۱ تیموتاوس 2 - مُقادِّس کیتاب

دُغا و عیبادات بارادا

¹ شُنگا گُرَه، اِی تیموتاوس، اَوَّل شولاری ماصلاحات بِریَرین:‏ هِمّه‌لِر اوچین دُغا و دیلِگ اِدینگ، اُلار اوچین خودایا یالبارینگ، اُنگا مینِّتدارلیق بیلدیرینگ.‏

² راحات و کِپ-گورّونگسیز، تاقوالی و اِدِبلی یاشاپ بیلِر یالی، پادیشاهلار و ایختییارلیلارینگ هِمّه‌سی اوچین دُغا اِدینگ.‏

³ بو خاییرلیدیر، نِجات بِریَنچیمیز خودایینگ حالایانیدیر.‏

⁴ اُل هِمّه آداملارینگ نِجات تاپیپ و حاقیقاتی بیلمِگینی ایسلِیَندیر.‏

⁵ چونکی یِکه بیر خودای باردیر.‏ خودای بیلِن آداملارینگ آراسیندا هِم یِکه بیر تُوِلّاچی باردیر، یَعنی اینسان بُلان عیسی مسیحدیر.‏

⁶ عیسی مسیح هِمّه‌لِری آزاد اِتمِک اوچین، اُزونی قربانی اِتدی، و شُنونگ بیلِن اُز میناسیپ واقتیندا شو حاقیقات تاصدیقلاندی.‏

⁷ اِدیل شو ماقصات اوچین، مِن اِعلانچی و رِسول اِدیلیپ بِلِّندیم.‏ دُغری آیدیارین، سُزلِریمده آصلا یالان یُقدور:‏ مِن یَهودی دَل‍لِره ایمان باراداقی حاقیقاتی اُورِتمَگه بِلِّندیم.‏

⁸ شُنگا گُرَه-ده، اِرکِکلِرینگ قاهارلانمان، جِدِلِّشمَن، هِمّه یِرده اِل‍لِرینی قالدیریپ، پَک یورِکدِن دُغا اِتمِکلِرینی ایسلِیَرین.‏

⁹ آیال‍لار هِم ساچ اُروملِرینی، قیزیل و مُروارید شای-سِپلِری و باهالی لِباسلاری بیلِن آوادانلانماسینلار.‏ عُوِضینه، سادا گِینیپ، آبرایلیق و حایا بیلِن

¹⁰ اُز یاخشی ایشلِرینه آوادانلانسینلار.‏ اُز تاقوالیدیقلارینی ایقرار اِدیَن آیال‍لارا شِیله اِتمِک یاراشیاندیر.‏

¹¹ آیال کِلیسادا اُورِدیلیَن زاتلاری یوواشلیقدا و کَمیل موطیع‌لیقدا اُورِنسین.‏

¹² آیالینگ کِلیسادا اُورِتمِگینه، اِرکِگینگ اوستوندِن آقالیق سورمِگینه ایختییار بِرمِیَرین.‏ اُندان باشغا هِم یوواشلیقدا بُلسون.‏

¹³ چونکی اَوَّل آدام، اُنسُنگ حَوّا یارادیلدی.‏

¹⁴ آلدانان هِم آدام دَلدی.‏ آیال آلدانیپ، گونَه قازاندی.‏

¹⁵ شُندا دُغورما دِردینَه دوچار بُلدی.‏ اِمّا آیال‍لار چاغا دُغورما بیلِن نِجات تاپارلار، اِگِر ایماندا و سُیگیده و تاقوالیغینگ ایزینا دوشسِلِر.‏