۱ پِطرُس 4 - مُقادِّس کیتابخودای اوچین یاشاماق 1 شونلوقدا، مسیحینگ دونیَه‌ده بِدِن تایدان عاذاپ چِکیشی یالی، سیز هِم شِیله فیکرلِر بیلِن یاراغلاری آلیپ، مونگا تاییار بُلونگ. سِبَبی مسیح اوچین بِدِن تایدان عاذاپ چِکمَگه بِلّی بُلسانگیز، گونَه اِتمِکدِن یوز اُوورِنسینگیز. 2 ایندی بو بِدِندَکی قالان یاشاجاق عُمرونگیزده اینسانینگ هُوِسینه گُرَه دَل-ده، خودایینگ ایسلِگینه گُرَه یاشانگ. 3 گِچمیشده سیز خودایی تانیمایان میلِّتلِرینگ حالایان زاتلارینی یِرینه یِتیریپ یاشانینگیز بِسدیر. شُل زامانلاری سیز آخلاقسیزلیقدا، کِیپ چِکمِکده، سِرخُشلوقدا، عایش-عِشرِتده و ییگرِنجی بُت‌پَرَستلیکده گِچیردینگیز. 4 ایندی بُلسا شُل اُوالقی بُت‌پَرَستلیک اِدیَنلِر سیزینگ اُزلِری بیلِن بیله تِلِکه‌لیکلیگه قُشولمایاندیغینگیزا گِنگ قالیپ، سیزه سِویَرلِر. 5 اِمّا دیریلِرینگ هِم، اُلولِرینگ هِم اوستوندِن حُکوم چیقارماغا تاییار دوران خودایا اُلار حاساپ بِرِرلِر. 6 شُنونگ اوچین هِم خوش خابار حتّیٰ اُلولِره-ده واغیظ اِدیلدی. چونکی بِدِن تایدان اینسانلارا گُرَه اِدِن ایشلِری اوچین حُکوم اِدیلِن بُلسالار-دا، اِمّا روح تایدان خودایدا یاشاپ بیلِرلِر. 7 هِمّه زاتلارینگ آخیری یاقین گِلدی. مونونگ اوچین آچیق دوشونجِلی بُلوپ، خاباردارجا دُغا اِدینگ. 8 هِمّه زاتدان مُهِم بیری-بیرینگیزی تویس یورِکدِن سُیونگ، سِبَبی سُیگی کَن گونَه‌لِرینگ اوستونی اُرتیَندیر. 9 زِیرِنمِزدِن بیری-بیرینگیزی میهمان آلینگ. 10 خودای سیزینگ هِر بیرینگیزه هِر هیلی روحی ناغماتلار بِردی و خودایینگ مِرحِمِتینی وِفادارلیق بیلِن بیری-بیرینگیزه خیدمات اِتمِک اوچین قولّانینگ. 11 کیم کِپلِسه، خودایینگ سُزلِرینَه گُرَه کِپلِسین. کیم خیدمات اِتسه، خودایینگ بِرِن گویچ-قوواتینا گُرَه خیدمات اِتسین. عیسی مسیحینگ اوستو بیلِن خودای هِمّه زاتدا بِییکلِنسین! بِییکلیک و قودرات اِبِدیلیک اُنونگقی بُلسون! اَمین. مسیح اوغروندا عاذاپ چِکمِک 12 عزیزلِریم، سیزی ایمتِحان اوچین باشینگیزا اینِن اُد بِلاسینا گِنگ زادا ساتاشان یالی حایران قالمانگ. 13 تِرسینه، مسیحینگ چِکِن عاذاپلارینا شِریک بُلیان یالی شاتلانینگ. اُنونگ بِییکلیگی آیان بُلاندا، شاتلیغینگیزینگ اِندازاسی بُلماز. 14 مسیحینگ آدی سِبَپلی تُهمِت اورلییان بُلسانگیز، خوشواقتسینگیز، چونکی خودایینگ بِییکلیک روحی سیزده مِسکِن توتاندیر. 15 یُنه سیزدِن هیچ کیم قاتل، اُغری و هِر هیلی شِر ایشده، یا فوضول بُلوپ عاذاپ چِکمِسین. 16 اِمّا کیم مسیحی بُلوپ عاذاپ چِکیَن بُلسا اوتانماسین. اُل بو آد اُزونده بُلانسُنگ خودایی شوکور اِتسین. 17 چونکی حُکوم خودایینگ اُی ایچِریسیندِن باشلانمالی واقتی گِلیپ یِتدی. حُکوم اَوَّل بیزدِن باشلانسا، اُندا خودایینگ خوش خابارینا موطیع بُلمایانلارینگ آخیری نَمه بُلار؟ 18 اِگِر تاقوالی آدام زُردان نِجات تاپیان بُلسا، اُندا خودایسیزینگ و گونَه‌کَرینگ حالی نَهیلی بُلار؟ 19 مونونگ اوچین هِم خودایینگ ایسلِگی بیلِن عاذاپ چِکیَنلِر یاخشیلیق اِتمِگینی دُوام اِتدیریپ، اُزلِرینی اِمین یارادان خودایا تابشیرسینلار. |
© Turkmen Truth