۲ قُرِنتُس‌لار 1 - مُقادِّس کیتاب1 خودایینگ اِراداسی بیلِن عیسی مسیحینگ رِسولی بُلان مِن پولسدِن و دُغانیمیز تیموتاوس‌دان خودایینگ قُرِنتُس‌داقی کِلیساسینا، شِیله-ده هِمّه آخائیه وِلایاتینداقی ایماندارلارینگ بارینا دُغایی سالام! 2 آتامیز خودایینگ و تانگریمیز عیسی مسیحینگ مِرحِمِتی و پاراحاتلیغی، قُی، سیزه بُلسون! قینچیلیقدا تِسِلّی بِریَن خودای 3 هِمّه تِسِلّیلِرینگ چِشمه‌سی بُلان رِحملی آتا خودایا، تانگریمیز عیسی مسیحینگ خودایینا و آتاسینا شوکورلِر بُلسون! 4 خودای هِمّه قینچیلیقلاریمیزدا بیزه تِسِلّی بِریَر. بیز هِم اُز نوبَتیمیزدا هِر هیلی قینچیلیقلارا دوچار بُلان آداملارا خودایدان آلان تِسِلّیمیزینگ اوستو بیلِن تِسِلّی بِریَریس. 5 چونکی عیسی مسیحینگ عاذاپلارینینگ دورموشیمیزدا آرتیشی یالی، اُنونگ اوستو بیلِن خودایدان آلیان تِسِلّیمیز-ده آرتیاندیر. 6 اِگِر بیز زَحمِتلِر گُریَن بُلساق، بو سیزینگ تِسِلّی تاپماغینگیز و نِجات تاپماغینگیز اوچیندیر. خودای بیزه تِسِلّی بِریَن بُلسا، بو بیزینگ-ده سیزه تِسِلّی بِرمِگیمیز اوچیندیر. سیز هِم بیز یالی زَحمِتلِر گُرِنینگیزده، شو تِسِلّیمیزدِن تِسِلّی تاپیپ، قینچیلیقلارینگ بارینا جیدارسینگیز. 7 سیزه باغلایان اومیدیمیز قاییمدیر، سِبَبی سیزینگ دینگه قینچیلیقلاریمیزا دَل، اُندان باشغا تِسِلّیمیزه-ده شِریکدیگینگیزی بیلیَریس. 8 اِی عزیزلِر! بیزینگ آسیا وِلایاتیندا باشیمیزا اینِن قینچیلیقلاردان سیزینگ-ده خابارلی بُلماغینگیزی ایسلِیَریس. بو قینچیلیقلار چِکیپ-جیدامادان خاص آغیردی و بیز دیری قالاریس دییّپ-دا اومیدیمیز یُقدی. 9 هاووا، آجال بیزینگ یاقامیزدان توتاندیر دییّپ فیکر اِتدیک. بو یاغدای بیزینگ اُزومیزه دَل-ده، دینگه خودایا، اُلولِری دیرِلدیَن خودایا تَوَکُّل اِدِنیمیز اوچین یوزه چیقیپدی. 10-11 خودای بیزی اُلومینگ پِنجِسیندِن آزاد اِتدی و یِنه-ده آزاد اِدِر. بیزینگ اوچین اِدیَن دُغالارینگیزینگ اوستو بیلِن اُنونگ بیزی یِنه-ده آزاد اِتجِکدیگینه اومید باغلایاریس. شُندا کَن آداملارینگ دُغاسینا جُغاپ حُکمونده بیزه بِرلِن مِرحِمِت اوچین کَن آداملار خودایا شوکور اِدِرلِر. پولس نییِتینی اویتگِدیَر 12 اینه، بیز شونگا قووانیاریس: بیز هِر کِس، خاص-دا سیز باباتدا خودایینگ بِرِن دُغریلیغی و پَک یورِکلیگی بیلِن حِرِکِت اِدیَریس. بیز مونی دونیَه‌نینگ حِکمِتینه دَل-ده، خودایینگ مِرحِمِتینه دایانیپ اِدیَریس. مونگا بیزینگ وِجدانیمیز-دا شاهاتدیر. 13-14 بیزینگ سیزه یازانلاریمیزدا اُقیپ دوشونمِز یالی آچیق بُلمادیق زات یُق. سیز بیزه حَضیر بیر اِندازا دوشونیَرسینگیز، یُنه سُنگرا کَمیل دوشونِرسینگیز دییِن اومیدیم بار. اُنسُنگ تانگریمیز عیسی مسیحینگ گِلجِک گونونده بیزینگ سیزه قووانجیمیز یالی، سیز-ده بیزه قووانیپ بیلِرسینگیز. 15 بو باباتدا اینامیم بُلانسُنگ، یانینگیزا ایکی گِزِک باریپ، بِرِکِتینگیزی آرتدیرماقچیدیم. 16 سُنگرا مَقدونیه گیدیپ، اُندان سُنگ یِنه سیزه طاراف دُلانماقچیدیم. اُل یِردِن یهودیه یوردونا مِنی یُلا سالارسینگیز دییِن نییِتیم باردی. 17 اُندا مِن اُز نییِت اِدِنلِریمده ایکی گُوونلیمی؟ یا-دا بولاری نییِت اِدِنیمده بو دونیَه‌نینگ آداملاری یالی اویتگَپ، اَوَّل «هاووا، هاووا»، سُنگرا-دا «یُق، یُق» دییَّرینمی نَمه؟ 18 بُلشی یالی خودای اِمیندیر، بیزینگ سیزه آیدان سُزیمیزینگ هِم «هاووا»، هِم «یُق» دَلدیگینه اُل شاهاتدیر. 19 مِن، سیلاس و تیموتاوس آرانگیزدا خودایینگ اُغلی عیسی مسیح بارادا واغیظ اِتدیک. بیزینگ واغیظ اِدِن عیسی مسیحیمیز هِم «هاووا»، هِم «یُق» دییِن دَلدیر. خودای عیسی مسیحینگ اوستو بیلِن «هاووا» دییَّندیر. 20 چونکی خودایینگ بِرِن واعدالارینینگ هِمّه‌سی عیسی مسیحده «هاووادیر». خودایی بِییکلِندیریپ آیدیان «اَمین» دیلیمیز-ده عیسی مسیحینگ اوستو بیلِندیر. 21 خودای بیزی سیز بیلِن بیرلیکده عیسی مسیحه باغلاپ، ایماندا قاییم دورماغیمیزا یاردیم بِریَر. اُل بیزی سِچیپ سایلادی-دا، 22 مُهورلَپ، بولارینگ ضامِن حُکمونده یورِگیمیزه مُقادِّس روحونی بِردی. 23 مِن سیزی قیناندیرمایین دییّپ، قُرِنتُسا دُلانیپ بارمادیم. مونونگ حاقیقاتدیغینا خودای-دا شاهاتدیر. 24 بیز سیزینگ ایمانینگیزینگ اوستوندِن حُکوم سورمِکچی بُلامزُق، تِرسینه، شاتلیغینگیزینگ خاطیراسینا سیز بیلِن هِمکَرلیک اِدیَریس، چونکی سیز ایماندا قاییم دورسونگیز. |
© Turkmen Truth