Zebur 81 - Мукаддес Китап

81‑нҗи мезмур

Асафың мезмуры

¹ Худай Өз меҗлисинде орнуна гечип, ылахы барлыкларың арасында казылык эдйәр.

² Худай шейле диййәр: «Хачана дек адалатсыз казылык эдип, сиз эрбетлере тарапгөйлик этмекчи? Села

³ Адалатлы чөзүң гарыбың, етимиң даваларыны, гораң эзилениң, мәтәҗиң хак-хукугыны.

⁴ Халас эдиң эҗиз билен мәтәҗи, эрбетлериң голундан азат эдиң олары.

⁵ Сиз билмейәрсиңиз, дүшүнмейәрсиңиз, сиз гараңкылыкда йөрейәрсиңиз, ериң бинятлары лерзана гелйәр».

⁶ Мен диййәрин: «Сиз худайларсыңыз, Бейик Худайың огуллары – сизиң барыңыз.

⁷ Эмма адам оглы кимин сиз өлерсиңиз, шазадалар кимин йыкыларсыңыз».

⁸ Галк, эй, Худай, казылык эт ериң йүзүне чүнки Сениңкидир әхли миллетлер.