Zebur 83 - Мукаддес Китап

83‑нҗи мезмур

¹ Айдымчылар топарының ёлбашчысына. Гититде. Кораның несиллериниң мезмуры.

² Эй, Хөкмүрован Реб! Сениң месгениң ненеңси эзиз!

³ Реббиң ховлуларыны күйсәп, мениң җаным ысгындан дүшйәр; йүрегим, теним дири Худая шатланып, нагмалар айдяр.

⁴ Сениң гурбанлык сыпаң янында хатда серче хем тапяр өзүне бир өй, гарлавач хем – өз чагалары үчин хөвүртге, эй, Хөкмүрован Реб, Патышам хем-де Худайым!

⁵ Багтлыдыр Сениң өйүңде месген тутанлар, олар мыдама Сени шөхратландырарлар. Села

⁶ Багтлыдыр Сенден кувват алянлар, калбында Сиона элтйән ёлы арзувлаянлар!

⁷ Олар Агы-перят җүлгесинден геченде, ол ер чешмелер меканына өврүлйәр, гүйзки ягыш ол ере берекет берйәр.

⁸ Оларың кувваты барха мөвҗейәр, Сионда Худайың хузурында хәзир боларлар.

⁹ Я Хөкмүрован Худайымыз Реб, эшит догамы, диңле мени, эй, Якубың Худайы! Села

¹⁰ Эй, Худай хошамай серет патыша – галканымыза, мерхемет эт Өз сечип-сайланыңа.

¹¹ Чүнки Сениң ховлуларыңда гечен еке гүн башга ерде гечен мүң гүнден ягшы. Эрбетлериң чадырларында мен яшанымдан, Худайымың өйүниң босагасында дураным ягшы.

¹² Чүнки Худайымыз Реб – Гүнүмиз ве галканымыз, Ол мерхемет ве шөхрат берйәр; Ол догры ёлдан йөрейәнлерден хич бир ягшылыгыны гайгырян дәлдир.

¹³ Эй, Хөкмүрован Реб! Саңа бил баглаянлар нәхили багтлы!