۱ قُرِنتُس‌لار 1 - مُقادِّس کیتاب1 خودایینگ اِراداسی بیلِن عیسی مسیحینگ رِسولی بُلان مِن پولسدِن و دُغانیمیز سوستِنِسدِن 2 خودایینگ مُقادِّسلیگینه چاغیرلیپ و عیسی مسیحده مُقادِّس خالقی اِدیلِن قُرِنتُس‌داقی کِلیساسینا دُغایی سالام. شِیله-ده هِر یِرده هِم اُلارینگ هِم-ده بیزینگ تانگریمیز عیسی مسیحینگ آدینی توتیانلارینگ هِمّه‌سینه دُغایی سالام. 3 آتامیز خودایینگ و تانگریمیز عیسی مسیحینگ مِرحِمِتی و پاراحاتلیغی، قُی، سیزه بُلسون! شوکورلِر 4 خودای عیسی مسیحینگ اوستو بیلِن سیزه مِرحِمِت بِریلدی. مِن مونونگ اوچین هِمیشه خوداییما شوکور اِدیَرین. 5 چونکی سیز عیسی مسیحینگ اوستو بیلِن هِمّه زادا، دیلِوارلیغا-دا و بیلیم خازیناسینا-دا اِیه بُلدونگیز. 6 بو بُلسا مِنینگ سیزه عیسی مسیح باباتدا آیدانلاریمینگ حاقیقاتدیغینی تاصدیقلایار. 7 شُنگا گُرَه-ده یَعنی تانگریمیز عیسی مسیحینگ آسماندان اینمِگینه صابیرسیزلیق بیلِن قاراشیانلارینگ روحی ناغماتلار باباتدا هیچ بیر کِملینگیز یُقدور. 8 تانگریمیز عیسی مسیحینگ گِلجِک گونونده عایپسیز بُلماغینگیز اوچین، اُنونگ اُزی سیزی آخیرا چِنلی قاییم ساقلار. 9 سیزی اُز اُغلی، تانگریمیز عیسی مسیح بیلِن قاتناشیقدا بُلماغا چاغیران خودای اِمیندیر. کِلیساداقی بُلونیشیکلِر 10 اِی عزیزلِر، مِن سیزه تانگریمیز عیسی مسیحینگ آدیندان یالباریارین: بیری-بیرینگیز بیلِن راضیلاشیقلی بُلونگ. آرانگیزدا بُلونیشیکلِره یُل بِرمَنگ، فیکرلِرینگیز و ایسلِگلِرینگیز بیر بُلسون. 11 اِی عزیزلِر، خالویینگ اُیوندَکی آداملار سیزینگ آرانگیزدا داعوا-جِنجِل‍لِرینگ باردیغینی مانگا خابار بِردیلِر. 12 مِن سیزینگ دییَّنلِرینگیزی ناظارا آلیپ شِیله دییَّرین، سِبَبی بیرینگیز «مِن پولسینگ شَگیردی»، یِنه بیرینگیز «مِن آپولُسینگ شَگیردی»، باشغا بیرینگیز بُلسا «مِن پِطرُسینگ شَگیردی»، یِنه بیرینگیز «مِن مسیحینگ شَگیردی» دییَّرمیشینگیز. 13 اُندا بُلسا مسیح بُلوندیمی؟ سیزینگ اوچین صلیبه پولس چویلِندیمی؟ سیز پولسینگ آدی بیلِن تَعمید آلدینگیزمی نَمه؟ 14 خودایا مونگ-ده بیر شوکور، مِن کریسپوس بیلِن قایوسدان باشغانگیزی تَعمید بِرمِدیم. 15 شُنونگ اوچین-ده، هیچ کیم مِنینگ آدیم بیلِن تَعمید بِرلِندیگینی آیدیپ بیلمِز. 16 اِلبِتّه، مِن اِستیفانینگ اُی-ایچِرسینی هِم تَعمید بِریپدیم. یُنه کیمدیر بیرینی تَعمید بِریپ و یا تَعمید بِرمَندیگیم یادیما دوشمِیَر. 17 مسیح مِنی تَعمید