۱ تِسالونیکیلِر 5 - مُقادِّس کیتاب1 اِی عزیزلِر، بو واقالارینگ واقتی و آی-گونلِری حاقدا سیزه یازماغینگ گِرِگی یُق. 2 تانگری عیسانینگ گِلجِک گونی گیجه اُغرینینگ گِلشی یالی گِلِر، مونی اُزونگیز-ده بیلیَنسینگیز آخیرین. 3 آداملار هِنیز: «هِمّه‌لِر ساغ-سالامات، خُوف-خاطار هِم یُق» دییّپ دورقالار، اُلارینگ اوستوندِن هِلَکچیلیک اینِر. بو اِدیل گُورِلی آیالینگ دِردی کیمین خابارسیز باشلانار. شُندا اُلار قاچیپ نِجات تاپمازلار. 4 اِمّا، اِی عزیزلِر، تانگری عیسانینگ گِلجِک گونی سیزینگ اوستونگیزی بیر اُغری کیمین خابارسیز باسماسین، سِبَبی سیز قارانگقیلیقدا دَل آخیرین. 5 سیزینگ بارینگیز نورا و گوندیزه دِگیشلی فِرزِنلِریسینگیز. بیز قارانگقا یا گیجَه دِگیشلی دَلدیریس. 6 شونلوقدا، اوقوداقی آداملار یالی بُلمایلینگ. تِرسینه، اُیا و هوشیار بُلایلینگ. 7 چونکی اوقلایانلار گیجه اوقلایاندیرلار، سِرخُش بُلیانلار-دا گیجه سِرخُش بُلیاندیرلار. 8-9 بیز بُلسا گوندیزه دِگیشلیدیریس. خودای بیزی غاضابا دوچار بُلماغا دَل، شِیله بُلسا تانگریمیز عیسی مسیحینگ اوستو بیلِن نِجات تاپماغا بِلِّدی. شُنگا گُرَه-ده، اِگنیمیزه ایمان بیلِن سُیگینی زِره حُکمونده، باشیمیزا نِجات تاپماق اومیدینی دِمیردِن تِلفِک حُکمونده گِییپ، هوشیار بُلایلینگ. 10 عیسی مسیح بیزینگ اوچین اُلدی. اُل مونی بیز یاشاساق-دا، اُلسِک-ده، اُنونگ بیلِن یاشاپ بیلمِگیمیز اوچین اِتدی. 11 شُنگا گُرَه-ده، اِدیل شو واقت اِدیشینگیز یالی، بیری-بیرینگیزه گُوونلیک بِرینگ و قوواتلاندیرینگ. تِسِلّی و ناصیحاتلار 12 ایندی بُلسا، اِی عزیزلِر، سیزدِن شولاری خاییش اِتمِکچی: آرانگیزدا زَحمِت چِکیَنلِرینگ، مسیح یُلوندا سیزه باشچیلیق اِدیَنلِرینگ، و ناصیحات بِریَنلِرینگ قادیرینی بیلینگ. 13 اِدیَن ایشلِری اوچین اُلاری سُیونگ، اُلارا اولی حُرمات قُیونگ و اُزآرا پاراحاتچیلیقدا یاشانگ. 14 اِی عزیزلِر، سیزه یالباریاریس: بیکَر گِزیَنلِری ناصیحات اِدینگ، اومیدسیزلارا گُوونلیک بِرینگ، اِجیزلِری قُلدانگ، هِمّه‌لِر باباتدا صابیر-جِداملی بُلونگ. 15 خاباردار بُلونگ، هیچ کیم یامانلیغا یامانلیق بیلِن جُغاپ بِرمِسین. قایتام، بیری-بیرینگیزه و هِمّه‌لِره یاخشیلیق اِتجِک بُلونگ. 16 هِمیشه شاتلیق اِدینگ. 17 دُواملی دُغا اِدینگ. 18 هِر یاغدایا شوکور اِدینگ. هاووا، عیسی مسیحه باغلی بُلان سیز باباتدا خودایینگ ایسلِگی شولاردیر. 19 مُقادِّس روحونگ اُدونی سُندورمَنگ. 20 نبوّتلارا اَسگِرمِزچیلیک اِتمَنگ. 21 هِر زادی ایمتِحان اِدیپ گُرونگ. قاوی زادی قاییم ساقلانگ. 22 هِر هیلی یامانلیقدان داش دورونگ. 23 قُی، پاراحاتلیغینگ چِشمه‌سی بُلان خودای سیزی هِمّه طارافدان پَکلِسین. تانگریمیز عیسی مسیح گِلِنده روحونگیز، جانینگیز و بِدِنینگیز عایپسیز بُلسون. 24 خودای مونی باشارار. چونکی سیزی چاغیران خودای اِمیندیر. 25 اِی عزیزلِر، بیزینگ اوچین دُغا اِدینگ. 26 ایماندارلارینگ بارینی مُقادِّسلیک بیلِن اُغشاپ سالاملاشینگ. 27 بو نامه‌نی ایماندارلارینگ بارینا اُقیپ بِرمِگی مسیحینگ آدیندان سیزه تابشیریارین. 28 تانگریمیز عیسی مسیحینگ مِرحِمِتی سیزینگ بیلِن بُلسون! |
© Turkmen Truth