Zebur 87 - Мукаддес Китап

87‑нҗи мезмур

¹ Нагма. Кораның несиллериниң мезмуры. Айдымчылар топарының ёлбашчысына. Киришли саз гуралында айдылян нагма. Эзра неслинден Хейманың маскили.

² Я Реб, мени халас эйлейән Худай, гиҗе-гүндиз гашыңда дат-перят этдим.

³ Сениң хузурыңа дога-дилегим барсын, диңле мениң дат-перядымы.

⁴ Чүнки мушакгатлардан долудыр җаным, өлүлер дүнйәсине голайландыр мең өмрүм.

⁵ Мен габра инип барянлардан сайылдым, бир меҗалсыз адам дек болдум.

⁶ Мен өлүлер арасына ташланып, Сени инди асла яда салмаян, Сениң элиңден узага дүшүп, габырда ятан җесет дек болдум.

⁷ Сен мени габрың дүйбүнде, түмлүкде, чуңлукда гойдуң.

⁸ Сениң газабыңың лабыры үстүме инди, әхли толкунларың мени юмурды. Села

⁹ Дост-яранларымдан мени айырдың, мени олара йигренҗи этдиң. Дашымдан багланан, чыкып билмейән.

¹⁰ Хасратдан яңа күтелди гөзүм, я Реб, хер гүн Сени чагырдым, мен эллерими Саңа узатдым.

¹¹ Сен гудратлары мерхумлара этҗекми? Өлүлер Саңа өвги айдармы? Села

¹² Сениң сөйгиң җар эдилерми габырда, Сениң вепадарлыгың – хеләкчилик еринде?

¹³ Гудратларың билинйәрми түмлүкде, Сениң догрулыгың – унудылма юрдунда?

¹⁴ Мен болса, я Реб, Саңа перят эдйәрин, ир сәхерде Саңа дога эдйәрин.

¹⁵ Я Реб, нәме үчин рет эдйәң мени? Нәме үчин гизлейәң менден йүзүңи?

¹⁶ Мен чагалыкдан бәри гөргүли, өлүм халында, ховпларыңа учрап, умытдан дүшдүм.

¹⁷ Сениң газабың үстүме инди, вехимиңиң хүҗүмлери мени юмурды.

¹⁸ Олар узаклы гүн сил дек габаяр, әхли тарапдан төверегими гуршаяр.

¹⁹ Узаклашдырдың менден достларымы, якынларымы, гараңкылык – ялңыз ёлдашым.