۱ قُرِنتُس‌لار 3 - مُقادِّس کیتاب1 اِی عزیزلِر، مِن سیزینگ بیلِن روحانی اینسانلار یالی گورلِشیپ بیلمِدیم، اُندان باشغا مِن سیزه دونیِوی اینسانلارینا و مسیحه تَزه‌لیکده ایمان گِتیرِنلِره گورّونگ بِرِن یالی گورّونگ بِردیم. 2 سیزه قاتی-قوتی اییمیت بِرمِدیم، سویت بِردیم. سِبَبی سیز قاتی-قوتینی اییمَگه هِنیز تاییار دَلدینگیز. حَضیر هِم تاییار دَلسینگیز. 3 بو دونیَه هِنیز-ده سیزه اُز تاثیرینی یِتیریَر، سِبَبی آرانگیزدا باخیل‍لیق، داعوا-جِنجِل بار. شِیله بُلسا بولار سیزینگ دونیَه دِگیشلیدیگینگیزی بیلدیرمِیَرمی؟ سیز دونیِوی آداملار یالی حِرِکِت اِتمِیَرسینگیزمی نَمه؟ 4 بیرینگیز «مِن پولسینگ شَگیردی»، باشغا بیرینگیز «مِن آپولُسینگ شَگیردی» دییَّرسینگیز. اُندا شِیله دییمِک بیلِن، دونیِوی آداملار یالی حِرِکِت اِتمِیَرسینگیزمی؟ 5 آپولُس کیم؟ پولس کیم؟ بولار سیزینگ عیسی مسیحه ایمان گِتیرمِگینگیزه یاردیم بِرِن خیدماتچیلار آخیرین. خودایینگ بِلّی اِدیشی یالی، بیزینگ هِر بیریمیز اُز ایشیمیزی یِرینه یِتیردیک. 6 مِن تُخوم اِکدیم، آپولُس سوواردی. اِمّا اُسدورِن خودایدیر. 7 شونلوقدا، اِکِن-ده، سوواران-دا هیچدیر. دینگه اُسدوریَن خودای اَهمییِتلیدیر. 8 اِکیَنینگ-ده، سوواریانینگ-دا ماقصادی بیردیر. اُلارینگ هِر بیری اُز چِکِن زَحمِتینه گُرَه سیلاغینی آلار. 9 چونکی بیز خودایینگ هِمکَریدیریس و سیز خودایینگ اِکینی و اُنونگ عماراتیسینگیز. 10 مِن خودایینگ اُزومه بِرِن مِرحِمِتینینگ اوستو بیلِن عماراتینگ اوسّاسی کیمین عماراتینگ بُنیادینی قوردوم. باشغا بیری بُلسا عماراتی بِجِریَر. یُنه هِر کِس اُز بِجِریَنی باباتدا دیقّاتلی بُلمالیدیر. 11 هیچ کیم اُزال توتولان بُنیاددان، یَعنی عیسی مسیحدِن باشغا بیر بُنیادی قوروپ بیلمِز. 12-13 اِگِر بو بُنیادینگ اوستونده بُلسا کیمینگ قیزیلدان، کوموشدِن، جواهیردان، آغاچدان، چُپ-چُردِن یا-دا ساماندان قوراندیغی سُنگرا بِلّی بُلار. بو قاضیلیق اِدیلجِک گونونده اُد بیلِن آیان بُلار. اُد هِر کِسینگ اِدِن ایشینینگ نَهیلیدیگینی ایمتِحان اِدِر. 14 اِگِر اُنونگ قوران عماراتی اُدا جیداسا، اُل اُز سیلاغینی آلار. 15 اِمّا کیمینگ قوران عماراتی یانسا، اُل زییان چِکِر، یُنه اُزی اُدینگ ایچیندِن گِچِن یالی بُلوپ، نِجات تاپار. 16 اُندا سیز اُزونگیزینگ خودایینگ عیباداتخاناسیدیغینگیزی و آرانگیزدا خودایینگ روحونینگ یاشایاندیغینی بیلمِیَرسینگیزمی نَمه؟ 17 اِگِر بیری خودایینگ عیباداتخاناسینی وِیران اِتسه خودای هِم اُنی هِلَک اِدِر. چونکی خودایینگ عیباداتخاناسی مُقادِّسدیر و شُل عیباداتخانا سیزسینگیز. 18 قُی، هیچ کیم اُز-اُزونی آلداماسین. اِگِر هِر کیم اُزونی دونیَه اُلچِگینده حِکمِتلی حاساپلایان بُلسا، قُی، «آحماق» بُلسون. شُندا اُل دُغرودان-دا حِکمِتلی بُلار. 19 چونکی بو دونیَه‌نینگ حِکمِتی خودایینگ ناظاریندا آحماقلیقدیر. مُقادِّس یازغیلاردا: «خودای حِکمِتلی بیلِنی اُز حیله‌سینده توتیار» دییّپ یازیلاندیر. 20 یِنه-ده «خودای حِکمِتلیلِرینگ فیکرلِرینی و اُلارینگ باطیلدیغینی بیلیَر». 21 شونلوقدا، هیچ کیم آداملارینگ اِدِن ایشینه باباتدا قابارماسین! چونکی هِمّه زات سیزینگکیدیر: 22 پولس-ده، آپولُس-دا، پِطرُس-دا، دونیَه-ده، یاشاییش-دا، اُلوم-ده، شو واقت و گِلِجِک-ده – هِمّه زات سیزینگکیدیر. 23 سیز مسیحینگکیسینگیز و مسیح بُلسا خودایینگقیدیر. |
© Turkmen Truth