۱ تِسالونیکیلِر 3 - مُقادِّس کیتاب

¹ بیز دیدارینگیزدان موندان کَن ماحروم بُلماغا جیدامان، آتِن‌ده یِکه قالماغا راضی بُلدوق.‏

² سیزینگ یانینگیزا بُلسا مسیحینگ خوش خابارینی یایراتماق اوچین خودایینگ خیدماتیندا هِمکَریمیز بُلان تیموتاوس دُغانیمیزی ایمانینگیزدا قاییملاپ و قوواتلاندیرماق اوچین ایبِردیک.‏

³ قینچیلیقلار سِبَبی سیزینگ هیچ بیرینگیز ایماندا قاوشاماسین دییّپ اِتدیک.‏ یُنه اُزونگیز بیلیَنسینگیز، بو قینچیلیقلار مسیحه ایمان گِتیرِنلِرینگ باشیندا باردیر.‏

⁴ بیز آزار و قینچیلیق چِکجِکّیمیزی هِنیز یانینگیزداقاق اُووندِن آیدیپدیق.‏ بیلشینگیز یالی، شِیله هِم بُلدی.‏

⁵ شُنگا گُرَه-ده، موندان کَن جیداپ بیلمَن، ایمانینگیزدان خابار آلماق اوچین، مِن تیموتاوسی یانینگیزا ایبِردیم.‏ چونکی وِسوِسه‌چی شِیطانینگ هایسیدیر بیر یُل بیلِن سیزی وِسوِسه اِدیپ، قینچیلیغیمیزینگ بیدِرِک بُلجاغیندان قُرقدوم.‏

تِسالونیکیدِن گِلِن قاوی خابارلار

⁶ اِمّا یانینگیزدان شو واقت گِلِن تیموتاوس سیزینگ ایمانینگیز و سُیگینگیز بارادا قاوی خابارلار گِتیردی.‏ اُل بیزی هِمیشه یاخشیلیقدا یادلایاندیغینگیزی، سیزی گُرِسیمیزینگ گِلشی یالی، سیزینگ-ده بیزی قاتی کویسِیَندیگینگیزی گورّونگ بِردی.‏

⁷ شُنگا گُرَه-ده، اِی عزیزلِر، هِمّه قینچیلیقلاریمیزا و جِفالانمالارا باقمازدان، سیزینگ ایمانینگیزدان تِسِلّی تاپدیق.‏

⁸ سیزینگ مسیحده قاییم دورماغینگیز ایندی جانیمیزا جان قُشیار.‏

⁹ بیز خوداییمیزینگ اُوونده سیز سِبَپلی خاص شاتلاندیق.‏ سیزینگ اوچین خودایا نَچه شوکور آیتسامدا آزدیر!‏

¹⁰ بیز دیدارینگیزی گُرمِک و ایمانینگیزینگ آرتماغی اوچین، گیجه-گوندیز تویس یورِکدِن دُغا اِدیَریس.‏

¹¹ ایندی بُلسا سیزه طاراف یُلومیزی، قُی، آتامیز خودایینگ اُزی و تانگریمیز عیسی آچسین.‏

¹² بیز سیزی سُیشومیز یالی، قُی، عیسی مسیح بیری-بیرینگیزه، هِمّه آداملارا بُلان سُیگینگیزی آرتدیریپ، دُس-دُلی اِتسین.‏

¹³ تانگریمیز عیسی اُز هِمّه مُقادِّسلِری بیلِن بیله گِلِنده، آتامیز خودایینگ اُوونده عایپسیز و مُقادِّس بُلوپ بیلِرینگیز یالی، قُی، اُل یورِکلِرینگیزی قوواتلاندیرسین.‏