Zebur 80 - Мукаддес Китап

80‑нҗи мезмур

¹ Айдымчылар топарының ёлбашчысына. Гититде. Асафың мезмуры.

² Кувватымыз болан Худая нагмалар айдың, Якубың Худайына җошуп хешелле какың.

³ Мукама башлаң: депрек, хош овазлы лираны, арфаны чалың.

⁴ Тәзе Ай, долан Ай вагтында, байрам гүнүмизде сурнайлар чалың.

⁵ Чүнки бу – Ысрайылың парзлары, Якуп Худайының берен адалатлы хөкүмлери.

⁶ Юсуп несли Мүсүрден чыкып гайданда, Худай муны оңа дүзгүн хөкмүнде берди. Мен бир нәтаныш дилиң овазыны эшитдим:

⁷ «Мен гершиңи дындырдым йүкден, сениң эллериң халас болды себетден.

⁸ Мушакгат ичинде чагырдың, сени халас эйледим, гөк гүррүлдисинден Мен җогап бердим. Мерибаның боюнда сени сынадым. Села

⁹ Диңле, эй, халкым, хабардар эдейин сени: эй, Ысрайыл, вах, диңлән болсадың Мени!

¹⁰ Ят худай араңызда болмасын, кесеки худая сежде этмегин.

¹¹ Мен – Реб, сениң Худайың, чыкардым Мен сени Мүсүр юрдундан. Агзыңы гиңден ач, оны долдурайын.

¹² Эмма халкым сесиме гулак асмады, Ысрайыл Маңа табын болмады.

¹³ Шонуң үчин ниетлерине гөрә яшасын дийип, Мен олары кесир йүреклерине табшырдым.

¹⁴ Вах, халкым Маңа гулак асан болсады! Ысрайыл Мениң ёлумдан йөрән болсады!

¹⁵ Шонда тиз боюн эгдирердим ягыларыны, душманларына гөнүкдирердим Мен Өз элими.

¹⁶ Ребби йигренйәнлер оңа ялым-юлум эдерди, кысматлары эбеди довам эдерди.

¹⁷ Мен оңа сайлама бугдай ийдирердим, гаядан акан бал билен оны дойрардым».