Zebur 82 - Мукаддес Китап

82‑нҗи мезмур

¹ Нагма. Асафың мезмуры.

² Эй, Худай, дымма, эй, Худай, үмсүм, бипервай болма.

³ Серет, душманларың питне турузяр, Сени йигренйәнлер башларыны галдыряр.

⁴ Сениң халкыңа гаршы эрбет ниет эдинйәр, Сениң гораянларыңа гаршы дил бирикдирйәр.

⁵ Диййәрлер: «Гелиң, ёк эдели, гой, олар миллет болмасын, мундан бейләк Ысрайылың ады, гой, агзалмасын».

⁶ Олар бир чукура түйкүрип, дил бирикдирйәр хем-де Саңа гаршы әхт баглашяр:

⁷ эдомлар ве ысмайыллар, моваплар ве хагарлар,

⁸ Гебал, Аммон хем-де Амалек, Пилишт хем-де Суруң илаты,

⁹ Ашур-да гошулды, олар Лут огулларыны голдады. Села

¹⁰ Сен Мидяна хем-де Кишон чайында Сисера билен Ябына эденлериңи оларың башындан индер.

¹¹ Олар Эндорда хеләк эдилди, олар топрагың дөкүнине өврүлди.

¹² Ореп ве Зееп ялы эт сердарларыны, Зебах ве Салмунна дек – әхли серкердесини.

¹³ Олар: «Гелиң, Худайың өрүлерини өзүмизе мүлк эдинели» дийдилер.

¹⁴ Эй, Худайым, түвелейдәки тозана, ел өңүндәки харпыга өвүр олары.

¹⁵ Одуң токайы көйдүрши кимин, ялның даглары отлайшы кимин,

¹⁶ харасадың билен ковала Сен олары, апы-тупаның билен горкуз олары.

¹⁷ Утанҗа гапла олаң йүзүни, я Реб, шонда олар агтарар Сениң адыңы.

¹⁸ Бакы рысва болуп, гой, довла дүшсүн, утанч ичинде ёк болуп гитсин.

¹⁹ Гой, олар билсин: Реб – диңе Сенсиң, тутуш ериң Бейик Худайысың!