بِرمَگه دَل-ده، خوش خاباری واغیظ اِتمَگه ایبِردی. اِمّا عیسی مسیحینگ صلیبدَکی اُلومی بیدِرِک بُلماز یالی، مِن بو خاباری اینسان دانالیغینینگ سُزلِری بیلِن واغیظ اِتمِلی دَل. عیسی مسیح خودایینگ حِکمِتی و قودراتیدیر 18 هِلَکچیلیک یُلوندان باریان آداملار اوچین صلیب باراداقی خابار آحماقلیقدیر. اِمّا بیز، یَعنی نِجات یُلوندان باریانلار اوچین بو خابار خودایینگ قودراتیدیر. 19 چونکی مُقادِّس یازغیلاردا: «مِن حِکیملِرینگ حِکمِتینی وِیران اِدِرین، دانالارینگ دانالیقلارینی باطیل اِدِرین» دییّپ یازیلاندیر. 20 حِکیم آدام هانی؟ دانا آدام هانی؟ بو زامانینگ عالیمی هانی؟ مِگِر خودای دونیَه حِکمِتلیگینینگ آحماقلیقدیغینی گُرکِزمِدیمی نَمه؟ 21 خودای دونیَه اُز حِکمِتینه دایانیپ، خودایی تانیپ بیلمِز دییِن قارار اِتدی. شُنگا گُرَه-ده، آحماق حاساپلانیان خاباریمیزینگ اوستو بیلِن خودای ایمان گِتیریَنلِری نِجات بِرمِگی یورِگینه دوودی. 22 یَهودیلِر قودراتلی عالاماتلاری طالاب اِدیَرلِر. یونانیلار حِکمِتی آغتاریارلار. 23 بیز بُلسا صلیبه چویلِنِن عیسی مسیحی واغیظ اِدیَریس. مسیح یَهودیلِر اوچین بودریمه داشیدیر، یَهودی دَل‍لِر اوچین بُلسا آحماقلیقدیر. 24 اِمّا چاغیریلانلار اوچین: یَهودی بُلسا یا یونانی بُلسا مسیح خودایینگ قودراتی و حِکمِتیدیر. 25 چونکی خودایینگ «آحماقلیغی» اینسان حِکمِتیندِن حِکیمرَکدیر و خودایینگ «اِجیزلیگی» هِم اینسان گویجوندِن گویچلیرَکدیر! 26 اِی عزیزلِر! خودای سیزی چاغیرمانقا اُزونگیزینگ کیم بُلاندیغینگیزی یادا سالینگ. آرانگیزدا اینسان دوشونجِسیندِن حِکیم، گویچلی و آصیلّی حاساپلانیانلارینگیز کَن دَلدی. 27 اِمّا حِکیملِری اوتاندیرماق اوچین، خودای بو دونیَه‌نینگ آحماق حاساپلانیانلارینی سایلادی. گویچلیلِری اوتاندیرماق اوچین هِم بو دونیَه‌نینگ اِجیز حاساپلانیانلارینی سایلادی. 28 خودای دونیَه‌نینگ حُرماتلی حاساپلانیانلارینی باطیل اِتمِک اوچین، آصیلسیزلاری و اَسگِریلمِیَنلِری، یَعنی هیچ حاساپلانیانلاری سایلادی. 29 شُنگا گُرَه-ده، هیچ کیم خودایینگ حوضوریندا قووانماسین! 30 چونکی سیز عیسی مسیح بیلِن دینگه خودایینگ اوستو بیلِن بیرلِشِنسینگیز. عیسی مسیح بیزینگ اوچین خودایینگ حِکمِتینی، یَعنی تاقوالیغیمیز، مُقادِّسلیگیمیز و آزادلیغیمیز بُلدی. 31 شونلوقدا، مُقادِّس یازغیلاردا یازیلیشی یالی: «هِر کیم قووانیان بُلسا، دینگه مسیحه قووانسین». |
© Turkmen Truth