Zebur 89 - Мукаддес Китап

ДӨРДҮНҖИ КИТАП (89 – 105‑нҗи мезмурлар) 89-нҗы мезмур

¹ Худайың адамы Мусаның догасы

² Я Таңры, месгенимиз болдуң несиллербойы.

³ Даглар эмеле гелмезден озал, топрагы, әлем-җаханы яратмазыңдан озал, эзелден эбедә ченли болан Худай – Сен.

⁴ «Эй, адам огуллары, доланың» дийип, Сен бизи топрага доландырярсың.

⁵ Сениң назарыңда мүң йыл дүйнки гечен гүн я гиҗәниң нобаты ялы.

⁶ Олары сырып әкидйәрсиң, олар дүйш ялы, олар сәхер чагы битйән от ялы; ол ир сәхерде өсүп, гүллейәр, агшамына болса орлуп, гураяр.

⁷ Сениң гахарыңдан яңа биз ёк болярыс, газабыңдан яңа довла дүшйәрис.

⁸ Сен гүнәлеримизи гойдуң өңүңде, гизлин гүнәлеримизи – Өз гөзлериңиң алнында.

⁹ Әхли гүнлеримиз газабыңың астында гечйәр, йылларымыз бир дем кимин соңланып баряр.

¹⁰ Етмиш йыл – өмрүмизиң гүнлери, сегсен йыл – эгер болайсак гүйчли, оларың иң ягшысы гечйәр азап билен күлпетде, басым гечйәр, биз ёк болуп гидйәрис.

¹¹ Ким Сениң гахарыңың гүйҗүни билйәр? Газабыңың вехимине дүшүнйән бармы?

¹² Йүрегимизиң парасатлы болары ялы, санамагы өврет гүнлеримизи.

¹³ Долан, я Реб! Хачана ченли биз гарашмалы? Өз бенделериңе эт Сен рехими!

¹⁴ Узаклы гүн шатланып, бегенер ялы, ир сәхерде садык сөйгиң билен бизи хошвагт эйле.

¹⁵ Мушакгат чекдирен гүнлериңиң, яманлык гөрен йылларымызың өвезини долуп, бизи шат эйле.

¹⁶ Сениң ишиң аян болсун бенделериңе, шан-шөхратың – оларың чагаларына.

¹⁷ Худайымыз Таңрың мерхемети биз билен болсун. Хайырлы эт эллеримизиң ишини, хава, эллеримизиң иши хайырлы болсун!