۲ قُرِنتُس‌لار 7 - مُقادِّس کیتاب

¹ اِی سُیگولی دُستلاریم، خودای بیزه، اینه، شِیله واعدالاری بِریپدیر!‏ شُنونگ اوچین-ده، گِلینگ، بِدِنیمیزی و روحومیزی زییان یِتیریَن هِمّه زاتدان پَک اِدِیلینگ.‏ خودایدان قُرقوپ، کَمیل مُقادِّس بُلماغا چالیشایلینگ.‏

پولسینگ شاتلیغی

² بیزی یورِگینگیزده جای بِرینگ.‏ بیز هیچ کیمه حاقسیزلیق اِتمِدیک، هیچ کیمی آزدیرمادیق و هیچ کیمدِن پِیدالانمادیق.‏

³ مِن بولاری سیزی عاییپلاماق اوچین آیدامُق.‏ سِبَبی اُزال هِم آیدیشیم یالی، یورِگیمیزینگ دویبونده جایینگیز باردیر، بیز یاشاساق-دا، اُلسِک-ده بیله بُلاریس.‏

⁴ سیزه قاتی اینانیارین و قاتی قووانیارین!‏ مِن شِیله اولی تِسِلّی تاپدیم.‏ قینچیلیقلاریمیز هِر هیلی آغیر بُلسا-دا، شاتلیغیمینگ اِندازاسی یُقدور.‏

⁵ بیز مَقدونیه بارانیمیزدا-دا، هیچ بیر راحاتلیق تاپمادیق.‏ قایتام، داش-تُوِرِگیمیزده داعوا-جِنجِل‍لِر، یورِگیمیزده قُرقی بُلوپ، هِر یاندان قیسیلدیق.‏

⁶ اِمّا خودای غامگینلارا تِسِلّی بِریَندیر.‏ اُل تیتوسی یانیمیزا ایبِریپ، بیزه هِم تِسِلّی بِردی.‏

⁷ بیز دینگه تیتوسینگ گِلمِگیندِن دَل، شِیله بُلسا اُنگا بِرِن تِسِلّینگیز بارادا اِشیدیپ-ده، تِسِلّی تاپدیق.‏ اُل سیزینگ مِنی کویسِیَندیگینگیز، هِیوِره کَن قینانجینگیز و مانگا بُلان اولی ایخلاصینگیز بارادا گورّونگ بِرِنده، شاتلیغیم اُنگکودِن-ده آرتدی.‏

^8-9 مِن سیزی اُز نامه‌ام بیلِن قیناندیران-دا بُلسام، اُنی یازانیما اُکونِمُق.‏ هاووا، اُنگ بیرآز اُکونیپدیم، یُنه بو نامه‌نگ سیزی دینگه آز واقتلیق قیناندیرانینی بیلیپ، ایندی شاتلانیارین.‏ مِن سیزینگ قینانانینگیزا دَل-ده، شُل قینانمانگیزینگ اوستو بیلِن توبا گِلِنینگیزه شاتلانیارین.‏ سیزینگ قینانماغینگیز خودایداندیر، بیزدِن زییان گُرِن دَلسینگیز.‏

¹⁰ چونکی خودایدان بُلان قینانچ آدامی توبا گِتیریپ، اُنونگ نِجات تاپماغینا سِبَپ بُلیار.‏ بو توبا اُکوندیریَن دَلدیر.‏ اِمّا دونیَه‌دِن بُلان قینانچ اُلومه اِلتیَندیر.‏

¹¹ خودایدان بُلان قینانجینگ سیزده اِدِنلِرینی بیر گُرونگ!‏ اُل سِبَپلی سیزده نَهیلی قایرات، اُزونگیزی پَکلِمَگه نَهیلی ایخلاص دُرِتدی!‏ اُل سیزده، گُر، نَهیلی ناراضیچیلیق، قُرقی، نَهیلی کویسِمِک، ایخلاص و عادالاتا بُلان ایسلِگی توروزدی.‏ سیز بو مِسِله‌ده هِمّه طارافلایین تاقصیرسیزدینگیزی گُرکِزدینگیز.‏

¹² شونلوقدا، مِن شُل نامه‌نی یازان هِم بُلسام، اُنی نه اِذیِت بِرِنی عاییپلاماق اوچین، نه-ده اِذیِت بِرلِنینگ طارافینی توتماق اوچین یازیپدیم.‏ مِن اُنی بیزه اِدیَن ایخلاصینگیز خودایینگ حوضوریندا اُزونگیزه-ده آیان بُلسون دییّپ یازیپدیم.‏

¹³ بولارینگ باری بیزه تِسِلّی بِردی.‏ سیز تیتوسی شاتلاندیریپ، اُنونگ یورِگینه تِسِلّی بِریپسینگیز.‏ بیز اُنونگ شاتلیغینی گُرِنیمیزده، مونگا اُز شاتلیغیمیزدان-دا کَن بِگِندیک.‏

¹⁴ مِن اُنونگ یانیندا سیز باباتدا قووانیپدیم، سیز-ده مِنینگ یوزومی یِره سالمادینگیز.‏ سیزه آیدانلاریمیزینگ اِلمیداما حاقیقات بُلشی یالی، تیتوسینگ اُووندَکی قووانجیمیزینگ هِم حاقیقاتدیغی بِلّی بُلدی.‏

¹⁵ اُل هِمَّه‌نگیزینگ موطیع بُلاندیغینگیزی، اُنی قُرقی و حُرمات بیلِن قابول اِدیشینگیزی یادلاندا، سیزه بُلان سُیگوسی خاص هِم آرتیار.‏

¹⁶ شونلوقدا، مِن هِر زاتدا سیزه بیل باغلاپ بیلیَندیگیمه خاص شاتلانیارین.‏