۱ پِطرُس 3 - مُقادِّس کیتاب

اَر-آیال قاتناشیغی

^1-2 اِدیل شونونگ یالی، اِی آیال‍لار، سیز هِم اُز اَرینگیزه موطیع بُلونگ.‏ اِگِر اَرینگیز خودایینگ سُزونه اینانمایان بُلسا، اُل آیالینینگ خودایدان قُرقوپ یاشایان و پَک دورموشینی گُروپ، هیچ بیر آیدیپ-دییمِزدِن ایمانا گِلِر.‏

³ سیزینگ آوادانلیغینگیز اُرولِن ساچلار و داقیلان قیزیل‍لار و آوادان لِباسلار یالی داشقی گُرنوشدِن عیبارات بُلماسین.‏

⁴ تِرسینه، یورِگینگیزدَکی آرام هِم میلاییم روح سیزینگ سُلمییان ایچکی آوادانلیغینگیز بُلسون.‏ بو خودایینگ ناظاریندا خاص قیماتلیدیر.‏

⁵ اُوالقی واقتلاردا خودایا اومید باغلاپ، یورِکلِرینی پَک ساقلان آیال‍لار هِم اُزلِرینی شِیله آوادانلایاردیلار، اُلار اُز اَرینه موطیع‌دیلار.‏

⁶ میثال اوچین، سارا ابراهیما موطیع بُلوپ، اُنی اُز سِروِریم دییّپ آدلاندیردی.‏ اِگِر سیز هِم یاخشیلیق اِدیپ، هیچ بیر خاطاردان قُرقماسانگیز، سارانینگ قیزلاری بُلارسینگیز.‏

⁷ اِی اَرلِر، اِدیل شونونگ یالی، سیز هِم اُز آیالینگیزا حُرمات قُیونگ و اُنونگ بیلِن اُزآرا ناظارینی دوشونیشیپ یاشانگ.‏ سیز اُلارینگ اُزونگیزدِن ظِریفدیگینی بیلیَنسینگیز، اِمّا اُلار هِم سیزینگ بیلِن خودایینگ بِرِن یاشاییشینی دِنگ میراث آلاندیرلار.‏ دُغالارینگیزینگ پَسگِلمِزلیگی اوچین شِیله اِدینگ.‏

دُغرولیق اوغرونداقی زَحمِتلِر

⁸ شِیلِلیکده، هِمَّه‌نگیز یورِگینگیز بیر و دِردینگیز بیر بُلوپ، بیری-بیرینگیزی سُیونگ.‏ رِحم-شِپاقاتلی و فُروتَن بُلونگ.‏

⁹ یامانلیغا یامانلیق، سِوِنه سِومِک بیلِن جُغاپ بِرمَنگ.‏ عُوِضینه، بِرِکِت دیلِمِک بیلِن جُغاپ بِرینگ، سِبَبی سیز بِرِکِتینگ میراثی بُلماق اوچین مونگا چاغیریلانسینگیز.‏

¹⁰ شونلوقدا:‏ ‏«‏کیم یاشایشی سُیِسه و یاخشی گونلِری گُرِسی گِلیَن بُلسا، دیلینی یامانلیقدان، دُداقلارینی حیله‌لی کِپدِن ساقلاسین.‏

¹¹ یامانلیقدان یوز اُوورسین، یاخشیلیق اِتسین، آراملیغینگ و پاراحاتلیغینگ ایزیندا بُلسون.‏

¹² چونکی تاقوالی آداملاردا خودایینگ گُزلِری و دُغالارینا آچیق اُنونگ قولاغی.‏ اِمّا خودایینگ یوزی یامان ایش اِدیَنلِره قارشیدیر.‏»‏

¹³ اِگِر یاخشیلیق اِتمَگه ایخلاص اِتسینگیز، سیزه کیم زییان یِتیرِر؟

¹⁴ اِمّا اِگِر سیز دُغرولیق اوچین قینچیلیق چِکسینگیز هِم خوشواقتسینگیز.‏ آداملارینگ قُرقیان زاتلاریندان سیز قُرقمانگ و قایغا دوشمَنگ.‏

¹⁵ اِمّا مسیحه تانگری حُکمونده یورِکدِن حُرمات قُیونگ.‏ قالبینگیزداقی اومید حاقیندا اُزونگیزدِن حاساپ سُران هِر بیر آداما هِمیشه جُغاپ بِرمَگه تاییار بُلونگ و مونی میلاییملیق و اِدِبلیلیک بیلِن بِرجای اِدینگ.‏

¹⁶ وِجدانینگیزی پَک ساقلانگ، شُندا سیزینگ مسیحه باغلی دُغری یاشایشینگیز بارادا غیبات اِدِنلِر سیزی یامانلاپ آیدان کِپلِریندِن اوتانارلار.‏

¹⁷ اِگِر خودایینگ ایسلِگی بیلِن عاذاپ چِکمِلی بُلسا، یامانلیق اِدیپ عاذاپ چِکمِکدِن یاخشیلیق اِدیپ عاذاپ چِکمِک خاص قاوودیر.‏

¹⁸ مسیح هِم بیزی خودایینگ یانینا اِلتمِک اوچین، گونَه‌لِر سِبَپلی هِمیشه‌لیک و بیر گِزِک عاذاپ چِکدی.‏ اُزی عادیل بُلسا-دا، گونَه‌کَرلِر اوچین اُلدی.‏ بِدِن تایدان اُلدوریلسه-ده، اِمّا روح تایدان اُل دیرِلدیلدی.‏

¹⁹ اُل شو روح بیلِن زیندانداقی روحلارا باریپ، واغیظ اِتدی.‏

²⁰ بو روحلار قادیم زاماندا نوحونگ کِشتیسی بِجِرلیپ دورقا، خودای هِنیز صابیر-طاقاتلیق اِدیپ قاراشیارقا، اُنگا موطیع بُلمادیلار.‏ شُل کِشتیده بُلسا آز آدام، سانی سِکیز آدام سووونگ اوستو بیلِن نِجات تاپدی.‏

²¹ اینه، بو سو حَضیر سیزی نِجات بِریَن تَعمیدینگ نیشانیدیر.‏ سیز بِدِنینگیزینگ کیری یوولاندیغی اوچین دَل-ده، عیسی مسیحینگ دیرِلمِسینینگ اوستو بیلِن و پَک وِجدان بیلِن خودایا طاراف اُورولِندیگینگیز اوچین نِجات تاپدینگیز.‏

²² اُل آسمانا چیقیپ و شو واقت خودایینگ ساغیندا اُتیر، و هِمّه پِریشده‌لِر، حُکومدارلار و قودراتلار اُنگا موطیع بُلدیلار.‏