۲ قُرِنتُس‌لار 8 - مُقادِّس کیتابساخیلیغا هُوِسلِندِرمِک 1 ایندی بُلسا، اِی عزیزلِر، خودایینگ مَقدونیه‌نینگ کِلیسالارینا بِرِن مِرحِمِتی بارادا بیلمِگینگیزی ایسلِیَریس. 2 اُلار آغیر قینچیلیقلاردا ایمتِحان اِدیلسه-ده، گویچلی شاتلیقدان دُلوپ-جُشارلار و قاریپلیغی قاتی آغیر بُلسا-دا، ساخیلیغا بایدیرلار. 3 دُغرودان-دا، اُلار اِلیندِن گِلِن، حتّیٰ اُندان هِم کَن مادّی کُمِگینی ساخیلیق و راضیلیغی بیلِن بِردیلِر. 4 اُلار اورشلیمدَکی ایماندارلارا اِدیلیَن خیدماتا اُزلِرینینگ هِم شِریک اِدیلمِگینی سُراپ، بیزه یالباردیلار. 5 بو اِدِن اینتیظاریمیزدان-دا کَن بُلدی، سِبَبی اُلار اُزلِرینی اَوَّل مسیحه، سُنگرا-دا خودایینگ ایسلِگینه گُرَه بیزه اُزلِرینی باغیش اِتدیلِر. 6 شُنونگ اوچین بیز تیتوسدان سیزینگ آرانگیزدا باشلان بو خاییرلی ایشینی شُل یُلدا-دا آخیرنا چِنلی دُوام اِتمِگینی خاییش اِتدیک. 7 سیزینگ ایمانینگیز گویچلی، سیز نَدیپ واغیظ اِتمِلیدیگینی بیلیَرسینگیز. سیزینگ دوشونجَنگیز، ایخلاصینگیز و بیزدِن اُورِنِن سُیگینگیز دُلوپ-آقیار. حاقیقاتی، سیز هِمّه زادی شِیله قاوی باشاریارسینگیز. شُنونگ اوچین-ده، ساخیلیقدا-دا شِیله بُلماغینگیزی ایسلِیَریس. 8 یُق، بو سیزه حُکوم دَل، اِمّا بِیلِکی کِلیسالارینگ ایخلاصی بارادا آیتماق بیلِن، سیزینگ سُیگینگیزینگ نَدِرِجِده حاقیقیدیغینی بیلِسیم گِلیَر. 9 چونکی سیز تانگریمیز عیسی مسیحینگ مِرحِمِتینی بیلیَنگیز: اُل بای بُلسا-دا، سیزینگ خاطیرانگیز اوچین قاریپ بُلدی. عیسی مسیح مونی اُز قاریپلیغینینگ اوستو بیلِن سیزینگ بای بُلماغینگیز اوچین اِدیپدی. 10 سیز گِچِن ییل مادّی کُمِک بِرمِکده اَوَّلکی بُلماق بیلِن راضی بُلمان، مونی اولی هُوِس بیلِن اِتدینگیز. شونلوقدا اینه، سیزینگ اوچین مِنینگ ماصلاحاتیم: 11 بو ایشی اُز مومکینچیلیگینگیزدِن قاوی صوراتیندا بیتیرینگ. اُنی ایخلاصلی باشلایشینگیز یالی، ایخلاص بیلِن-ده تاماملانگ. 12 چونکی مادّی کُمِک بِرمِک هُوِسی بار بُلسا، خودای اینسانینگ یُق زادینا گُرَه دَل-ده، اِلینده بار بُلانینا گُرَه قابول اِدیَندیر. 13 بیز باشغالارینگ یوکونی یِنگلیتجِک بُلوپ، سیزه آغرام سالماق ایسلَمزُق. بیز هِمّه‌لِره دِنگلیک بُلسون دییَّریس. 14 سیزینگ بایلیغینگیز شو گون اُلارینگ مَحتَجلیگینینگ عُوِضینی دُلدورسا، اِرتیرکی گون اُلارینگ بایلیغی سیزینگ مَحتَجلیگینگیزینگ عُوِضینی دُلدورار. شِیلِلیکده، هِمّه‌لِره دِنگلیک بُلار. 15 چونکی یازیلیشی یالی: «کَن ییغنانینگ هیچ زادی آرتمادی و آز ییغنانینگ هِم هیچ کِم زادی بُلمادی». تیتوس قُرِنتُسا ایبِریلیَر 16 خودایا شوکور! اُل تیتوسینگ-دا یورِگینه مِنینگ یالی سیزه بُلان ایخلاصی سالدی. 17 تیتوس دینگه بیزینگ خاییش اِدِنیمیز اوچین دَل، شِیله بُلسا سیزه بُلان ایخلاصی سِبَپلی یانینگیزا هُوِسلیک بیلِن گیتدی. 18 تیتوسینگ یانی بیلِن ایماندار دُغانیمیزی هِم ایبِریَریس. اُنونگ خوش خاباری یایراتماقداقی خیدماتی اوچین، اُنی هِمّه کِلیسالار سیلایاندیر. 19 موندان باشغا-دا، اُل کِلیسالار طارافیندان سایلانیپ، مادّی کُمِگینی اورشلیمه اَکیتمِک اوچین بیزه یُلداش بُلماغا بِلِّندی. بیزینگ بو خاییرلی ایشیمیز خودایی بِییکلِندیریپ، یاردیم اِتمِکدَکی ایخلاصیمیزی گُرکِزیَندیر. 20 بیز شِیله ساخیلیق مادّی کُمِگینی پایلاماقدا هیچ بیر عاییپلانما سِزاوار بُلماز یالی، خاباردارلیغی اِلدِن بِرمِیَریس. 21 سِبَبی بیز دینگه خودایینگ ناظاریندا دَل، شِیله بُلسا اینسانلارینگ ناظاریندا هِم دُغری ایشلِمَگه ایخلاص بیلِن چالیشیاندیریس. 22 شِیله-ده تیتوسینگ یانی بیلِن یِنه-ده بیر ایماندار دُغانیمیزی ایبِریَریس. اُل اُزونینگ هِر هیلی ایشلِرده ایخلاصلیدیغینی نَچه گِزِک معلیم اِتدی. سیزه بُلان اینامی سِبَپلی، اُل موندان بِیلَک خاص-دا کَن ایخلاص اِتمَگه تاییاردیر. 23 تیتوس باباتدا شونی آیتماقچی: اُل مِنینگ یُلداشیم و سیزینگ آرانگیزداقی هِمکَریمدیر. بو دُغانلاریمیز بُلسا کِلیسالارینگ ایبِرِنلِری و عیسی مسیحینگ بِییکلیگیدیر. 24 شُنگا گُرَه-ده، اُلارینگ بارینا اُز سُیگینگیزی گُرکِزیپ و سیز باباتداقی قووانجیمیزینگ بیدِرِکدَلدیگینی هِمّه کِلیسالارا معلیم اِدینگ. |
© Turkmen Truth