۱ تِسالونیکیلِر 2 - مُقادِّس کیتاب

پولسینگ تِسالونیکیدَکی خیدماتی

¹ اِی عزیزلِر، سیزینگ یانینگیزا گِلِنیمیزینگ بیدِرِک بُلماندیغینی اُزونگیز بیلیَنسینگیز.‏

² بیزینگ اُزال فیلیپیده حُرلوق چِکِندیگیمیزی و کیچِلدیلِندیگیمیزی هِم بیلیَنسینگیز.‏ ایندی بُلسا بَرده-ده قارشیلیغا دوچار بُلدوق.‏ اِمّا مونگا باقمازدان، خودای اُز خوش خابارینی سیزه هِم واغیظ اِتمِک اوچین بیزه گویج بِردی.‏

³ بیزینگ چاغیریشیمیزدا نه یالان، نه یامان نییِت، نه-ده حیله باردیر.‏

⁴ خودای بیزی لاییق بیلیپ، خوش خاباری یایراتماغی بیزه تابشیردی.‏ شُنونگ اوچین-ده، بیز آداملارینگ دَل، شُندا یورِکلِری ایمتِحان اِدیَن خودایینگ گُونوندِن تورجاق بُلوپ گورلِیَریس.‏

⁵ بیلشینگیز یالی، بیز سیزه یُقوملی سُزلِره آیدیپ، اُز پِیدامیزی گُزلِمِدیک.‏ خودای مونگا شاهاتدیر.‏

⁶ بیز اینسانلاردان، سیزدِن-ده و باشغالاردان-دا اُوگی حانتاما دَلدیک.‏ بیز مسیحینگ رِسول‍لاری حُکمونده سیزه آغرام سالیپ هِم بیلِردیک.‏

⁷ اِمّا بیز اُز چاغالارینی باغرینا باسیان اِنه یالی سیزینگ آرانگیزدا میلاییملیق بیلِن گِزدیک.‏

⁸ شُنگا گُرَه-ده، بیز یِکه خودایینگ خوش خابارینی دَل، بیزَه عزیز بُلدینگیز اوچین جان بِرمَگه-ده حَضیردیک.‏

⁹ اِی عزیزلِریم، بیزینگ چِکِن آغیر زَحمِتیمیز، گُرِن جِفالاریمیز یادینگیزدادیر.‏ خوش خاباری سیزه واغیظ اِدِن زامانیمیزدا هیچ کیمه آغرام سالماجاق بُلوپ، گیجه-گوندیز ایشلِدیک.‏

¹⁰ سیز ایماندارلار باباتدا بیزینگ آخلاق تایدان پَک، دُغری و عایپسیز بُلاندیغیمیزا اُزونگیز شاهاتسینگیز.‏ مونگا خودای-دا شاهاتدیر.‏

^11-12 بیز سیزی اُز پادیشاهلیغینا، بِییکلیگینَه چاغیریان خودایا میناسیپ یاشاماغینگیزی تابشیردیق.‏ بیز سیزینگ هِر بیرینگیزه آتانینگ اُز اُغلانلارینا باقِیشی کیمین باقِیپ، سیزی قوواتلاندیردیق و گُوونلیک بِردیک.‏ بولارینگ بارینی اُزونگیز-ده بیلیَنسینگیز.‏

پولس تِسالونیکیلِر اوچین شوکور اِدیَر

¹³ سیز خودایینگ خوش خابارینی بیزدِن اِشیدیپ قابول اِدِنینگیزده، مونی اینسان سُزی حُکمونده دَل، شِیله بُلسا، حاقیقاتدان-دا، خودایینگقی دییّپ قابول اِتدینگیز.‏ سیز ایماندارلاردا ایشلِیَن سُزدیر.‏ شُنگا گُرَه-ده، بیز سیزینگ اوچین خودایا قاتی کَن شوکور اِدیَریس.‏

¹⁴ اِی عزیزلِر، سیز خودایینگ یهودیه‌ده عیسی مسیحه دِگیشلی بُلان کِلیسالارینی نِمونه آلدینگیز.‏ شُنگا گُرَه-ده، بو کِلیسالارینگ یَهودیلِردِن چِکِن زَحمِتلِرینی سیز هِم اُز ایلدِشلِرینگیزدِن چِکمِلی بُلدونگیز.‏

^15-16 یَهودیلِر پیغامبارلاری و تانگری عیسانی اُلدوردیلِر، بیزی بُلسا کُووپ چیقاردیلار.‏ اُلار باشغا میلِّتلِرینگ-ده نِجات بِرمِگی اوچین واغیظ اِدیلیَن خوش خابارا پَسگِل بُلماقچی بُلیارلار.‏ یَهودیلِر خودایی نارضا اِدیپ، هِمّه آداملارا قارشی چیقیارلار.‏ شونلوقدا، اُلارینگ گونَه‌لِری حِددِن آشیپ باریار.‏ خودایینگ غاضابی آخیرسُنگی باشیندان اینِندیر.‏

پولس تِسالونیکیلی ایماندارلارینگ دیدارینی کویسِیَر

¹⁷ اِی عزیزلِر، بیز فیکرلِریمیزده سیزینگ بیلِن بُلساق-دا، آز واقت دیدارینگیزدان آیرا دوشدیک.‏ شُندا بیز سیزی قاتی گُرِسیمیز گِلدی!‏ سیزینگ دیدارینگیزی گُرمِک اوچین اِلیمیزدِن گِلِنینی اِتدیک.‏

¹⁸ هاووا، یانینگیزا باراسیمیز گِلیَردی.‏ مِن پولس بو باباتدا نَچه گِزِک گِلجِک بُلدوم، یُنه شِیطان بیزه پَسگِل بِردی.‏

¹⁹ بیزینگ اومیدیمیز و شاتلیغیمیز کیمدیر؟ تانگریمیز عیسی گِلِنده اُنونگ اُوونده قووانجاق تاجیمیز کیمدیر؟ سیز دَلمیسینگیز؟ اِلبِتّه سیزسینگیز!‏

²⁰ هاووا، بیزینگ شاتلیغیمیز هِم، قووانجیمیز هِم سیزسینگیز.‏