۲ قُرِنتُس‌لار 11 - مُقادِّس کیتابپولس و یالان رِسول‍لار 1 اِی کاش، مِنینگ عاقیلسیزلیغیما آز-کِم جیداسادینگیز و شِیدیپ هِم جیدادینگیز! 2 مِن سیزی خودایینگ ایخلاصیلیغی بیلِن ایخلاص اِدیَندیرین. سِبَبی مِن سیزی پَک قیز حُکمونده مسیحه هُدورلِمِک اوچین دینگه بیر اَرَه نییِتلِدیم. 3 یُنه ییلانینگ حَوّانی مِکرلیک بیلِن آلدایشی یالی، سیزینگ-ده آلدانماغینگیزدان قُرقیارین. مِن فیکرلِرینگیزینگ بولاشدیریلیپ، مسیحه بُلان پَک صادیقلیغینگیزدان آیریلارمیقانگیز دییّپ قُرقیارین. 4 چونکی کیمدیر بیری گِلیپ، بیزینگ واغیظ اِدِنیمیزدِن باشغا عیسانی واغیظ اِدِنده، سیز اُنگا جیدایانگیز! واخ، سیز قابول اِدِن مُقادِّس روحونگیزدان باشغا بیر روحی یا-دا باشغا «خوش خاباری» قابول اِتمَگه-ده تاییار آخیرین! 5 یُنه گومَن اِتمِیَرین مِن سیزینگ شُل «بِییک رِسول‍لارینگیزدان» آصلا کِم دَلدیرین! 6 مِن کِپه اُکده بُلماسام-دا اِمّا بیلیمده کِمیم یُقدیر. بیز مونی هِمّه زاتدا سیزه اَشکَر گُرکِزِندیریس. 7 مِن سیزی بِیگِلتمِک اوچین، اُزومی پِسِلتدیم، خودایینگ خوش خابارینی مُفت واغیظ اِتدیم. اُندا شِیله اِتمِک بیلِن گونَه قازاندیمّیقام؟ 8 مِن سیزه خیدمات اِتمِک اوچین، بِیلِکی کِلیسالاردان مادّی کُمِگینی آلیپ، اُلاری غارات اِدِن یالی بُلدوم. 9 مِن آرانگیزدا بُلوپ، مَحتَجلیک چِکِنیمده-ده، سیزینگ هیچ بیرینگیزه آغرام سالان دَلدیرین. سِبَبی گِرِک زاتلاریمینگ بارینی مَقدونیه‌دِن گِلِن دُغانلاریم تاییار اِتدیلِر. مِن هایسیدیر بیر زاتدا سیزه آغرام سالماقدان ساقلاندیم، موندان بِیلَک-ده آغرام سالمارین. 10 مسیحینگ مِندَکی حاقیقاتیندان قاسام ایچیَرین: آخائیه‌دَکیلِرینده یاشایانلارینگ بیری-ده مِنی بو قووانمادان ماحروم اِدیپ بیلمِز! 11 اُندا مِن نَمه اوچین سیزه آغرام سالمادیم؟ سیزی سُیمِیَندیگیم اوچینمی نَمه؟ یُق، سیزی سُییَندیگیمه خودای شاهاتدیر. 12 مِن موندان بِیلَک-ده حَضیرکی اِدیَنلِریمی دُوام اِدِرین. سِبَبی مِن اُزلِرینی بیز بیلِن دِس-دِنگ ایشلِیَندیر دییّپ فیکر اِدیپ، قووانماغا فُرصَت آغتاریانلارا باهانا بِرمِرین. 13 چونکی شِیله آداملار یالان رِسول‍لاردیر. اُلار مسیحینگ رِسول‍لارینینگ صوراتینا گیریَن آلدییانچی ایشچیلِردیر. 14 گِنگ قالیپ اُتورماغا زات یُق، سِبَبی شِیطانینگ اُزی-ده نور سِچیَن پِریشدَه‌نینگ صوراتینا گیریپ بیلیَندیر! 15 شُنگا گُرَه-دَه، اُنونگ قولّوقچیلاری-دا تاقوالیق خیدماتکَرلِرینینگ صوراتینا گیرمِگی گِنگ زات دَلدیر. یُنه اُلارینگ آخیری اِدِن ایشلِرینه گُرَه بُلار. پولس اُز قینچیلیقلارینا قووانیار 16 یِنه-ده قایتالایارین: مِنی دوشونسیز بیلمَنگ! اِگِر بیلیَن بُلسانگیز، مِنی هِم بیر دوشونسیز حُکمونده قابول اِدینگ-ده، بیرآز قووانماغا اِجازا بِرینگ. 17 اِلبِتّه، ایندی آیتجاقلاریم مسیحدِن دَل، مِن بیر دوشونسیز کیمین قووانجاقدیرین. 