تَعلیماتینگیزا قاییم یاپیشینگ.‏

^16-17 آتامیز خودای بیزی سُیوپ، اُز مِرحِمِتینینگ اوستو بیلِن بیزه اِبِدی گُوونلیک بیلِن یاخشی اومید بِردی.‏ قُی، تانگریمیز عیسی مسیحینگ اُزی و آتامیز خودای سیزه گُوونلیک بِرسین و هِر بیر یاخشی ایشده و سُزده سیزه گویچ بِرسین.‏