۲ قُرِنتُس‌لار 4 - مُقادِّس کیتابخوش خاباری صادیقلیق بیلِن واغیظ اِتمِک 1 خودای مِرحِمِت اِدیپ، بیزه بو خیدماتی بِردی و شُنونگ اوچین-ده، یورِگیمیز ساویمایار. 2 بیز عاییپلی بُلانی اوچین اوتانچلی و گوزگینلیکده اِدیلیَن ایشلِری رِد اِتدیک. حیله‌لیک اِتمِیَریس و خودایینگ سُزونی اویتگِتمِیَریس. تِرسینه، حاقیقاتی آچیق اِعلان اِدیپ، خودایینگ حوضوریندا هِمّه‌لِرینگ اُوونده جُغاپ بِرمَگه تاییاردیریس. 3 اِگِر بیزینگ واغیظ اِدیَن خوش خاباریمیز اُرتگولی بُلسا، اُل هِلَکچیلیک یُلوندان باریانلار اوچین اُرتگولیدیر. 4 بو دونیَه‌نینگ حُکومداری شِیطان ایمان گِتیرمِدیکلِرینگ دوشومینی باغلادی. شُنونگ اوچین-ده اُلار خودایینگ صوراتی بُلان عیسی مسیحینگ بِییکلیگینینگ خوش خابارینینگ نورینی گُروپ بیلمِیَرلِر. 5 بیز اُزومیز بارادا دَل-ده، عیسی مسیحینگ تانگریدیغی بارادا واغیظ اِدیَریس. اُزومیزی بُلسا عیسانینگ خاطیراسینا سیزینگ خیدماتکَرینگیز دییّپ حاساپلایاریس. 6 چونکی «قارانگقیلیقدا نور پارلاسین» دییِن خودای بیزینگ-ده یورِکلِریمیزی یاغتیلاندیریپ، عیسی مسیحینگ یوزونده پارلایان اُز بِییکلیگینی بیزه تانیتدی. 7 بیز خازینانی اُزونده ساقلایان کویزه‌لِر کیمیندیریس. شُنونگ اوچین-ده، بو عجاییپ قودراتینگ بیزدِن دَل-ده، خودایداندیغی اَشکَردیر. 8 بیز هِر طارافدان قیسیلیاریس، یُنه آورانمایاریس. بیز چاره‌سیز یاغدایا دوشیَریس، یُنه اومیدیمیزی اِلدِن بِرمِیَریس. 9 آزارلانیاریس، یُنه تِرک اِدیلمِیَریس. یِنجیلیَریس، یُنه هِلَک بُلمایاریس. 10 عیسی مسیحینگ یاشاییشی بِدِنیمیزده آیان بُلسون دییّپ، اُنونگ اُلومینی اِلمیداما بِدِنیمیزده گُتِریَریس. 11 بیزینگ فانی بِدِنیمیزده عیسی مسیحینگ یاشاییشی آیان بُلسون دییّپ، بیزی، یَعنی دیریلِری اِلمیداما اُنونگ خاطیراسینا اُلومه تابشیریارلار. 12 شِیلِلیکده سیزینگ یاشاییش تاپماغینگیز اوچین، بیز اُلوم بیلِن یوزبه-یوز بُلماغا-دا تاییاردیریس. 13 مُقادِّس یازغیلاردا: «ایمان گِتیردیم، شُنونگ اوچین کِپلِدیم» دییّپ یازیلاندیر. شُل ایمانینگ روحونینگ اوستو بیلِن بیز-ده ایمان گِتیریَریس، شُنونگ اوچین-ده کِپلِیَریس. 14 بیز تانگریمیز عیسی مسیحی اُلومدِن دیرِلدِن خودایینگ بیزی هِم عیسی بیلِن بیلِلیکده دیرِلدیپ، سیز بیلِن بیرلیکده اُز حوضوریندا قُیجاقدیغینی بیلیَریس. 15 بولارینگ باری سیزینگ اوچین اِدیلیَر. شِیدیپ خودایینگ مِرحِمِتی کَندِن-کَن آداملارا یِتیپ، اُلارینگ شوکورلِرینی آرتدیرار و خودایینگ بِییکلیگینی خاص-دا بِیگِلدِر. 16 شُنگا گُرَه-ده، بیزینگ یورِگیمیز ساویمایار. بیزینگ داشقی گُرنوشیمیز کُهنه‌لسه-ده، ایچکی گُرنوشیمیز گونبه-گون تَزه‌لِنیَندیر. 17 چونکی واقتلایین و یِنگیل قینچیلیقلاریمیز بیزه خاص عجاییپ، اولی و اِبِدی بِییکلیک قازاندیرار. شُندا بو قینچیلیقلار اِدیل بُلمادیق یالی بُلار. 18 بیز ناظاریمیزی گُرونیَن زاتلارا دَل-ده، گُرونمِیَن زاتلارا تیکیَریس. سِبَبی گُرونیَن زاتلار واقتلایین، گُرونمِیَن زاتلار بُلسا اِبِدیدیر. |
© Turkmen Truth