۱ قُرِنتُس‌لار 4 - مُقادِّس کیتاب1 آداملار بیزه، قُی، مسیحینگ خیدماتچیلاری و خودایینگ سیرلارینی آیان اِدیَن خیدماتچیلار حُکمونده گُرسینلِر. 2 شِیله خیدماتچیلاردان بُلسا اِمین بُلماقلیغی طالاب اِدیلیَندیر. 3 سیزینگ یا-دا اینسان قاضیچیلیغینگ مانگا نَهیلی حُکوم چیقاریاندیغی مُهِم زات دَل. اُز اوستومدِن حتّیٰ اُزوم-ده حُکوم چیقارامُق. 4 مِن اُزومده عاییپ گُرمِسِم-ده، یُنه بو زاتلار مِنی پَک اِتمِیَر. موندان باشغا مانگا مسیح قاضیلیق اِدیَندیر. 5 شُنگا گُرَه-ده، بِلّی بُلان واقت یِتیَنچَه، هیچ کیمینگ اوستوندِن حُکوم چیقارمانگ. مسیح گِلیَنچَه قاراشینگ. اُل قارانگقیلیقداقی گوزگین زاتلاری یاغتیلیغا چیقارار، آداملارینگ یورِگیندَکی نییِتلِرینی آیان اِدِر. شُندا هِر کِس خودایدان اُز اِدِنینه لاییق اُوگوسینی آلار. 6 اِی عزیزلِر! مِن آیدانلاریمینگ بارینی سیزینگ پِیدانگیزا بُلسون دییّپ، اُزوم و آپولُس بارادا آیتدیم. شُندا سیز تَعلیمیز بیلِن «یازیلانینگ اُلچِگیندِن چیقمانگ» دییلِن مَعنیسینه دوشونیپ، هیچ بیرینگیز بیرینی بِیلِکیدِن یُقاری توتمارسینگیز. 7 اُندا سیز بِیلِکیلِردِن اویتگِشیکمی؟ سیز اُزونگیزدَکیلِرینگ بارینی خودایدان آلمادینگیزمی نَمه؟ اِگِر اُندان آلان بُلسانگیز، نَمه اوچین اُزونگیز قازانان یالی قاباریارسینگیز؟ 8 سیز اِییَم دُیوپ، هِر زادا یِتیپسینگیز! سیز اِییَم باییپسینگیز! بیزسیز پادیشاهلیق اِتدینگیز. واخ، کَشگَه دُغرودان-دا پادیشاهلیق اِتسِدینگیز! شُندا بیز-ده سیزینگ بیلِن بیله پادیشاهلیق اِدِردیک. 9 خودای بیزی، یَعنی رِسول‍لاری، تُماشالی یُریشده اینگ سُنگقی خاطاردا قُیدی دییّپ فیکر اِدیَرین. بیز جِماغاتینگ گُز اُوونده اُلدوریلجِکلِر کیمین بُلدوق. هاووا، بیز هِمّه عالِم-جاهانا، پِریشده‌لِره-ده، اینسانلارا-دا تُماشا بُلدوق. 10 بیز مسیحه بُلان ایمانیمیزینگ خاطیراسینا آحماقدیریس، اِمّا سیز بُلسا مسیحده حِکمِتلیسینگیز! بیز اِجیز، اِمّا سیز بُلسا گویچلیسینگیز! سیز حُرماتلی، اِمّا بیز بُلسا بی‌حُرماتدیریس! 11 بیز هِنیز هِم آچ-سوسوز و لِباسلاریمیز ییرتیق. بیز یِنجیلیَریس و اُیسوز-قُشسیز آوارادیریس. 12 بیز قارا دِر دُکوپ، زَحمِت چِکیَریس. بیزی لَعنِت اِدِنلِرینده، اُلارا یاخشیلیق دیلِیَریس. بیزی آزار بِرِنلِرینده، مونگا جیدایاریس. 13 بیزه تُهمِت اورانلاریندا، میلاییملیق بیلِن جُغاپ بِریَریس. بیز شو واقتدا چِنلی یِر یوزونینگ چُپ-چُری و دونیَه‌نینگ دِرده یارامیانی کیمین بُلاندیریس. 14 مِن بولاری سیزی اوتاندیرماق اوچین دَل-ده، سیزه بیلدِرمِک و ناصیحات بُلسون دییّپ یازیارین. سیز مِنینگ عزیز بالالاریم آخیرین! 15 مسیحینگ یُلوندا سیزینگ مونگلِرچه مُعلِّمینگیز بُلسا-دا اِمّا آتالارینگیز کَن دَلدیر. مِن خوش خابارینگ اوستو بیلِن سیزینگ عیسی مسیحدَکی آتانگیز بُلدوم. 16 شُنگا گُرَه-ده، یالباریارین: مِندِن نِمونه آلینگ. 17 اینه، تیموتاوسی شو ماقصات بیلِن یانینگیزا ایبِردیم. اُل مِنینگ سُیگولی اُغلوم و مسیحده اِمیندیر. اُل مِنینگ عیسی مسیحینگ یُل‍لارینینگ ایزینا دوشیَندیگیمی سیزه یادلار. مِن هِمّه یِرده و هِر کِلیسادا بو یُل‍لارینگ ایزینا دوشمِگی تَعلیم بِریَندیرین. 18 سیزینگ کَبیرلِرینگیز مِن یانینگیزا بارمارین دییّپ گومَن اِدیپ، تِکِپبیرلیگه گیریشدیلِر. 19 خودای یُل بِرسه، مِن باسیم سیزینگ یانینگیزا بارجاقدیرین. شُندا اُلارینگ کِپینی دَل-ده، گویجونی گُرِرین. 20 چونکی خودایینگ پادیشاهلیغی سُزده دَل-ده، گویچدِدیر. 21 مِن سیزینگ یانینگیزا نَمه بیلِن بارایین؟ قامچی بیلِنمی یا-دا سُیگی و یومشاقلیق بیلِنمی؟ سیز بولارینگ هایسینی سایلایارسینگیز؟ |
© Turkmen Truth