۱ تِسالونیکیلِر 4 - مُقادِّس کیتابخودایی خُشنود اِتمِک 1 اِی عزیزلِر، بیز خودایی راضی اِتمِک اوچین نَهیلی یاشامالیدیغینی سیزه اُورِتدیک. سیز حاقیقاتدان هِم شِیله یاشایارسینگیز. ایندی بُلسا شِیله یاشاماقدا خاص-دا اُسمِگینگیزی تانگری عیسانینگ آدیندان سیزه تابشیریاریس. 2 تانگری عیسانینگ هایسی گِلِن حُکوملِرینی سیزه بِرِنیمیزی بیلیَرسینگیز آخیرین. 3 خودایینگ ایسلِگی شولاردیر: مُقادِّس بُلونگ، زینا اِتمَنگ. 4 هِر کِس اُز بِدِنینه پَکلیک و آبرای بیلِن اِیه‌لیک اِتسین، 5 خودایی تانیمییان میلِّتلِر یالی اُز بِدِنینگیزی حارام کِیپی بِرمَنگ. 6 شو یُلدا دُغانینگیزا آخلاقسیزلیق اِتمَنگ، اُنی آلدامانگ. اُزال سیزه آیدیپ، قاتی بیلدیرشیمیز یالی، شِیله گونَه‌لِرینگ هِمّه‌سی اوچین خودای اینسانلاری جِزالاندیرار. 7 چونکی خودای بیزی آخلاقسیزلیغا دَل-ده، مُقادِّس دورموشدا یاشاماغا چاغیردی. 8 شُنگا گُرَه-ده، بو حُکوملِری رِد اِدیَن آدام اینسانی دَل، اُندا اُز مُقادِّس روحونی بِریَن خودایی رِد اِدیَندیر. 9 اُز آرا سُیگی بارادا یازیپ-دا اُتورجاق دَل، سِبَبی بیری-بیرینگیزی سُیمِگی سیزه خودایینگ اُزی اُورِتدی آخیرین. 10 حاقیقاتدان-دا، سیز هِمّه مَقدونیه‌دَکی بار دُغانلارینگیزی سُییَرسینگیز. اِمّا شُندا-دا، اِی عزیزلِر، بو سُیگینگیزی موندان بِیلَک خاص-دا آرتدیرینگ دییّپ یالباریاریس. 11 سیزه تابشیریشیمیز یالی، کِپ-گورّونگسیز یاشاماغا، یِکه اُز ایشینگیز بیلِن مِشغول بُلماغا، گِچمِک گونونگیزی اُزونگیز قازانماغا تاقالّا اِدینگ. 12 شُندا مسیحه ایمان گِتیرمِیَنلِر سیزه حُرمات قُیارلار. سیز هیچ کیمدِن هیچ زادا زار بُلمارسینگیز. عیسی مسیحینگ قایدیپ گِلمِگی 13 اِی عزیزلِر، سیز-ده اومیدسیز آداملار یالی حاسرات چِکمِزلیگینگیز اوچین، یاتانلار باباتدا بیلمِگینگیزی ایسلِیَریس. 14 بیز عیسانینگ اُلوپ دیرِلِنینه اینانیاریس. شُنگا گُرَه-ده، خودایینگ عیسی مسیحه ایمان گِتیرِن یاتانلاری اُنونگ بیلِن ایزینا گِتیرجِکدیگینه-ده اینانمالیدیریس. 15 مسیحینگ سُزونه دایانیپ، سیزه شونی آیدیاریس: بیز – دیریلِر، مسیح قایدیپ گِلِنده، اُنونگ بیلِن یاتانلاردان اَوَّل ساتاشماریس. 16 مسیحینگ اُزی حُکومدار قاتی سِسی بیلِن، خودایینگ سورنای سِسی بیلِن و پِریشده‌لِرینگ رِییسینینگ سِسی بیلِن آسماندان اینِر. شُندا اَوَّل مسیحه ایمان گِتیرِن اُلولِر دیرِلِر. 17 سُنگرا بُلسا بیز، یَعنی دیریلِر، اُلار بیلِن بیله مسیحی آسماندا قارشیلاماق اوچین، بولوتلار ایچینده آلنیپ گُتِریلِریس و هِمیشه مسیح بیلِن بُلاریس. 18 شُنگا گُرَه-ده، شو سُزلِر بیلِن بیری-بیرینگیزه گُوونلیک بِرینگ. |
© Turkmen Truth