۱ پِطرُس 1 - مُقادِّس کیتابسالاملار 1 عیسی مسیحینگ رِسولی مِن پِطرُسدان خودایینگ سایلانلارینا، یَعنی پونتوس، غَلاطیه، کاپادوکیه، آسیا و بیطینیه وِلایاتلاریندا پیتراپ و بیگانه بُلوپ یاشایانلارا دُغایی سالام. 2 سیز آتامیز خودایینگ اُنگدِن اِدِن قارارینا گُرَه سایلاندینگیز و مُقادِّس روحونگ اوستو بیلِن مُقادِّس خالق بُلدونگیز. خودای مونی سیزینگ عیسی مسیحه موطیع بُلوپ، اُنونگ سِپیلِن قانی بیلِن پَکلِنمِگینگیز اوچین اِتدی. بُلدان-بُل مِرحِمِت و پاراحاتلیق سیزه بُلسون. آسمانداقی میراثیمیز 3 تانگریمیز عیسی مسیحینگ آتاسی خودایا اُوگیلِر بُلسون! اُل اُز بِییک مِرحِمِتینه گُرَه، عیسی مسیحینگ اُلومدِن دیرِلمِگینینگ اوستو بیلِن بیزی تَزه دُغولماغا و دیری اومیدینا قاوشوردی. 4 شِیله هِم سیزه آسماندا ساقلانیان چویریمِز، کیرسیز و سُلماز میراث بِردی. 5 سیز ایمانینگیزینگ اوستو بیلِن خودایینگ قودراتی بیلِن تا نِجات تاپیانچانگیز قُریلیانسینگیز. بو نِجات آخیرقی گونلِرده آیان بُلماغا تاییاردیر. 6 شُنونگ اوچین هِم مونگا یورِکدِن شاتلانینگ. حَضیرکی زاماندا قیسغا واقتلایین ایمتِحانلارا دوچار بُلوپ، غام-غوصّا باتسانگیز-دا، 7 بو ایمتِحانلار سیزینگ ایمانینگیزینگ حاقیقیدیغینی بیلدیریَر. حتّیٰ فانی قیزیل هِم اُددا تَمیزلِنیپ ایمتِحان اِدیلیَندیر. شِیلِلیکده، قیزیلدان خاص قیماتلی بُلان ایمانینگیز ایمتِحاندان گِچیپ، عیسی مسیح اَشکَر بُلاندا، سیزه اُوگی، بِییکلیک و حُرمات گِتیرِر. 8 سیز مسیحی گُرمِدیک بُلسانگیز هِم، اُنی سُییَرسینگیز. حتّیٰ اُنی شو واقت گُرمِسِنگیز-ده، اُنگا ایمان گِتیریَرسینگیز و سُز بیلِن تعریفلاپ بُلماجاق بِییک شاتلیقدان دُلوپ-آقیارسینگیز. 9 سِبَبی ایمانینگیزینگ ماقصادینا یِتیپ، نِجات تاپماغینی قازانیارسینگیز. 10 پیغامبارلار سیزینگ اوچین تاییارلانان بو نِجات تاپماغینا قاتی دوشونمَگه چالیشدیلار و بو مِرحِمِت باراسیندا اُنگ آیتدیلار. 11 اُلارینگ قالبینداقی مسیحینگ روحی اُنونگ چِکمِلی عاذاپلاری و عاذاپلاردان سُنگقی بِییکلیگی بارادا اُوالدان اَشکَر اِتدی. اُلار بولارینگ نَهیلی و هاچان بُلجاقدیغی بارادا مُقادِّس روحونگ نَمه گُرکِزیَندیگینی دوشوندیرمَگَه چالیشدیلار. 12 شُندا بو خابارینگ پیغامبارلار اوچین دَل-ده، سیزه خیدمات اِدیَندیکلِری اُلارا آیان بُلدی. حَضیرکی زاماندا بُلسا آسماندان ایبِرلِن مُقادِّس روحونگ اوستو بیلِن خوش خابار واغیظ اِدیلیَر. بو زاتلارا حتّیٰ پِریشده‌لِر-ده دوشونمَگه چالیشدیلار. مُقادِّس یاشانگ 13 شُنونگ اوچین هِم هِمّه فیکرلِرینگیزی بیر یِره جِملَپ، هوشیار بُلونگ. عیسی مسیحینگ گِلمِگی بیلِن اُزونگیزه بِریلجِک مِرحِمِته اولی اومید باغلانگ. 14 موطیع فِرزِنتلِر یالی بُلونگ، اُزالقی نادان زامانینگیزداقی هُوِسلِرینگیزینگ ایزینا دوشمَنگ. 15 اُزونگیزی چاغیران خودایینگ مُقادِّس بُلشی یالی، سیز هِم هِمّه اِدیَن ایشلِرینگیزده مُقادِّس بُلونگ. 16 سِبَبی: «مُقادِّس بُلونگ، چونکی مِن مُقادِّسدیرین» دییلیپ یازیلاندیر. 17 آدام آراسیندا فارق قُیمازدان، هِر کیمی اِدِن اِتمیشینه گُرَه حُکوم بِریَن خودایی آتا دییّپ چاغیریان بُلسانگیز، بو دونیَه‌دَکی بیگانه‌لیک زامانینگیزی خودایدان قُرقوپ گِچیرینگ. 18 آتا-بابالارینگیزدان میراث آلان بو پوچ دورموشینگیزدان قیزیل-کوموش یالی فانی زاتلارینگ اوستو بیلِن نِجات تاپماندیغینگیزی بیلیَنسینگیز. 19 تِرسینه، خودایینگ عایپسیز هِم پَک قربانلیق قوزوسی بُلان مسیحینگ قیماتلی قانینینگ اوستو بیلِن نِجات تاپاندیرسینگیز. 20 مسیح دونیَه یارادیلمازدان اُنگ بِلِّنِن هِم بُلسا، سیزینگ خاطیرانگیزا بو زامانلارینگ آخیریندا آیان بُلدی. 21 سیز مسیحینگ اوستو بیلِن خودایا ایمان گِتیردینگیز. خودای مسیحی دیرِلدیپ، اُنی بِییکلِندیردی. شِیلِلیکده، ایمانینگیز و اومیدینگیز خودایدادیر. 22 ایندی سیز حاقیقاتا موطیع بُلماق بیلِن یورِکلِرینگیزی پَکلِدینگیز، تویس یورِکدِن سُیگه اِیه بُلدونگیز. شُنونگ اوچین بیری-بیرینگیزی تویس یورِکدِن سُیونگ. 23 سیز فانی تُخومدان دَل-ده، شِیله بُلسا، اِبِدی تُخومدان، یَعنی خودایینگ دیری هِم باقی قالیان سُزونینگ اوستو بیلِن تَزه‌دِن دُغولدینگیز. 24 چونکی: «هِمّه آدامزاد اُتلوق کیمیندیر، بیابان گولی یالیدیر اُنونگ بار گُرنوشی. اُت قوراپ گیدِر، گولی هِم سُلار، 25 اِمّا خودایینگ سُزی اِبِدی قالار.» سیزه واغیظ اِدیلِن خوش خابار سُز، اینه، شودور. |
© Turkmen Truth