۱ قُرِنتُس‌لار 2 - مُقادِّس کیتاب1 اِی عزیزلِر، مِن سیزه خودای باراداقی سیری اِعلان اِتمَگه بارانیمدا، دیلِوارلیق یا اینسان حِکمِتی بیلِن بارمادیم. 2 مِن سیزینگ آرانگیزداقام، عیسی مسیحدِن و اُنونگ صلیبه چویلِنمِگیندِن باشغا هِمّه زادی اونوتماغی یورِگیمه دوووپدیم. 3 مِن یانینگیزا بارانیمدا اِجیزدیم، قُرقودان یانگا قاتی تیترِیَردیم. 4 مِن واغیظ اِدِنیمده سیزی ایناندیرماق اوچین حِکمِتلی سُزلِری پِیدالانمادیم. سیزی ایناندیران زات خودایینگ روحونینگ آیان بُلان گویجودی. 5 بو سیزینگ ایمانینگیزینگ اینسان حِکمِتینه دَل-ده، خودایینگ گویجونه دایانماغی اوچیندی. خودایینگ حِکمِتی مُقادِّس روحونگ اوستو بیلِن آیان بُلماغی 6 هاووا، بیز حِکمِتی یِتیشِن آداملارینگ آراسیندا واغیظ اِدیَریس. بیزینگ واغیظ اِدیَن حِکمِتیمیز بو اِییَمینگ یا-دا دونیَه‌دَکی واقتلایین، آخیری پوچ بُلیان حاکیملِرینگ حِکمِتی دَلدیر. 7 بیز خودایینگ سیرلی و گوزگین ساقلانان حِکمِتینی آیدیاریس. خودای بو حِکمِتی بیزینگ هِم اُنونگ بِییکلیگینَه شِریک بُلماغیمیز اوچین، اُنی دونیَه یارادیلمازدان اُنگ قارار اِدیپدی. 8 بو حِکمِته دونیَه حاکیملِرینینگ هیچ بیری دوشونمِدی. چونکی دوشونِن بُلسادیلار، بِییک تانگری عیسی مسیحی صلیبه چویلِمِزدیلِر. 9 اِمّا مُقادِّس یازغیلاردا یازیلیشی یالی: «خودایی سُییَنلِر اوچین اُنونگ تاییارلان زاتلارینی نه گُز گُروپدی، نه-ده قولاق اِشیدیپدی، نه-ده اینسان عاقیلی یِتیپدی.» 10 بیزه بُلسا خودای بو زاتلاری اُز روحی بیلِن آیان اِتدی. چونکی مُقادِّس روح هِمّه زادی، حتّیٰ خودایینگ چونگّور فیکرلِرینه دوشونیَندیر. 11 اینسانینگ فیکرلِرینی اُنونگ ایچیندَکی اُز روحوندان باشغا هیچ کیم بیلمِیَر. خودای باباتدا هِم شِیله: اُنونگ اُز روحوندان باشغا هیچ کیم خودایینگ فیکرلِرینی بیلیَن دَلدیر. 12 بیز بو دونیَه‌نینگ روحونی آلان دَلدیریس. خودایینگ اُزی مِرحِمِت اِدیپ بِرِن زاتلارینا دوشونیپ بیلِر یالی، بیز خودایینگ روحونی آلاندیریس. 13 بیز بولاری اینسان حِکمِتینینگ اُورِدِن سُزلِری بیلِن دَل-ده، مُقادِّس روحونگ اُورِدِن سُزلِری بیلِن آیدیاریس. بیز روحانی حاقیقاتی روحانی سُزلِری بیلِن دوشوندیریَریس. 14 مُقادِّس روحونگ ایزینا دوشمِیَن اینسان خودایینگ روحوندان بُلان زاتلارا دوشونمِیَر. اُل بولاری آحماقلیق حاساپلایار. چونکی مُقادِّس روحونگ فیکرلِرینه دینگه اُنونگ ایزینا دوشیَنلِر سایغاریاندیرلار. 15 مُقادِّس روحونگ ایزینا دوشیَن آدام هِمّه زادی سایغاریپ بیلِر، اِمّا باشغالار بو آدامی سایغارماقدان اِجیزدیرلِر. 16 «خودایینگ فیکرلِرینی کیم بیلدی؟ کیم اُنگا ماصلاحات بِریپ بیلدی؟» اِمّا بیزده مسیحینگ فیکری باردیر. |
© Turkmen Truth