۲ قُرِنتُسلار 12 - مُقادِّس کیتابپولسه گِلِن آیانلیقلار 1 هیچ پِیداسی بُلماسا-دا، قووانماغیمی دُوام اِتدیرمِلی بُلیارین. ایندی مسیحدِن گِلِن رویالاریما و آیانلیقلاریما یوزلِنیَرین. 2 مِن مسیحده بیر آدامی تانییارین، اُل اُن دُرت ییل موندان اُزال آسمانلارینگ اوچونجی آسمانینا اَکیدیلدی. بو بُلوشی بِدِنده یا-دا بِدِندِن داشاردا بُلوپمی – بیلِمُق، مونی خودای بیلیَر. 3-4 هاووا، مِن شِیله آدامی تانییارین. اُل بِدِندِمی یا بِدِندِن داشاردامی – بیلِمُق، مونی دینگه خودای بیلیَر، قاراز، بِهِشته اَکیدیلیَر. اُل یِرده سُز بیلِن بِیان اِدیپ بُلماجاق عجاییپ زاتلاری، اینسانا آیتماغا اِجازا بِریلمِدیک زاتلاری اِشیدیَر. 5 اینه، مِن شِیله آداما قووانیارین. اِمّا اُزوم باباتدا دینگه اِجیزلیگیم بُلایماسا، باشغا قووانماغا زادیم یُق. 6 اِگِر قووانمالی بُلایسام-دا، دوشونسیزینگ اِدیشی یالی اِتمِیَرین، چونکی حاقیقاتی آیدیارین. اِمّا مِن قووانماقدان داش دوریارین. یُغسا کیمدیر بیری مِنی اُز گُرِنیندِن یا اِشیدِنیندِن آرتیقماچ میقام دییّپ گومَن اِدَیمِسین. 7 مانگا شِیله بِییک آیانلیقلارینگ بِرلِندیگی سِبَپلی اُزومی یُقاری توتماز یالی، مانگا شِیطانینگ بیر پِریشده‌سی، یَعنی بِدِنیمه اِذیِت بِرمِک اوچین بیر تیکِن بِریلدی. 8 اُنی مِندِن آییرسین دییّپ، مسیحه اوچ گِزِک یالباردیم. 9 اِمّا مسیح شِیله دییدی: «سانگا بِرِن مِرحِمِتیم بِسدیر، سِبَبی مِنینگ قودراتیم اِجیزلیکده کَمیلِّشیَندیر». شُنونگ اوچین-ده، مسیحینگ گویجی مِنده مِسکِن توتسون دییّپ، اُز اِجیزلیکلِریم بارادا قاتی شاتلیق بیلِن قووانیارین. 10 شو سِبَپدِن مِن مسیحینگ خاطیراسینا اِجیزلیکلِره، تُهمِتلِره، مَحتَجلیکلِره، آزارلانمالارا، قینچیلیقلارا راضیدیرین. چونکی مِن اِجیزکَم، شُندا گویچلیدیرین! پولس قُرِنتُسلار بارادا قایغی اِدیَر 11 مِن قووانیپ، بیر دوشونسیز یالی بُلدوم. یُنه مِنی مونگا سیز مِجبور اِتدینگیز-اَ ! آصلیندا مِنی سیز تعریف اِتمِلیدینگیز. مِن هیچ بُلایسامدا-دا، اُزلِرینی بِییک بیلیَن شُل رِسول‍لاردان آشاق دَل آخیرین. 12 حاقیقی رِسولّیغینگ نیشانلارینی آرانگیزداقام عالاماتلاردا، مُعجِزه‌لِرده و قودراتلاردا اولی جیداملیلیق بیلِن گُرکِزِندیرین. 13 مِن سیزه بِیلِکی کِلیسالاردان آزراق باقدیمّی نَمه؟ هَه، هاووا، مِن سیزه آغرام سالمادیم-اُو! بو «عادالاتسیزلیغیم» اوچین مِنی باغیشلاوِرینگ! 14 اینه، یانینگیزا گیتمِک اوچین اوچونجی گِزِک یُل شاییمی حَضیرلییَرین. مِن سیزه آغرام سالمارین، سِبَبی مِن مال-مولکینگیزه دَل-ده، دیدارینگیزا زاردیرین. قالیبِرسه-ده، فِرزِنتلِر اِنه-آتالاری اوچین دَل-ده، اِنه-آتا فِرزِنتلِری اوچین مال-مولک ییغنامالیدیر. 15 مِن سیزه دینگه هِمّه زادیمی دَل، حتّیٰ جانیمی هِم اولی شاتلیق بیلِن بِرِرین. مِن سیزی شِیله سُییَرین! اُندا نَمه اوچین سیز مِنی بِیله آز سُییَرسینگیز؟ 16 مِنینگ سیزه آغرام سالماندیغیم بیلِن راضیلاشیارسینگیز. اِمّا شُندا-دا مِکرلیک اِدیپ، سیزی حیله بیلِن پِیدالانیپدیرین دییّپ، مِنی عاییپلایارسینگیز. 17 یُنه نَدیپ؟ مِن یانینگیزا ایبِرِن آداملاریمینگ اوستو بیلِن سیزی هِی-ده اُز پِیدام اوچین ایشلِتدیمّی نَمه؟ 18 مِن تیتوسدان سیزینگ یانینگیزا گیتمِگینی خاییش اِتدیم. اُنونگ یانی بیلِن ایماندار دُغانیمیزی هِم ایبِردیم. اُندا تیتوس سیزی اُز پِیداسی اوچین ایشلِتدیمی؟ اُندا بیز شُل بیر مُقادِّس روحا گُرَه یاشامایاریسمی؟ شُل بیر یُلونگ ایزینا دوشمِیَریسمی نَمه؟ 19 هَه، سیز هِنیز-ده اُزومیزی سیزینگ اُوونگیزده آقلایاندیریس دییّپ گومَن اِدیَنگیزمی نَمه؟ یُق، بیز مسیحه دِگیشلی بُلوپ، خودایینگ حوضوریندا سیزه شونی آیدیاریس: اِی سُیگولی دُستلار، بیزینگ هِمّه اِدیَنلِریمیز سیزی گویچلِندیرمِک اوچیندیر. 20 مِن یانینگیزا بارانیمدا، بیری-بیریمیز باباتداقی اومیدیمیز پوچ چیقارمیقا دییّپ قُرقیارین. بارانیمدا داعوا-جِنجِل، باخیلچیلیق، قاهار-غاضاب، مِنلیلیک، تُهمِت، غیبات، غُرور و تِرتیبسیزلیگی گُرِرمیکَم دییّپ قُرقیارین. 21 مِن یانینگیزا بارانیمدا، خوداییم مِنی اُوونگیزده اوتاندیرمادان قُرقیارین. اُزال گونَه اِدیپ، اِدِن آخلاقسیزلیقلاری، زینالاری و آزماقلاری اوچین توبا اِتمِدیکلِرینگ کَنسی یانگا یاس توتمالی بُلارمیقام دییّپ قُرقیارین. |
© Turkmen Truth