۱ تیموتاوس 6 - مُقادِّس کیتابقوللار باراداقی ناصیحاتلار 1 خودایینگ آدینا و اُورِدیَن تَعلیماتیمیزا دیل یِتمِز یالی، قولچولیق آشاغینداقیلارینگ باری اُز آقالارینی سیلاغ-حُرماتا لاییق بیلسین. 2 آقالاری ایماندار بُلان قول‍لار: «ایندی بیز دُغاندیریس» دییّپ، اُز آقالارینا بیتاپاووت بُلماسینلار، تِرسینه، اُنگکودِن-ده ایخلاصلی خیدمات اِتسینلِر. سِبَبی اُلارینگ آقالاری ایمانداقی عزیز دُغانلاری بُلوپ یاخشیلیق اِدیَندیرلِر. بولارینگ بارینی اُورِت و ناصیحات بِر. یالان مُعلِّملِر بارادا بیلدیرمِکلِر 3 اِگِر کیم-ده باشغا تَعلیماتی اُورِدیپ، تانگریمیز عیسی مسیحینگ دُغری تَعلیماتینی یالان بیلیپ، خودایینگ یُلونا لاییق بُلان تَعلیماتی قابول اِتمِیَن بُلسا، 4 اُندا اُل هیچ زادا دوشونمِیَن مَغروردیر. اُل جِدِلِّشمِک و سُزلِرینگ مَعنیسی بارادا داعوالاشماق دِردینه دوشوپ، باخیلّیغینگ، چِکیشمِلیگینگ، تُهمِتلِرینگ و یامان شِکلِرینگ دُرِمِگینه سِبَپ بُلیار. 5 بولار اوچین فیکرلِری ضایالانان آداملارینگ آراسیندا اُنگوشماسیزلیقلار یوزه چیقیار. اُلار حاقیقاتی پُزوپ، خودایینگ یُلی قازانچ یُلودیر دییّپ گومَن اِدیَرلِر. 6 حاقیقاتدا بُلسا، بارینگا راضی بُلوپ، خودایینگ یُلونینگ ایزینا دوشمِک اولی قازانچدیر. 7 چونکی بیز دونیَه هیچ زات گِتیرمِدیک. اُندان هیچ زات اَکیدیپ بیلمِجِگیمیز هِم مِسه-معلیمدیر. 8 شُنونگ اوچین-ده، اییجِگیمیزینگ، گِیجِگیمیزینگ باردیغینا راضی بُلمالیدیریس. 9 باییماقچی بُلیانلار بُلسا وِسوِسَه دوشوپ، زییانلی و پوچ هُوِسلِرینگ تُرونا چُلاشیاندیرلار. بو هُوِسلِر اُلاری وِیرانچیلیغا و هِلَکچیلیگه ساتاشدیریاندیر، 10 سِبَبی پول هُوِسی هِمّه بِلا-قاضانینگ سِبَبیدیر. کَبیر آداملار اُنونگ عشقینا دوشوپ، ایماندان آزاشدیلار، اُزلِرینی کَن دِردلِره دوچار اِتدیلِر. پولسینگ تیموتاوسا سُنگقی ناصیحاتلاری 11 اِمّا سِن، اِی خودایینگ آدامی، بو زاتلاردان قاچ. دُغرولیق، تاقوالیق، ایمان، سُیگی، صابیر-طاقاتلیق و میلاییملیق یُل‍لارینینگ ایزینا دوش. 12 ایمان اوغرونداقی گُرِشده باتیرلیق بیلِن گُرِش و باقی یاشایشی اُزونگه ماقصات اِدین. خودای سِنی مونگا چاغیردی، شُندا سِن هِم ایمانینگی کَن شاهادینگ اُوونده قاوی ایقرار اِدِنسینگ. 13 هِمّه زادا یاشاییش بِریَن خودایینگ حوضوریندا و حاکیم پُنتیوس پیلاتُسینگ اُوونده دینگه قاوی ایقرار اِدِن عیسی مسیحینگ حوضوریندا سانگا شولاری تابشیریارین: 14 تانگریمیز عیسی مسیح گِلیَنچَه، اُزونگه تابشیلانلاری لِکّه‌سیز و عایپسیز بِرجای اِت. 15-16 خودای پَک و یِکه حُکومداردیر، اُل پادیشاهلارینگ پادیشاهسی، خودایلارینگ خودایسی، اُلمِزلیگینگ یِکه اِیه‌سیدیر. اُل اینسانینگ گُزی یِتمییَن نوردا یاشایار، اُنی هیچ بیر اینسان گُرمِدی، گُروپ-ده بیلمِز. اُل عیسی مسیحی اُز بِلَّن واقتیندا ایبِرِر. حُرمات و قودرات باقی اُنونگقی بُلسون! اَمین. 17 بو زامانینگ بایلارینا مَغرور بُلمازلیغی تابشیر. قُی، اُلار اینامسیز و قیسغا بایلیغا دَل-ده، لِذِّت آلماغیمیز اوچین هِر زادی بُل یِتیریَن خودایا بیل باغلاسینلار. 18 اُلارا یاخشیلیق اِتمِگی، یاخشی ایشلِر، ساخیلیق و اِلی آچیقلیق خازیناسینی ییغناماغی تابشیر. 19 شِیله خازینا اُلارینگ گِلِجِگینینگ قاییم بُنیادی بُلوپ، حاقیقی یاشایشا یِتیرِر. 20 اِی تیموتاوس، اُزونگه اینانیلیپ بِرلِنی قُرا. دونیَه‌نگ بُش گورّونگلِریندِن و «بیلیم» دیلیَن تِرس فیکرلِردِن داش دور. 21 سِبَبی کَبیر آداملار بو یالان بیلیمه قُشولیپ، ایماندان آزاشاندیرلار. خودایینگ مِرحِمِتی، قُی، سیزه بُلسون! |
© Turkmen Truth