18 هاووا، مِن هِم قووانیپ گُرِیین-اَ، سِبَبی بو دونیَه‌نینگ آداملاری قووانماغی میناسیپ حاساپلایارلار-آ ! 19 چونکی سیز قاتی دوشوملی بُلوپ، یِنه دوشونسیزلِره شاتلیق بیلِن جیدایارسینگیز-آ ! 20 هاووا، سیز قول اِدیلیَندیگینگیزه، حاقینگیزینگ اییّلیَندیگینه، اُزونگیزه ظولوم اِدیلیَندیگینگیزه، سیزه باشلیقلیق اِدیَنلِره یا یوزونگیزه شاپباق اوریانلارا شِیله جیداملی آخیرین! 21 اوتانسام-دا، شونی بُیون آلیارین: بیز سیزدِن گویچسیز بُلوپ، سیز یالی بُلوپ بیلمَندیرسیک! شونلوقدا، سیزینگ اوچین هِنیز-ده دوشونسیز بُلماق بیلِن، شونی دییَّرین: بِیلِکیلِرینگ قووانماغا قُرقمایانلارینا مِن-ده قُرقمایارین. 22 اُلار عِبرانیمی؟ مِن-ده عِبرانیدیرین! اُلار اسرائیل‌لیمی؟ مِن-ده اسرائیل‌لیدیرین! اُلار ابراهیمینگ نِسلیمی؟ مِن-ده ابراهیمینگ نِسلیدیرین! 23 مسیحینگ خیدماتکَرلِریمی؟ دیوانالار یالی شونی دییَّرین: مِن اُلاردان-دا کَنرَکدیرین! مِن اُلاردان خاص کَن زَحمِت چِکدیم، زیندانلارا-دا اُلاردان نَچه گِزِک-ده کَن دوشدوم. یِنجیلمِکده-ده اُلاردان کَن اورلوپ-یِنجیلدیم. اُلار بیلِن دِنگِشدیریلِنده اُلوم خاطاری بیلِن نَچه گِزِک یوزبه-یوز بُلدوم. 24 یَهودیلِردِن بَش گِزِک اُتوز دُقوز سانی شالّاق اییدیم. 25 اوچ گِزِک تایاقلاندیم، بیر گِزِک داشلاندیم، اوچ گِزِک کِشتیمیز غارق بُلدی، بیر گیجه-گوندیزیمی دِریادا گِچیردیم. 26 مِن اِلمیداما یُلدا بُلماق بیلِن، آرنالاردا خُوف-خاطارلارا ساتاشدیم. غارات اِدیَنلِردِن، اُز ایلیمدِن و بیگانه میلِّتلِردِن یانگا خُوف ایچینده گِزدیم. شَهرده، بیاباندا، دِریادا، یالان ایماندارلارینگ آراسیندا خُوف-خاطارلارا ساتاشدیم. 27 مِن آغیر زَحمِت چِکدیم، زُر ایشده ایشلِدیم، اِنچِمه گیجَه‌نی اوقوسیز گِچیردیم. آچ-سوسوزلیغینگ نَمِدیگینی بیلیَرین، آچلیقدا گِزدیم، سُووقدا یاریم-یالانگاچ قالدیم. 28 بولاردان باشغا-دا، هِمّه کِلیسالار باراداقی قایغیلار گونده گِرشیمه آغیر آغرام سالیار. 29 کیمدیر بیری اِجیزلَنده، مِن هِم اِجیزلِمِیَرینمی؟ کیمدیر بیری گونَه طارافا بودرییِنده، یورِک-باغریم یانمایارمی نَمه؟ 30 اِگِر قووانمالی بُلایسام-دا، اُز اِجیزلیگیم بیلِن قووانیارین. 31 باقی بِییکلیگَه میناسیپ خودای و تانگری عیسانینگ آتاسی مِنینگ یالان آیتمایاندیغیمی بیلیَندیر. 32 دمشق شَهرینده حارِث پادیشاهینگ وِلایات حاکیمی مِنی زیندان اِتمِک اوچین، شَهری قاراوولچیلیق ایچینده ساقلایاردی. 33 اِمّا مِنی سِبِده سالیپ، شَهرینگ دیوارینداقی پِنجِره‌دِن آشاق سالّادیلار. شِیدیپ، اُنونگ اِلیندِن قاچدیم. |
© Turkmen Truth