۲ پِطرُس 3 - مُقادِّس کیتابتانگری عیسانینگ گِلجِک گونی 1 اِی عزیزلِر، ایندی سیزه بو ایکینجی نامه‌نی یازیارین. بو ایکی نامه‌دا-دا پَک فیکرلی بُلمالیدیغینگیزی یادلاتماق بیلِن دوشونجَنگیزی توروزیارین. 2 مُقادِّس پیغامبارلارینگ قادیمدا آیدان سُزلِرینی و تانگریمیز نِجات بِریَنچی مسیحینگ رِسول‍لارینگیزینگ اوستو بیلِن سیزه بِرِن حُکمونی یادینگیزا سالماقچی. 3 هِمّه زاتدان اَوَّل شونی بیلینگ: آخیرقی گونلِرده اُز هُوِسلِرینه گِزیَن بیحایا ماسغاراجیلار گُرونِر. 4 اُلار: «هانی، مسیحینگ گِلجِکدیگی باراداقی بِرِن واعداسی؟ آتا-بابالاریمیز اُلِندِن بَری هِمّه زات اُزال-باشدا نَهیلی یارادیلان بُلسا، شُنونگ یالی هِم دور» دییّپ ماسغارا اِدِرلِر. 5 اِمّا اُلار آسمانینگ قادیمدان خودایینگ سُزونینگ اوستو بیلِن یارادیلاندیغینی، یِر بُلسا سودان بُلونیپ، سو بیلِن داشی آلیناندیغینی بیلیپ یاددان چیقاران بُلیارلار. 6 شِیله هِم قادیمی دونیَه شُل سو-سیل بیلِن هِلَک بُلدی. 7 اینه، حَضیرکی یِر بیلِن آسمان بُلسا خودایینگ سُزی بیلِن ساقلانیپ، خودایسیز آداملارینگ حُکوم و هِلَک اِدیلجِک گونونه چِنلی اُد اوچین تاییار دور. 8 اِمّا، اِی عزیزلِر، بیر زادی اونوتمانگ: خودایینگ ناظاریندا بیر گون مونگ ییل یالی، مونگ ییل بُلسا بیر گون یالیدیر. 9 کَبیرلِری خودای اُز بِرِن واعداسینی بِرجای اِتمِگی گیجَه قالدیریار دییّپ حاساپ اِتسِلِر-ده، اُل گیجَه قالدیرماز. خودای سیزینگ اوچین صابیر اِدیَندیر، سِبَبی اُل هیچ کیمینگ هِلَک بُلمان، هِمّه‌لِرینگ توبا اِتمِگینی ایسلِیَر. 10 اِمّا تانگری عیسانینگ گِلجِک گونی اُغری کیمین گِلِر. شُندا آسمان اولی گوپوردی سِس بیلِن ییتیپ گیدِر، آسمان جیسیملِری یانیپ دارغار، یِر و اُندا اِدیلِن هِمّه ایشلِر اَشکَر بُلار. 11-12 هِمّه زات شِیدیپ دارغاجاق بُلسا، اُندا سیزینگ نَهیلی آداملار بُلماغینگیز گِرِک؟ خودایینگ گونونه قاراشیپ، اُنی چالاسیملاشدیریپ، مُقادِّس یاشاییشدا و تاقوالیقدا گِزمِلیسینگیز. اُل گون آسمان یانیپ یُق بُلار، آسمان جیسیملِری یانیپ اِرَر. 13 اِمّا بیز خودایینگ واعداسینا دِلیلِّنیپ، تاقوالیغینگ مِکانی بُلان تَزه آسمانا و تَزه یِره قاراشیاریس. 14 شُنگا گُرَه-ده، اِی عزیزلِر، بولارا قاراشیاندیغینگیز اوچین، خودایینگ ناظاریندا پاراحاتلیقدا یاشاپ، پَک و عایپسیز بُلماغا چالیشینگ. 15 شِیله هِم شونی یاددا ساقلانگ، خوداییمیز سیزینگ نِجات تاپماغینگیز اوچین صابیر اِدیَر. عزیز دُغانیمیز پولس هِم اُزونه بِرلِن حِکمِته گُرَه سیزه بو حاقدا یازیپدی. 16 اُل هِمّه نامه‌لاریندا شولار بارادا گورّونگ آچیاندیر. اُلاردا یازیلانلارینگ کَبیرینه دوشونمِک قیندیر. نادان هِم اویتگِیَن آداملار بو یازیلانلاری و بِیلِکی مُقادِّس یازغیلاری اویتگِدیپ اُزلِری هِلَک بُلیارلار. 17 شُنونگ اوچین هِم، اِی عزیزلِر، بو زاتلاری اُوالدان بیلیَندیگینگیز اوچین، خاباردار بُلونگ! ایماندان دُنمِز یالی، فاسیق آداملار سیزی یُلدان چیقارماسین. 18 تانگریمیز و نِجات بِریَنچیمیز عیسی مسیحینگ مِرحِمِتینده و تانیماغیندا اُسونگ. حَضیردِن تا اِبِدییَه چِنلی اُنگا بِییکلیک بُلسون! اَمین. |
© Turkmen Truth