Zebur 96 - Мукаддес Китап

96-нҗы мезмур

¹ Реб хөкүм сүрйәр, гой, ер шатлансын, хемме адалар, гой, бегенишсин.

² Онуң даш-төвереги – булут ве түмлүк, тагтының дүйби – догрулык хем-де адыллык.

³ Онуң өңүнден от-алав йөрейәр, төверекдәки душманларыны яндыряр.

⁴ Йылдырымлары дүнйәни ягтыландыряр, ер йүзи гөрйәр хем галпылдаяр.

⁵ Даглар мум дек эрейәр Реббиң өңүнде – тутуш ер йүзүниң Таңрысының өңүнде.

⁶ Гөклер Онуң догрулыгыны җар эдйәр. Әхли халклар Онуң шан-шөхратыны гөрйәр.

⁷ Бидерек бутларына магтанып, шекиллере сежде эдйәнлер утандырыляр. Оңа тагзым эдиң, эй, әхли худайлар!

⁸ Я Реб, Сениң карарларыңы Сион эшидип, шадыян боляр, Яхуданың гызлары хем бегенйәр.

⁹ Я Реб, Сен ер йүзүнде иң бейигисиң, әхли худайлардан беленде чыкарылансың.

¹⁰ Эй, Ребби сөййәнлер, яманлыгы йигрениң! Ол садыкларының җанларыны аман саклаяр, олары эрбет адамың элинден халас эйлейәр.

¹¹ Нур догуляр догрулар үчин, шадыянлык – йүреги догрулар үчин.

¹² Эй, догрулар, Ребде шатланың, мукаддес адына шүкүрлер эдиң.