۲ یوحنا 1 - مُقادِّس کیتاب

سالاملار

¹ مِن کِلیسانگ یاشولیسیندان خودایینگ سایلاپ-سِچِن حُرماتلی آیالینا و اُنونگ فِرزِنتلِرینه دُغایی سالام!‏ مِن سیزی چیندان سُییَرین، دینگه مِن دَل، اُندان باشغا، حاقیقاتی بیلیَنلِرینگ هِمّه‌سی-ده سیزی سُییَر.‏

² سِبَبی حاقیقات قالبیمیزا یِرلِشِندیر و اُل اِبِدیلیک بیزینگ بیلِن بُلار.‏

³ آتامیز خودایدان و اُغلی عیسی مسیحدِن مِرحِمِتی، رِحم-شِپاقاتی، پاراحاتلیغی، حاقیقات و سُیگینینگ اوستو بیلِن بیزه بُلسون!‏

حاقیقات و سُیگی

^4-5 اِی حُرماتلی آیال، آتامیز خودایینگ حُکومی یالی، بیرنَچه فِرزِنتلِرینگ حاقیقاتا گُرَه یاشایاندیغینی گُروپ، قاتی شاد بُلدوم.‏ ایندی سانگا بیر خاییشیم بار:‏ بیری-بیریمیز بیلِن سُیگوده یاشایلینگ.‏ مِن سانگا بیر تَزه حُکوم یازامُق، بو اُزال-باشدان بیزه معلیم بیر حُکومدیر.‏

⁶ سُیگی دییمِک، خودایینگ حُکوملِرینه گُرَه یاشاماقدان عیباراتدیر.‏ اُوال-باشدان اِشیدیشینگیز یالی، خودای بیری-بیرینگیزی سُیوپ یاشاماغی حُکوم اِتدی.‏

⁷ اِنچِمه آلداوچیلار دونیَه یایرادی.‏ اُلار عیسی مسیحینگ اینسان بُلوپ گِلِندیگینی اینکَر اِدیَرلِر.‏ بِیله آداملار یالانچیدیر و مسیحینگ دوشمانیدیر.‏

⁸ شُنونگ اوچین خاباردار بُلونگ.‏ چِکِن زَحمِتینگیزی یِله بِرمَن، اُنونگ سیلاغینی کَمیل گُرِر یالی قاییم دورونگ.‏

⁹ تِرس یُلا دوشوپ، مسیح حاقدَکی تَعلیماتدان داشلاشان آدامدا خودای یُقدور.‏ اِمّا بو تَعلیماتا گُرَه یاشایان آدامدا هِم آتا-دا، هِم اُغول-دا باردیر.‏

¹⁰ اِگِر کیمدیر بیری یانینگیزا گِلِنده، مسیح حاقدَکی تَعلیماتی گِتیرمِسه، اُنی اُیونگیزه سالمانگ و اُنگا خوش گِلدینگیز هِم آیتمانگ.‏

¹¹ اُنگا خوش گِلدینگیز دییِن اُنونگ یامان ایشلِرینه شِریک بُلیاندیر.‏

خوشلاشما سُزی

¹² سیزه یازمالی زاتلاریم کَن، یُنه اُلاری قَلَم، کاغذ بیلِن یازاسیم گِلِنُق.‏ مونگا دِرِک یانینگیزا باریپ، سیزینگ بیلِن یوزبه-یوز گورلِشِریس دییِن اومیدیم بار.‏ شُندا شاتلیغیمیز دُلوپ-آقار.‏

¹³ خودای طارافیندان سایلانیپ-سِچیلِن آیال دُغانینگیزینگ فِرزِنتلِری هِم سیزه سالام یُلّایارلار.‏