۲ قُرِنتُس‌لار 3 - مُقادِّس کیتاب1 بیز یِنه-ده اُزومیز بارادا قایتادان تانیشلیق بِرمِلیمی؟ نَمه، بیز کَبیرلِری یالی سیزه یا-دا سیزدِن بُلان تانیتما نامه‌لارینا مَحتَجمی؟ 2 یُق! بیزینگ تانیتما نامه‌میز سیزسینگیز! بو نامه بیزینگ یورِکلِریمیزه یازیلاندیر. اُل هِمّه‌لِره معلیمدیر، اُنی هِمّه‌لِر اُقیپ-دا بیلیَر. 3 مسیحینگ نامه‌سی سیزسینگیز، بو مِسه-معلیم زات و بو نامه‌میز خیدماتیمیزینگ نِتیجه‌سیدیر. بیز اُنی جوهِر بیلِن دَل-ده، دیری خودایینگ روحونینگ اوستو بیلِن یازدیق. اُل یاسّی داش بُلِکلِرینه دَل-ده، اینسان یورِگینه یازیلاندیر. 4 بو باباتدا مسیحینگ اوستو بیلِن خودایینگ حوضوریندا بیزینگ شِیله اینامیمیز باردیر. 5 بو ایشی اُز-اُزومیزدِن باشاریاریس دییّپ آیتماغا هیچ دِلیلیمیز یُقدور، بو باشارجاغی بیزه خودای بِریَر. 6 اُل بیزه تَزه عَهدینگ خیدماتچیلاری بُلماق باشارجاغینی بِردی. بو عَهد یازیلان شِریغاتینگ اوستو بیلِن دَل-ده، مُقادِّس روحونگ اوستو بیلِن قاییملاناندیر. چونکی یازیلان شِریغات اُلومه اِلتیَر، اِمّا مُقادِّس روح بُلسا یاشاییش بِریَر. تَزه عَهدینگ بِییکلیگی 7 هاووا، داش بُلِکلِرینه قازیلیپ یازیلان شِریغات اُلومه اِلتیَردی. اِمّا مونگا باقمازدان، خودایینگ بِییکلیگی موسانینگ یوزونه نور دوشوروپدی. بو نور فانی بُلسا-دا، اسرائیل خالقینینگ گُزونی یومدیریپدی. اِگِر اُلومه اِلتیَن خیدماتینگ بِییکلیگی شِیله بُلسا، 8 اُندا خودایا مُقادِّس روحونگ اوستو بیلِن خیدمات اِتمِکلیگینگ بِییکلیگی اُندان یاغتی دَلمیدیرمی نَمه؟ 9 اِگِر آداملاری اُلومه مَحکوم اِدیَن خیدمات بِییک بُلان بُلسا، اُندا آداملاری خودایینگ ناظاریندا تاقوالی اِدیَن خیدماتینگ بِییکلیگی اُندان-دا خاص بِییکدیر. 10 چونکی هِمّه زاتدان بِییک بُلان بِییکلیک اُرتا چیقاندان سُنگ، اُزالقی بِییکلیک هیچ بُلوپ قالدی. 11 اِگِر فانی خیدمات شِیله بِییک بُلسا، اُندا باقی خیدمات اُندان گُر-باق ناقادار بِییک بُلار! 12 بیز شِیله اومیدیمیز بُلانی اوچین باتیرلیق بیلِن حِرِکِت اِدیَریس. 13 بیز موسی یالی دَلدیریس. اُل اسرائیل خالقی فانی بِییکلیگینگ سُنگونی گُرمِسین دییّپ یوزونی اُرتیَردی. 14 یُنه اُلارینگ عاقیلی چاتمادی، سِبَبی کُهنه عَهد اُلارا اُقیلیپ بِرلِنده، بو اُرتگی هِنیز-ده یوزلِرینی باسیریاندیر. چونکی بو اُرتگی دینگه عیسی مسیحه ایمان گِتیرلِنده آیریلیار. 15 موسانینگ کیتابی حتّیٰ شو گونه چِنلی اُقیلاندا-دا، بو اُرتگی اُلارینگ یورِگینی باسیریار. 16 اِمّا هِر واقت مسیحه طاراف اُورولِنلِرینده، بو اُرتگی آیریلیار. 17 خودای روحدیر و خودایینگ روحی نیرِده بُلسا، آزادلیق هِم شُل یِردِدیر. 18 بیز هِم یوزومیزی باسیرمان، خودایینگ بِییکلیگینینگ یالقیمینی گُریَریس. خودایینگ روحی هِمَّه‌میزی گیتدیگیچه نورلاندیریپ، بیزی اُز صوراتینا اویتگِدیَر. |
© Turkmen Truth